ଆରଡ଼ି,୮।୧୧(ଡି.ଏନ.ଏ.): ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ିର ଆଖଣ୍ଡଳମଣି ପୀଠରେ କାର୍ତ୍ତିକ ମାସର ୪ର୍ଥ ସୋମବାର ଅସମ୍ଭାଳ ଭିଡ଼ ପରିଲକ୍ଷିତ ହୋଇଛି। ଭୋର ୫ଟାରେ ମଙ୍ଗଳ ଆଳତି କରାଯାଇଥିଲା। ପରେ ଯଥା ସମୟରେ ଦୈନିକ ନୀତିକାନ୍ତି ଶେଷ ହୋଇଥିଲା। କୋଭିଡ୍ ନିୟମ ଅନୁଯାୟୀ ସକାଳ ୬ଟାରେ ଭକ୍ତମାନେ ଧାଡ଼ିରେ ଆସି ଦର୍ଶନ କରିଥିଲେ। ହେଲେ ପରବର୍ତ୍ତୀ ସମୟରେ ଭକ୍ତଙ୍କ ସମାଗମ ହୋଇ ଅସମ୍ଭାଳ ଭିଡ ହୋଇଥିଲା। ଅଳ୍ପ ସଂଖ୍ୟକ ପୋଲସ ଫୋର୍ସ ଥିବାରୁ ନିୟନ୍ତ୍ରଣ କରିବା ତାଙ୍କ ପକ୍ଷେ ସମ୍ଭବ ହୋଇଥିଲା। ଏପରିକି ପୀଠ ସମ୍ମୁଖରେ ଠେଲାପେଲା ଭଳି ପରିସ୍ଥିତି ଉପୁଜିଥିଲା। ଫଳରେ କିଛି ଭକ୍ତ ଅସନ୍ତୋଷ ପ୍ରକାଶ କରିଥିଲେ।
ପରବର୍ତ୍ତୀ ସୋମବାରଠାରୁ ଅଧିକ ପୋଲିସ ମୁତୟନ କରାଯାଇ ଭିଡ଼ ନିୟନ୍ତ୍ରଣ, ପାନ୍ଥଶାଳା ନିକଟରେ ଛୋଟ ଛୋଟ ଗାଡ଼ି ଅଟକାଇବା ପାଇଁ ଅସ୍ଥାୟୀ ଷ୍ଟାଣ୍ଡ, ମନ୍ଦିର ପ୍ରଶାସନ ପକ୍ଷରୁ ମାସ୍କ ଚେକିଂ ସହ କୋଭିଡ୍ କଟକଣା ବଳବତ୍ତର କରିବା, ମନ୍ଦିରଠାରୁ କିଛି ଦୂରରେ ଅସ୍ଥାୟୀ ଶୌଚାଳୟ ନିର୍ମାଣ ଲାଗି ସାଧାରଣରେ ଦାବି କରାଯାଇଛି। ଏହି ସମ୍ପର୍କରେ ମନ୍ଦିର ପରିଚାଳକ ବିଦ୍ୟାଧର ପଲାଇଙ୍କୁ ପଚାରିବାରୁ ପୋଲିସ ଫୋର୍ସଙ୍କ ସଂଖ୍ୟା କମ୍ ଥିବାରୁ ମାସ୍କ ଚେକିଂ ଉପରେ ଗୁରୁତ୍ୱ ଦେବା କଷ୍ଟସାଧ୍ୟ। ତେବେ ପରବର୍ତ୍ତୀ ସମୟରେ ମାସ୍କ ଚେକିଂ କଡ଼ାକଡ଼ି କରାଯିବା ସହ କୋଭିଡ୍ କଟକଣା ଉପରେ ଗୁରୁତ୍ୱ ଦିଆଯିବ।
