ନୂଆଦିଲ୍ଲୀ,୧୮ା୮(ପି.ଟି.): ଲୋକ ସଭାର ୫୪୩ ସଦସ୍ୟଙ୍କ ମଧ୍ୟରୁ ୨୫୧ ଜଣ ଏବଂ ରାଜ୍ୟ ସଭାର ୨୩୩ ସଦସ୍ୟଙ୍କ ମଧ୍ୟରୁ ୭୫ ଜଣଙ୍କ ନାମରେ ଆପରାଧିକ ମାମଲା ରହିଥିବା ସୁପ୍ରିମକୋର୍ଟରେ ଦାଖଲ ରାଜନୀତିରେ ଅପରାଧୀକରଣ ରିପୋର୍ଟରୁ ଜଣାପଡ଼ିଛି। ବରିଷ୍ଠ ଆଇନଜୀବୀ ବିଜୟ ହଂସରିଆ ଅଦାଲତରେ ଉକ୍ତ ସତ୍ୟପାଠ ଦାଖଲ କରିଛନ୍ତି। ଏମ୍ପି ଏବଂ ବିଧାୟକମାନଙ୍କ ବିରୋଧରେ ରହିଥିବା ଆପରାଧିକ ମାମଲାଗୁଡ଼ିକର ଶୀଘ୍ର ଫଇସଲା ନିମନ୍ତେ ନିବେଦନ କରି ସର୍ବୋଚ୍ଚ ଅଦାଲତରେ ଜନସ୍ବାର୍ଥ ମାମଲା (ପିଆଇଏଲ୍) ଦାଏର ହୋଇଥିବାବେଳେ ଏଥିରେ ସହାୟତା ପାଇଁ ହଂସରିଆଙ୍କୁ ଆମିକସ୍ କ୍ୟୁରି ନିଯୁକ୍ତ କରାଯାଇଥିଲା। ଦେଶର ମୋଟ ଏମ୍ପି ଏବଂ ବିଧାୟକଙ୍କ ବିରୋଧରେ ୪,୦୦୦ରୁ ଊର୍ଦ୍ଧ୍ୱ ଆପରାଧିକ ମାମଲା ରହିଥିବା ସେ ଦର୍ଶାଇଛନ୍ତି। ୨୮ ମୁଖ୍ୟମନ୍ତ୍ରୀଙ୍କ ମଧ୍ୟରୁ ୧୪ ଜଣଙ୍କ ବିରୋଧରେ ଆପରାଧିକ ମାମଲା ଥିବାବେଳେ ଜଣଙ୍କ ବିରୋଧରେ ଗମ୍ଭୀର ଆପରାଧିକ ମାମଲା ରହିଥିବା ସତ୍ୟପାଠରେ ଦର୍ଶାଯାଇଛି।
ତଥ୍ୟ ଅନୁଯାୟୀ, ତେଲଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀଙ୍କ ବିରୋଧରେ ୮୯ଟି ମାମଲା ଥିବାବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ବିରୋଧରେ ୨୯ ଏବଂ କର୍ନାଟକ ମୁଖ୍ୟମନ୍ତ୍ରୀ ଡି. ଶିବକୁମାରଙ୍କ ବିରୋଧରେ ୧୯ ମାମଲା ରହିଛି। ମାମଲାଗୁଡ଼ିକର ବିଚାରକୁ ତ୍ୱରାନ୍ବିତ କରିବା ଲାଗି ସର୍ବୋଚ୍ଚ ଅଦାଲତ ଏବଂ ହାଇକୋର୍ଟଗୁଡ଼ିକର ଅନୁଧ୍ୟାନ ସତ୍ତ୍ୱେ ୨୦୧୮ରୁ ଏମ୍ପି ଏବଂ ବିଧାୟକମାନଙ୍କ ବିରୋଧରେ ବିଚାରାଧୀନ ଆପରାଧିକ ମାମଲା ପ୍ରାୟ ସମାନ ରହିଛି। ୨୦୨୫ରେ ମୋଟ ୧,୨୪୩ଟି ଆପରାଧିକ ମାମଲାର ଫଇସଲା ହୋଇଥିବାବେଳେ ସେହିବର୍ଷ ୧,୦୫୦ଟି ନୂଆ ମାମଲା ରୁଜୁ ହୋଇଥିଲା। ପୂର୍ବତନ ଓ ବର୍ତ୍ତମାନର ଏମ୍ପି ଏବଂ ବିଧାୟକଙ୍କ ବିରୋଧରେ ମୋଟ ୪,୧୯୨ ମାମଲା ରହିଥିବା ଆମିକସ୍ କ୍ୟୁରି ଅଦାଲତଙ୍କୁ କହିଛନ୍ତି। ରିପୋର୍ଟ ଅନୁଯାୟୀ ଲୋକ ସଭାର ୨୫୧ ସଦସ୍ୟଙ୍କ ବିରୋଧରେ ଆପରାଧିକ ମାମଲା ଥିବାବେଳେ ସେଥିରୁ ୧୭୦ଟି ଗମ୍ଭୀର ମାମଲା ଯେଉଁଥିରେ ୫ ବର୍ଷ କିମ୍ବା ଅଧିକ ଜେଲଦଣ୍ଡ ବ୍ୟବସ୍ଥା ରହିଚି। ସେହିପରି ରାଜ୍ୟ ସଭାର ୭୫ ସଦସ୍ୟଙ୍କ ବିରୋଧରେ ଆପରାଧିକ ମାମଲା ଥିବାବେଳେ ସେଥିରୁ ୪୦ଟି ଗମ୍ଭୀର ମାମଲା ବୋଲି ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍)ରେ ପ୍ରକାଶିତ ରିପୋର୍ଟକୁ ଦର୍ଶାଇ ସତ୍ୟପାଠରେ କୁହାଯାଇଛି।
