ନୂଆଦିଲ୍ଲୀ,୧୫।୯: ଦେଶର ୫୦ ଲକ୍ଷରୁ ଅଧିକ କେନ୍ଦ୍ରୀୟ କର୍ମଚାରୀ ଏବଂ ୬୫ ଲକ୍ଷରୁ ଊର୍ଦ୍ଧ୍ୱ ପେନସନଭୋଗୀଙ୍କ ପାଇଁ ଏକ ବଡ଼ ଖୁସି ଖବର ସାମ୍ନାକୁ ଆସୁଛି। ପାର୍ୱଣ ଋତୁ (ନବରାତ୍ରୀ ଏବଂ ଦୀପାବଳି ୨୦୨୬) ଆରମ୍ଭ ହେବା ପୂର୍ୱରୁ ସରକାର ମହଙ୍ଗା ଭତ୍ତା (Dearness Allowance DA) ବୃଦ୍ଧି ଘୋଷଣା କରିପାରନ୍ତି।
ଜୁଲାଇ ୨୦୨୬ରୁ ଲାଗୁ ହେବାକୁ ଥିବା ଏହି DA ବୃଦ୍ଧିକୁ ଦୀର୍ଘ ଦିନରୁ ଅପେକ୍ଷା କରାଯାଉଛି। ଯଦି ଆପଣ ମଧ୍ୟ ଜଣେ କେନ୍ଦ୍ରୀୟ କର୍ମଚାରୀ କିମ୍ୱା ପେନସନଭୋଗୀ, ତେବେ ଆସନ୍ତୁ ସହଜ ଭାଷାରେ ବୁଝିବା ଯେ ଆପଣଙ୍କ DA କେତେ ବଢ଼ିବ ଏବଂ ଆପଣଙ୍କ ହାତକୁ ଆସୁଥିବା ଦରମା (In-hand salary) ଉପରେ ଏହାର କି ପ୍ରଭାବ ପଡ଼ିବ।
ବର୍ତ୍ତମାନ କେନ୍ଦ୍ରୀୟ କର୍ମଚାରୀମାନଙ୍କୁ ସେମାନଙ୍କ ବେସିକ ଦରମା ଉପରେ ୬୦% DA ମିଳୁଛି। ଜୁଲାଇ ୨୦୨୬ର ଅଲ ଇଣ୍ଡିଆ କଞ୍ଜ୍ୟୁମର୍ ପ୍ରାଇସ ଇଣ୍ଡେକ୍ସ (AICPI-IW) ପରିସଂଖ୍ୟାନ ଅନୁଯାୟୀ, ଇଣ୍ଡେକ୍ସ ୧୫୩.୨ ସ୍ତରରେ ପହଞ୍ଚିଛି। ଏହି ତଥ୍ୟ ଆଧାରରେ ଏଥର DAରେ ୪% ବୃଦ୍ଧି ପ୍ରାୟ ନିଶ୍ଚିତ ବୋଲି ଧରାଯାଉଛି। ଏହି ୪% ବୃଦ୍ଧି ପରେ କେନ୍ଦ୍ରୀୟ କର୍ମଚାରୀମାନଙ୍କ ମୋଟ ମହଙ୍ଗା ଭତ୍ତା ବୃଦ୍ଧି ପାଇ ୬୪% ହୋଇଯିବ।
ସାଧାରଣତଃ ସରକାର ଜୁଲାଇରୁ ଲାଗୁ ହେବାକୁ ଥିବା DA ବିଷୟରେ ସେପ୍ଟେମ୍ୱର କିମ୍ୱା ଅକ୍ଟୋବର ମାସରେ ଘୋଷଣା କରିଥାନ୍ତି। କ୍ୟାବିନେଟ ମଞ୍ଜୁରୀ ପରେ ନବରାତ୍ରୀ କିମ୍ୱା ଦୀପାବଳି ପୂର୍ୱରୁ ଏହାର ଆନୁଷ୍ଠାନିକ ଘୋଷଣା କରାଯିବ ବୋଲି ଆଶା କରାଯାଉଛି। ନିଷ୍ପତ୍ତି ଆସିବାରେ ସାମାନ୍ୟ ବିଳମ୍ୱ ହେଲେ ମଧ୍ୟ ଏହି ବର୍ଦ୍ଧିତ ଭତ୍ତା ୧ ଜୁଲାଇ ୨୦୨୬ରୁ ହିଁ ପ୍ରଭାବୀ ହେବ। ଅର୍ଥାତ୍ କର୍ମଚାରୀମାନଙ୍କୁ ଜୁଲାଇ ଏବଂ ଅଗଷ୍ଟ ମାସର ବକେୟା (Arrears) ମିଶାଇ ଏକାସାଙ୍ଗରେ ମିଳିବ।
ମନେରଖନ୍ତୁ ଯେ ୪% DA ବଢ଼ିବାର ଅର୍ଥ ଆପଣଙ୍କ ସମ୍ପୂର୍ଣ୍ଣ ହାତକୁ ଆସୁଥିବା ଦରମା (In-hand salary) ସିଧାସଳଖ ୪% ବଢ଼ିଯିବା ନୁହେଁ। DA ସର୍ୱଦା କର୍ମଚାରୀଙ୍କ ମୂଳ ଦରମା (Basic Pay) ଉପରେ ହିସାବ କରାଯାଏ। ତେଣୁ ଆପଣଙ୍କ ମୂଳ ଦରମା ଯେତେ ଅଧିକ ହେବ, ସେତେ ଅଧିକ ଲାଭ ମିଳିବ। ଏହି ବୃଦ୍ଧି ଯୋଗୁଁ ପେନସନଭୋଗୀଙ୍କ ମାସିକ ପେନସନରେ ମଧ୍ୟ ବୃଦ୍ଧି ଘଟିବ। ଏହା ସହିତ ଆପଣଙ୍କ ପ୍ରୋଭିଡେଣ୍ଟ ଫଣ୍ଡ (PF) ଏବଂ ଗ୍ରାଚ୍ୟୁଇଟି (Gratuity) ଅବଦାନ ଉପରେ ମଧ୍ୟ ଏହାର ସକାରାତ୍ମକ ପ୍ରଭାବ ପଡ଼ିବ।
