ଦାରିଙ୍ଗବାଡ଼ି,୨୦ା୮(ଅରୁଣ ସାହୁ): କନ୍ଧମାଳ ଜିଲା ଜି. ଉଦୟଗିରି ନିର୍ବାଚନ ମଣ୍ଡଳୀର କଂଗ୍ରେସ ବିଧାୟକ ପ୍ରଫୁଲ ପ୍ରଧାନ ବୁଧବାର ବ୍ରାହ୍ମଣୀଗାଁ ଗସ୍ତରେ ଯାଇଥିଲେ। ସେଠାରେ ବିଧାୟକଙ୍କୁ କିଛି କର୍ମୀ ପ୍ରଶ୍ନ ପରେ ପ୍ରଶ୍ନ କରିଚାଲିଥିଲେ। ବିଧାୟକ ନିର୍ବାଚନ ପ୍ରଚାର ସମୟରେ ଦୁର୍ଗମ କାଟିଙ୍ଗିଆ ପଞ୍ଚାୟତର ବିଭିନ୍ନ ଗ୍ରାମକୁ ଯାଇ ଭୋଟ୍ ଭିକ୍ଷା କରିଥିଲେ ଓ ସେହି ସମୟରେ ଲୋକଙ୍କ ବିଭିନ୍ନ ସମସ୍ୟା ସମ୍ପର୍କରେ ଜାଣିବା ପରେ ସେ ବିଧାୟକ ଭାବେ ଜିତିବା ପରେ ଗାଁକୁ ରାସ୍ତା ନିର୍ମାଣ ସହ ପିଇବାପାଣି, ମୋବାଇଲ ନେଟ୍ଓ୍ବର୍କ ଭଳି ମୌଳିକ ସୁବିଧା ଯୋଗାଇ ଦେବି ଓ ଗାଁର ଲୋକମାନେ ହିଁ ନିଜ ଗାଁର ଉନ୍ନୟନ କାର୍ଯ୍ୟକୁ ଠିକା ଭାବେ କାର୍ଯ୍ୟକାରୀ କରି ଅଞ୍ଚଳର ବିକାଶ ହେବ ବୋଲି ଲୋକଙ୍କୁ ପ୍ରତିଶ୍ରୁତି ଦେଇଥିଲେ।
ଇତି ମଧ୍ୟରେ ସେ ବିଜୟ ଲାଭ କରି ୨ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ପ୍ରତିଶ୍ରୁତି କାହିଁକି ପାଳନ କରୁନାହାନ୍ତି ବୋଲି କାଟିଙ୍ଗିଆ, ମିଞ୍ଜାପାଙ୍କା ଆଦି ଅଞ୍ଚଳର ଲୋକମାନେ ସିଧା ବିଧାୟକଙ୍କୁ ପ୍ରଶ୍ନ କରିଥିଲେ। ଯାହାର ଉତ୍ତର ବିଧାୟକ ଲୋକଙ୍କୁ ଦେବା ମୁସ୍କିଲ ହୋଇପଡ଼ିଥିଲା। କିଛି ଅଞ୍ଚଳବାସୀ ବିଧାୟକଙ୍କୁ ଏଭଳି ଅଡୁଆ ପ୍ରଶ୍ନ ପଚାରିବା ସହ ଆମ ସମସ୍ୟାର ସମାଧାନ କରୁନାହାନ୍ତି ବୋଲି ସିଧା ପ୍ରଶ୍ନ କରିଥିଲେ। ଘଟଣା ଧିରେ ଧିରେ ଅପ୍ରୀତିକର ପରିସ୍ଥିତି ଆଡ଼କୁ ଗତି କରିବା ଉକ୍ତ ଭାଇରାଲ ଭିଡିଓରେ ଦେଖିବାକୁ ମିଳୁଛି। ଯାହାକି ମୋବାଇଲକୁ ମୋବାଇଲ ସାମାଜିକ ଗଣମାଧ୍ୟମରେ ଭିଡିଓ ଭାଇରାଲ ହେଉଛି। ପରେ ବ୍ରାହ୍ମଣୀଗାଁ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁୁଝା କରିଥିବା ଜଣାପଡ଼ିଛି।
ପ୍ରକାଶ ଯେ, ଦଳର ବ୍ଲକ ସଭାପତି ଜିରିମୟ ପ୍ରଧାନଙ୍କ ଅଧ୍ୟକ୍ଷତାରେ ବିଏଲ୍ଓ ୨ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ବିଧାୟକ ପ୍ରଫୁଲ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଜିଲା ସଭାପତି ଚନ୍ଦ୍ରଶେଖର ପରିଡ଼ାଙ୍କ ସମେତ ବ୍ଲକ ଅଞ୍ଚଳର ନେତା, କର୍ମୀମାନେ ଯୋଗଦେଇଥିଲେ। ଦଳକୁ ମଜଭୁତ କରିବାକୁ ଏବଂ ଆଗକୁ ତ୍ରିସ୍ତରୀୟ ନିର୍ବାଚନ ରହିଥିବାରୁ ଦଳକୁ ତୃଣମୂଳ ସ୍ତରରେ ଶକ୍ତିଶାଳୀ କରିବାକୁ ବିଧାୟକପ୍ରଧାନ କର୍ମୀଙ୍କୁ ପରାମର୍ଶ ଦେଇଥିଲେ ବିଭିନ୍ନ ପଞ୍ଚାୟତରେ ଓ୍ବାର୍ଡସଭ୍ୟଠାରୁ ସରପଞ୍ଚ, ସମିତିସଭ୍ୟ, ଜିଲାପରିଷଦ ସଦସ୍ୟ ଆଦିକୁ କିଭଳି ଦଳ ଜିତାଇବ। ସେ ନେଇ ରଣନୀତି ଉପରେ ଆଲୋଚନା କରାଯାଇଥିଲା। ଉକ୍ତ ଅଞ୍ଚଳରେ କଂଗ୍ରେସର ସ୍ଥିତି ଭଲ ରହିଥିଲେ ମଧ୍ୟ ଆହୁରି ଶକ୍ତିଶାଳୀ ପାଇଁ ସମସ୍ତ କର୍ମୀ ଅଣ୍ଟା ଭିଡ଼ିବାକୁ ବିଧାୟକ ଏବଂ ଜିଲା ଓ ବ୍ଲକ ସଭାପତି ପରାମର୍ଶ ଦେଇଥିଲେ। ସେହିପରି ବିଭିନ୍ନ ଦଳ ଛାଡ଼ି କଂଗ୍ରେସ ଦଳକୁ ଭଲ ପାଉଥିବା ଲୋକ ପ୍ରତିନିଧି ଓ ଅନ୍ୟ ଦଳର କର୍ମୀ କଂଗ୍ରେସରେ ସାମିଲ ହୋଇଥିଲେ। ପ୍ରାୟ ୬୦ ଜଣ କଂଗ୍ରେସରେ ସାମିଲ ହୋଇଥିଲେ ଓ ଶାନ୍ତିଶୃଙ୍ଖଳାର ସହ କର୍ମୀ ସମ୍ମିଳନୀ ହୋଇଥିଲା ଏବଂ ସମ୍ମିଳନୀ ଶେଷରେ କିଛି କର୍ମୀ ବିଧାୟକଙ୍କୁ ପ୍ରଶ୍ନ କରିଥିବା ବ୍ଲକ ସଭାପତି ସ୍ବୀକାର କରିବା ସହ ତାଙ୍କ ଦଳରେ ଶୃଙ୍ଖଳିତ କର୍ମୀ ଅଛନ୍ତି ବୋଲି ସେ କହିଛନ୍ତି। ଏନେଇ ବିଧାୟକଙ୍କ ପ୍ରତିକ୍ରିୟା ପାଇଁ ତାଙ୍କୁ ଫୋନ୍ରେ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରିନାହିଁ।
