ନାଉଗାଁ,୧୯।୨(ସ୍ବ.ପ୍ର): ନାଉଗାଁ ବ୍ଳକ ଅନ୍ତର୍ଗତ ଶିଖରଘାଟ-ବାଲି ଭଉଁରି ରାସ୍ତା ପୂର୍ତ୍ତ ବିଭାଗ ଅଧୀନରେ ରହିଛି। ୨ ମାସ ପୂର୍ବେ ବିଭାଗ ପକ୍ଷରୁ ମରାମତି କରାଯାଇଥିଲା। ମାତ୍ର ଏବେ ପୁଣି ରାସ୍ତା ଦବି ଖାଲ ସୃଷ୍ଟି ହୋଇଛି। ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ଏହି ରାସ୍ତା କାର୍ଯ୍ୟ କରାଯାଇଥିବାବେଳେ ଅଧିକାଂଶ ସ୍ଥାନରେ ପିଚୁ ଉଠିଯାଇଛି। ନିମ୍ନମାନର କାମ ଯୋଗୁ ରାସ୍ତାର ଏପରି ଅବସ୍ଥା ହୋଇଥିବା ସାଧାରଣରେ ଚର୍ଚ୍ଚା ହୋଇଛି।
ନାଉଗଁା ବଜାରଠାରେ ଦୀର୍ଘ ୧୫ ଦିନରୁ ଊର୍ଦ୍ଧ୍ୱ ହେବ ଏହି ଗୋଟିଏ ପାର୍ଶ୍ୱ ଦବି ଖାଲ ସୃଷ୍ଟି ହୋଇଛି। ସେହିପରି ବ୍ଲକ କାର୍ଯ୍ୟାଳୟ ଛକ ନିକଟରେ ମଧ୍ୟ ଏହି ରାସ୍ତାରେ ଏକ ଖାଲ ହୋଇଥିବା ଜଣାପଡ଼ିଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ରାସ୍ତାଟି ନାଉଗଁା ବ୍ଲକର ମୁଖ୍ୟ ରାସ୍ତା ହୋଇଥିବାବେଳେ ପୁରୀ, ଜଗତ୍ସିଂହପୁର, କଟକ, ପାରାଦୀପ ଓ ଅସ୍ତରଙ୍ଗ ଆଦି ସ୍ଥାନକୁ ସଂଯୋଗ କରୁଛି। ଏହି ରାସ୍ତା ଦେଇ ପ୍ରତ୍ୟହ ଯାତ୍ରୀବାହୀ,ମାଲବାହୀ,ଗାଡି ଯିବା ଆସିବା କରିଥାନ୍ତି। ତା’ସହିତ ଦେବୀ ନଦୀରେ ଥିବା ବାଲି ସଇରାତରୁ ବାଲି ବୋଝେଇ ଗାଡି ଏହି ରାସ୍ତା ଦେଇ ବିଭିନ୍ନ ସ୍ଥାନକୁ ଯାଇଥାଏ। ଏହି ରାସ୍ତା ବ୍ଲକର ମୁଖ୍ୟ ସଂଯୋଗକାରୀ ରାସ୍ତା ହୋଇଥିବାବେଳେ ୭୦୦ ମିଟର ରାସ୍ତା ପାଇଁ ୧୫ ଲକ୍ଷ ବ୍ୟୟ ହୋଇଛି। ଗୋଟିଏ ବର୍ଷରେ ଏହି ରାସ୍ତା ୨ ଥର ମରାମତି କରାଯାଇଛି। ବାରମ୍ବାର ରାସ୍ତା ମରମତି କରାଯାଉଥିବାବେଳେ ଖୁବ କମ୍ ଦିନରେ ଖରାପହୋଇ ଯାଉଥିବାରୁ ଏହାର କାର୍ଯ୍ୟକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ରାସ୍ତା ଦବିବା ଫଳରେ ରାତିରେ ମାଲବାହୀ ଗାଡି ଯାତାୟାତ ସମୟରେ ଦୁର୍ଘଟଣା ଘଟିବାର ଆଶଙ୍କା ରହିଛି। ଉକ୍ତ ରାସ୍ତା ପାଇଁ ପୁନର୍ବାର କାର୍ଯ୍ୟ କରିବାକୁ ପ୍ରଶାସନ ନିକଟରେ ବୁଦ୍ଧିଜୀବୀମାନେ ଦାବି କରିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ବଳରାମ ସ୍ବାଇଁ କହିଛନ୍ତି, ସମ୍ପୃକ୍ତ ଠିକାଦାରଙ୍କୁ କୁହାଯାଇ ପୁନର୍ବାର ମରାମତି କରାଯିବ।
