ବ୍ରହ୍ମପୁର ଅଫିସ,୨୮ା୭: ଶିବମନ୍ଦିର କମିଟି ଗଠନକୁ କେନ୍ଦ୍ରକରି ବ୍ରହ୍ମପୁର ଜଗଦଳପୁର ଗ୍ରାମରେ ଦୁଇ ଗୋଷ୍ଠୀ ମଧ୍ୟରେ ମାରପିଟ ହୋଇଛି। ଏହି ଘଟଣାରେ ସଦର ଥାନା ପୋଲିସ ଦୁଇଟି ମାମଲାରେ ୧୦ ଜଣଙ୍କୁ ଗିରଫ କରିଛି। ଜଗଦଳପୁର ଗ୍ରାମର କେ.ବିନୋଦ କୁମାରଙ୍କ ଅଭିଯୋଗ ମୁତାବକ, ପୋଲିସ ଏକ ମାମଲା(ନଂ.୩୨୭/୨୨) ରୁଜୁ କରି ୪ ଜଣଙ୍କୁ ଗିରଫ କରିଛି। ସେମାନେ ହେଲେ ବି. ବିଚିତ୍ର ପାତ୍ର, କେ. ନାରାୟଣ ପାତ୍ର, ଜି. ବିଶ୍ୱନାଥ ପାତ୍ର ଓ ବି. ବିକ୍ରମ ପାତ୍ର। ସେହିପରି ଜଣେ ମହିଳାଙ୍କ ଘରେ ପଶି ତାଙ୍କୁ ଅସଦାଚାରଣ ଓ ମାରପିଟ କରିଥିବା ଅଭିଯୋଗରେ ପୋଲିସ ଏକ ମାମଲା (ନଂ.୩୨୮/୨୨) ରୁଜୁ କର ୬ଜଣଙ୍କୁ ଗିରଫ କରିଛି। ସେମାନେ ହେଲେ ଏଲ. ବିପ୍ଳବ କୁମାର ପାତ୍ର, ସଂଗ୍ରାମ କେଶରୀ ପାତ୍ର, ଏଲ. ତିରୁପତି ପାତ୍ର, ଏନ୍. ଧୀରେନ ଦାଶ, ଏ . ବାଉରୀବନ୍ଧୁ ପାତ୍ର ଓ କେ. ବିନୋଦ କୁମାର।
ସୂଚନା ଅନୁଯାୟୀ, ଜଗଦଳ ଗ୍ରାମରେ ଥିବା ଏକ ଶିବ ମନ୍ଦିର କମିଟି ଗଠନକୁ କେନ୍ଦ୍ରକରି ଉକ୍ତ ଗ୍ରାମର ଦୁଇ ଗୋଷ୍ଠୀ ମଧ୍ୟରେ ଛକାପଞ୍ଝା ଲାଗି ରହିଥିଲା। ବୁଧବାର ଅନୁଷ୍ଠିତ ବୈଠକରେ କୌଣସି ଏକ କାରଣକୁ ନେଇ ଦୁଇଗୋଷ୍ଠୀ ମଧ୍ୟରେ ମାରପିଟ ହୋଇଥିଲା। ଯାହାକୁ ନେଇ ଉଭୟ ଗୋଷ୍ଠୀ ପକ୍ଷରୁ ଥାନାରେ ଅଭିଯୋଗ ହୋଇଥିଲା। ପୋଲିସ ଉଭୟ ଗୋଷ୍ଠୀର ୧୦ ଅଭିଯୁକ୍ତଙ୍କୁ ଗୁରୁବାର ଗିରଫ କରି କୋର୍ଟ ଚାଲାଣ କରିଛି।
