ଭୁବନେଶ୍ୱର, ୧୧।୯ (ବ୍ୟୁରୋ): ଆରମ୍ଭ ହେଲାଣି ପାର୍ବଣ ଋତୁ। ଗଣେଶ ପୂଜା ପରେ ପରେ ନୂଆଖାଇ, ବିଶ୍ୱକର୍ମା ପୂଜା, ଦଶହରା ଆଦି ପୂଜା ପାର୍ବଣ ଆସୁଥିବାରୁ ଚଳଚଞ୍ଚଳ ହୋଇ ଉଠିଲାଣି ରାଜଧାନୀ। ସହରର ପ୍ରମୁଖ ଛକ ସ୍ଥାନଗୁଡ଼ିକରେ ଥିବା ଶପିଂମଲ୍, କମ୍ପ୍ଲେକ୍ସ ବଜାରଗୁଡ଼ିକରେ ଦିନକୁ ଦିନ ଅସମ୍ଭାଳ ଭିଡ଼ ହେଉଥିବାର ଦେଖିବାକୁ ମିଳୁଛି। ପାର୍ବଣ ଆସିବା ଫଳରେ ଲୋକଙ୍କୁ ଏକପ୍ରକାର ସତର୍କ କରାଇଦେଇଛି। ବିଶେଷକରି କଟକ ରୋଡ ଅଞ୍ଚଳରେ ହୋଟେଲଠାରୁ ଆରମ୍ଭ କରି ବିଭିନ୍ନ ଦୋକାନ ରହୁଥିବାରୁ ରବିବାର ବ୍ୟତୀତ ଦେଇ ଅନ୍ୟ ସମସ୍ତ ଦିନରେ ଏଠାରେ ସକାଳଠାରୁ ରାତି ପର୍ଯ୍ୟନ୍ତ ପ୍ରବଳ ଭିଡ଼ ରହୁଛି। ଏବେଠାରୁ ସ୍ଥିତି ଏପରି ଥିବାବେଳେ ଦଶହରା ସମୟରେ ଭିଡ଼ ନିୟନ୍ତ୍ରଣ କରିବା ଅସମ୍ଭବ ହୋଇ ପଡ଼ିବ। କାରଣ କଟକ ରୋଡ୍ ଅଞ୍ଚଳରେ ସହରର ସବୁଠାରୁ ଅଧିକ ମା’ ଦୁର୍ଗାଙ୍କର ମୂର୍ତ୍ତି ପୂଜା କରାଯାଇଥାଏ। ପୁରୁଣା ଷ୍ଟେଶନ ବଜାରଠାରୁ ଆରମ୍ଭ କରି ଲକ୍ଷ୍ମୀସାଗର ଛକ, କଟକରୋଡ୍, ଝାରପଡ଼ା, ବମିଖାଲ, ରସୁଲଗଡ଼, ପଳାଶୁଣି ଏହି ଅଞ୍ଚଳଗୁଡିକରେ ପୂଜା କମିଟିଗୁଡ଼ିକ ପକ୍ଷରୁ ମଣ୍ଡପରେ ପୂଜା ହୋଇ ଆସୁଛି। ଏ ସମସ୍ତ ଅଞ୍ଚଳକୁ ଯିବା ପାଇଁ କଟକରୋଡ୍ ଏକ ମୁଖ୍ୟ ସଂଯୋଗ ପଥ। ତେଣୁ ପୂଜା ସମୟରେ ଏହି ଅଞ୍ଚଳରେ ଭିଡ଼ ନିୟନ୍ତ୍ରଣ କରିବା ଅସମ୍ଭବ ହୋଇ ପଡ଼ିବ ବୋଲି ଆଶଙ୍କା କରାଯାଉଛି।
ଅପରପକ୍ଷେ କରୋନା ପାଇଁ ଗତ କିଛି ମାସ ହେବ ରାଜଧାନୀବାସୀ କଟକଣାରେ ରହିଥିଲେ। ମାର୍କେଟଠାରୁ ଆରମ୍ଭ କରି ମନ୍ଦିର ପର୍ଯ୍ୟନ୍ତ ସବୁକିଛି ବନ୍ଦ ରହିଥିଲା। ମାତ୍ର ସଂକ୍ରମଣ କିଛି ମାତ୍ରାରେ ହ୍ରାସ ପାଇବା ପରେ ସରକାର ସହରରୁ କଟକଣା ହଟାଇବା ସହ ସାପ୍ତାହିକ ଶଟ୍ଡାଉନ୍କୁ ସମ୍ପୂର୍ଣ୍ଣରୂପେ ହଟାଇ ଦେଇଛନ୍ତି। ସେହିପରି ଦୋକାନ ବଜାର ମଧ୍ୟ ସକାଳ ୫ଟାରୁ ରାତି ୧୦ଟା ପର୍ଯ୍ୟନ୍ତ ଖୋଲିବାକୁ ଅନୁମତି ମିଳିଛି। ଏହାର ସୁଯୋଗ ନେଇ ଲୋକମାନେ ବେପରୁଆ ହୋଇ ଗଲେଣି। ଆଗକୁ ପର୍ବ ଆସୁଥିବାରୁ ବିଭିନ୍ନ ମାର୍କେଟ, ଶପିଂ ମଲ୍ ସବୁଆଡ଼େ ଭିଡ ଦେଖା ଦେଉଛି। ସାମାଜିକ ଦୂରତା ତ ଦୂର କଥା ଲୋକମାନେ ମାସ୍କ ପିନ୍ଧିବାକୁ ମଧ୍ୟ ଭୁଲି ଗଲେଣି। ଫଳରେ ଗତ କିଛିଦିନ ହେବ ୧୫୦ରୁ ୨ଶହ ମଧ୍ୟରେ ରହୁଥିବା କରୋନା ସଂକ୍ରମଣ ଏବେ ପୁଣି ଉପରମୁହଁା ହେବାକୁ ଲାଗିଛି। ଗତ ୨୪ଘଣ୍ଟାରେ ସହରରୁ ୨୮୮ଜଣ ପଜିଟିଭ୍ ଚିହ୍ନଟ ହୋଇଛନ୍ତି। ସହରବାସୀଙ୍କ ଏପରି ବେପରୁଆ ମନୋଭାବ ପାଇଁ ଆଗକୁ ସ୍ଥିତି ବିଗିଡିବାର ଆଶଙ୍କା ରହିଛି। ପାର୍ବଣ ପାଇଁ ବିଏମ୍ସି ପକ୍ଷରୁ କଟକଣା ଜାରି କରାଯାଇଥିଲେ ମଧ୍ୟ ସହରରେ ଗହଳି କମାଇବା ପାଇଁ ବିଏମ୍ସି ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ନେବା ଜରୁରୀ ବୋଲି ସାଧାରଣରେ ମତ ପ୍ରକାଶ ପାଇଛି।
