ମୁମ୍ବାଇ, ୨୯।୬: ଗତ କ୍ରିକେଟ ସିଜନରେ ରଣଜୀ ଟ୍ରଫି ଏବଂ ସୟଦ ମୁସ୍ତାକ ଅଲୀ ଟି୨୦ ଟୁର୍ନାମେଣ୍ଟ ଖେଳିଥିବା ଅନେକ ଘରୋଇ କ୍ରିକେଟର ଏପର୍ଯ୍ୟନ୍ତ ମ୍ୟାଚ ଫି’ ପାଇ ନ ଥିବା ଜଣାଯାଇଛି। ଗତ ମାର୍ଚ୍ଚ ମାସରେ ଏ ସବୁ ପ୍ରତିଯୋଗିତା ଶେଷ ହୋଇଥିଲା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ସଭାପତି ଦାୟିତ୍ୱ ଗ୍ରହଣ ପରେ ସୌରଭ ଗାଙ୍ଗୁଲି କହିଥିଲେ ଯେ, ଘରୋଇ କ୍ରିକେଟରମାନେ ପାଉଥିବା ବେତନ ଢାଞ୍ଚାରେ ପରିବର୍ତ୍ତନ କରାଯିବ। ମାତ୍ର କରୋନା ଭାଇରସ ସଂକ୍ରମଣଜନିତ ଲକଡାଉନ୍ ଯୋଗୁ ଘରୋଇ ପ୍ରଥମଶ୍ରେଣୀ ଏବଂ ଲିଷ୍ଟ-ଏ କ୍ରିକେଟ ଖେଳିଥିବା ଖେଳାଳିମାନେ ଚିନ୍ତାରେ ଅଛନ୍ତି। ଜଣେ ଖେଳାଳି ରଣଜୀ ଟ୍ରଫି ଖେଳିଲେ ଦିନକୁ ପ୍ରାୟ ୩୫,୦୦୦ ଏବଂ ମୁସ୍ତାକ ଅଲୀ ଟି୨୦ ଖେଳିଲେ ୧୭,୫୦୦ ଟଙ୍କା ପାଇଥାନ୍ତି। ଯଦି ଜଣେ ଖେଳାଳି ପୂରା ସିଜନ (୯ ଗେମ୍) ଖେଳେ ତେବେ ପାଖାପାଖି ୧୩ ଲକ୍ଷ ଟଙ୍କା ପାଇଥାଏ। ମାତ୍ର ଏହି ଫି’ ଅନେକ ଖେଳାଳି ପାଇ ନାହାନ୍ତି। ମ୍ୟାଚ ଫି’ ବ୍ୟତୀତ ଘରୋଇ କ୍ରିକେଟରମାନେ ବିସିସିଆଇ ବର୍ଷକୁ ଆୟ କରୁଥିବା ମୋଟ ରାଜସ୍ବର କିଛି ଅଂଶ (ଜିଆରଏସ) ମଧ୍ୟ ପାଇଥାନ୍ତି। ୨୦୧୬-୧୭ ସିଜନରୁ ତାହା ମଧ୍ୟ ମିଳିନାହିଁ।
