ନୂଆଦିଲ୍ଲୀ: ମହାମାରୀ କରୋନା ସଂକ୍ରମଣକୁ ନେଇ ବିଶ୍ୱବାସୀ ଚିନ୍ତାରେ। ଏବେ ପର୍ଯ୍ୟନ୍ତ କରାଯାଇଥିବା ଆକଳନ ଅନୁଯାୟୀ ୨.୧୮ କୋଟିରୁ ଅଧିକ ଲୋକ ଏଥିରେ ସଂକ୍ରମିତ ହୋଇଛନ୍ତି। ଏପରିକି ୭.୭୩ ଲକ୍ଷ ଲୋକଙ୍କ ମୃତ୍ୟୁ ଘଟିଛି। ଘାତକ ମହାମାରୀ ଯୋଗୁ ଅନେକ ନିଜର ପ୍ରିଜୟନଙ୍କୁ ହରାଇ ସାରିଲେଣି। ହେଲେ ଆମେରିକାର ଟେକ୍ସସରେ ରହୁଥିବା କାର୍ଲୋସ ମୁନିଜଙ୍କ କ୍ଷେତ୍ରରେ କରୋନା ନିଆରା ଅନୁଭୂତି ଆଣିଦେଇଛି। କାରଣ ହସ୍ପିଟାଲ ବେଡ୍ରେ ଥାଇ କାର୍ଲୋସ ବିବାହ କରିଛନ୍ତି।
ଟେକ୍ସସର ସାନ୍ ଆଣ୍ଟୋନିଆରେ ରହୁଥିବା କାର୍ଲୋସ ନିଜ ପ୍ରେମିକା ଗ୍ରେସଙ୍କୁ ବିବାହ କରିଛନ୍ତି। ସେ ବି ଚିକିତ୍ସା ହେଉଥିବା ହସ୍ପିଟାଲରେ। ଏହି ସମୟରେ କେବଳ ଡାକ୍ତର ଓ ଅନ୍ୟ କର୍ମଚାରୀଙ୍କ ସହ ପରିବାରର କିଛି ସଦସ୍ୟ ଉପସ୍ଥିତ ଥିଲେ।
ପୂର୍ବରୁ ଗ୍ରେସ୍ଙ୍କ ସହ କାର୍ଲୋସଙ୍କ ବିବାହ ସ୍ଥିର କରାଯାଇଥିଲା। ହେଲେ କାର୍ଲୋସ କରୋନା ସଂକ୍ରମିତ ହୋଇଥିବା ଜଣାପଡ଼ିଥିଲା। ପରେ ସେ ଡାକ୍ତରଖାନାରେ ଭର୍ତ୍ତି ହୋଇଥିଲେ। ଦିନକୁ ଦିନ ଅବସ୍ଥା ଖରାପ ହେଉଥିବାରୁ ତାଙ୍କୁ ଆଇସିୟୁକୁ ପଠାଇବାକୁ ପଡ଼ିଥିଲା। ଏହି ସମୟରେ ଗ୍ରେସ୍ ଡାକ୍ତରଖାନାରେ ବିବାହ କରିବାକୁ ନିଷ୍ପତ୍ତି ନେଇଥିଲେ। ଶେଷରେ ତାହା ହିଁ ହୋଇଥିଲା। ଏବେ ଏହାର ଭିଡିଓ ଭାଇରାଲ ହେଉଛି।
