ନୂଆଦିଲ୍ଲୀ,୧୭।୬(ପି.ଟି.): ପାର୍ଲାମେଣ୍ଟ ପରିସରରେ ଥିବା ବରପୁତ୍ରମାନଙ୍କ ପ୍ରତିମୂର୍ତ୍ତିକୁ ଅନ୍ୟତ୍ର ସ୍ଥାନାନ୍ତର କରାଯିବା ଘଟଣାକୁ କଂଗ୍ରେସ ନିନ୍ଦା କରିଛି। କେନ୍ଦ୍ର ସରକାର ଏକତରଫା ଭାବେ ପ୍ରତିମୂର୍ତ୍ତି ସ୍ଥାନାନ୍ତର ପାଇଁ ନିଷ୍ପତ୍ତି ନେଇଛନ୍ତି। ପାର୍ଲାମେଣ୍ଟକୁ ଲାଗି ରହିଥିବା ଗଣତାନ୍ତ୍ରିକ ବିକ୍ଷୋଭ ଅଧିକାରର ପାରମ୍ପରିକ ସ୍ଥଳରେ ମହାତ୍ମା ଗାନ୍ଧୀ ଏବଂ ବି.ଆର୍. ଆମ୍ବେଡ୍କରଙ୍କ ପ୍ରତିମୂର୍ତ୍ତି ନ ରଖିବା ସରକାରଙ୍କ ଲକ୍ଷ୍ୟ ବୋଲି କଂଗ୍ରେସ କହିଛି।
ସମସ୍ତ ସ୍ବାଧୀନତା ସଂଗ୍ରାମୀ ଓ ଅନ୍ୟାନ୍ୟ ନେତାମାନଙ୍କ ପ୍ରତିମୂର୍ତ୍ତିକୁ ଗୋଟିଏ ସ୍ଥାନରେ ଏକତ୍ର ସ୍ଥାପନ କରାଯାଇ ଏହାକୁ ‘ପ୍ରେରଣା ସ୍ଥଳ’ ଭାବେ ନାମିତ କରାଯାଇଛି। ଉପରାଷ୍ଟ୍ରପତି ତଥା ରାଜ୍ୟ ସଭା ଅଧ୍ୟକ୍ଷ ଜଗଦୀପ୍ ଧନ୍କର ଉକ୍ତ ପ୍ରେରଣା ସ୍ଥଳକୁ ଉଦ୍ଘାଟନ କରିବାକୁ ଥିବାବେଳେ ଏହା ପୂର୍ବରୁ କଂଗ୍ରେସ ସମାଲୋଚନା କରିଛି। ଅନ୍ୟପକ୍ଷରେ ଦର୍ଶକଙ୍କ ସୁବିଧା ପାଇଁ ସେଗୁଡ଼ିକୁ ଗୋଟିଏ ସ୍ଥାନରେ ରଖାଗଲା ବୋଲି ଲୋକ ସଭା ସଚିବାଳୟ ପକ୍ଷରୁ କୁହାଯାଇଛି।
