ପାରାଦୀପ,୬ା୧(ସ୍ବ.ପ୍ର.): ପାରାଦୀପ ସମୁଦ୍ର ବେଳାଭୂମି କଳିଙ୍ଗ ବାଲିଯାତ୍ରା ପଡିଆରେ ଗତ ୩ ତାରିଖରୁ ଚାଲିଛି ପଲ୍ଲିଶ୍ରୀ ମେଳା। ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ଆୟୋଜିତ ଏହି ମେଳାରେ ମଙ୍ଗଳବାର ଓ ବୁଧବାର ପ୍ରବଳ ଭିଡ଼ ଦେଖିବାକୁ ମିଳିଛି। ଦୀର୍ଘ ଦୁଇବର୍ଷ ପରେ ବେଳାଭୂମିରେ ମେଳା ଦେଖିବା ଏବଂ ଘରକରଣା ସାମଗ୍ରୀ କିଣିବାକୁ ଲୋକଙ୍କ ସମାଗମ ଅଧିକ ରହୁଛି। ଯେଉଁ କରୋନା ଓ ଓମିକ୍ରନ୍ ଭାଇରସ୍ ପାଇଁ ସରକାର ନବବର୍ଷ ପାଳନ ଉପରେ କଟକଣା ଜାରି କରିଥିଲେ ତା’ର ଓଲଟା ଚିତ୍ର ପଲ୍ଲିଶ୍ରୀ ମେଳାରେ ଦେଖିବାକୁ ମିଳୁଛି। ଏହି ମେଳାରେ ୬୨ଟି ଷ୍ଟଲ୍ ହୋଇଛି ଏବଂ ଷ୍ଟଲ୍ ବାହାରେ ତାହାଠାରୁ ଅଧିକ ଉଠା ବ୍ୟବସାୟୀ ବସିଛନ୍ତି। ମେଳା ଭିତରକୁ ପ୍ରବେଶ ବେଳେ ଘରୋଇ ସିକ୍ୟୁରିଟି ମାସ୍କ ପିନ୍ଧିବା ପାଇଁ ପରାମର୍ଶ ଦେଉଛନ୍ତି। ଡାକବାଜି ଯନ୍ତ୍ର ଯୋଗେ ମାସ୍କ ପିନ୍ଧିବା ଓ ସାମାଜିକ ଦୂରତା ଉପରେ କୁହାଯାଉଛି। କିନ୍ତୁ ମେଳା ଭିତରେ ଥିବା ଖାଇବା ଷ୍ଟଲ୍ଗୁଡିକରେ ଲୋକେ ରାଜସ୍ଥାନୀ ଖାଦ୍ୟ, ନୟାଗଡ଼ ଛେନାପୋଡ ଆଦି ଖାଉଛନ୍ତି। ଏଭଳି ନିୟମକୁ ନେଇ କେତେଜଣ ସାଧାରଣ ଲୋକ ପ୍ରଶ୍ନ ଉଠାଇଛନ୍ତି। ଆଇନଜୀବୀ ଗତିକୃଷ୍ଣ ଶତପଥୀ କୁହନ୍ତି, ସରକାର ନୂଆବର୍ଷ ବେଳେ ପର୍ଯ୍ୟଟନ ସ୍ଥାନ, ମନ୍ଦିର ଦର୍ଶନ ଆଦି ଉପରେ କଟକଣା ଜାରି କରି ଲୋକଙ୍କୁ ଅଟକାଉଛନ୍ତି। କିନ୍ତୁ ନିଜେ ମେଳା କରିବେ, ରାଜନୈତିକ ସଭା କରିବେ। ଏ ସମ୍ପର୍କରେ ଓରମାସ୍ର ସିଇଓ ସତ୍ୟସୁନ୍ଦର ଶିବରାମ ପାଇଟାଳଙ୍କୁ ପଚାରିବାରେ ଅପରାହ୍ନ ୪ଟାରୁ ୮ଟା ଯାଏ ଗହଳି ହେଉଥିଲା। ରାଜ୍ୟ ସରକାର ବୁଧବାର ନୂଆ ଗାଇଡ୍ଲାଇନରେ ନାଇଟ୍ କଫ୍ୟୁ ଜାରି କରିଛନ୍ତି। ଜିଲା ପ୍ରଶାସନ ସହ ଆଲୋଚନା କରି ଯାହା କିଛି ପଦକ୍ଷେପ ନେବୁ ବୋଲି ସେ କହିଛନ୍ତି।
