ନୟାଗଡ଼ ଅଫିସ,୨୯ା୯: ନୟାଗଡ଼ ଜିଲା ପାଇଁ ଗର୍ବ ଆଣିଛନ୍ତି ରାଜ ସୁନାଖଳା ପଞ୍ଚାୟତର ଯୁବ ସରପଞ୍ଚ ଚିତ୍ତରଞ୍ଜନ ପ୍ରଧାନ। ଅକ୍ଟୋବର ୨ ତାରିଖ ଗାନ୍ଧୀ ଜୟନ୍ତୀରେ ନୂଆଦିଲ୍ଲୀର ବିଜ୍ଞାନ ଭବନଠାରେ ଚିତ୍ତରଞ୍ଜନ ଆୟୋଜିତ ସ୍ବଚ୍ଛତା ଦିବସରେ ଯୋଗ ଦେବେ। ଏ ନେଇ ରାଜ୍ୟ ସରକାରଙ୍କ ପଞ୍ଚାୟତିରାଜ ଏବଂ ପାନୀୟ ଜଳ ଯୋଗାଣ ତଥା ସଫେଇ ବିଭାଗ ପକ୍ଷରୁ ଚିଠି ନଂ. ୧୮୪୧୪ ସେପ୍ଟେମ୍ବର ୨୭ରେ ବିଭାଗୀୟ ନିର୍ଦ୍ଦେଶକ ନୟାଗଡ଼ ଜିଲାପାଳଙ୍କୁ ଚିଠି କରିଛନ୍ତି। ରାଜ୍ୟରେ ସ୍ବଚ୍ଛତା ପାଇଁ କାର୍ଯ୍ୟ କରି ଅନ୍ୟ ପାଇଁ ପ୍ରେରଣା ସାଜିଥିବା ୧୨ଜଣଙ୍କୁ ଏହି ଗସ୍ତ ପାଇଁ ମନୋନୀତ କରାଯାଇଛି। ମାତ୍ର ୨ଜଣ ସରପଞ୍ଚ ଏଥିପାଇଁ ଉପଯୁକ୍ତ ବିବେଚିତ ହୋଇଛନ୍ତି। ନୟାଗଡ଼ ଜିଲା ରଣପୁର ବ୍ଲକ ରାଜ ସୁନାଖଳା ପଞ୍ଚାୟତର ସରପଞ୍ଚ ଚିତ୍ତରଞ୍ଜନ ଓ ସୁନ୍ଦରଗଡ଼ ଜିଲାର ଲେଧୀମାଙ୍ଗ ପଞ୍ଚାୟତର ସରପଞ୍ଚ ଅନିରୁଦ୍ଧ ଥେମେରିଆ ବିଜ୍ଞାନ ଭବନ ଯିବେ। ତେବେ ଚିତ୍ତରଞ୍ଜନ ରାଜ ସୁନାଖଳା ପଞ୍ଚାୟତର ଦାୟିତ୍ୱ ନେବା ଦିନଠାରୁ ସ୍ବଚ୍ଛତା ଅଭିଯାନକୁ ଗୁରୁତ୍ୱ ଦେଇଛନ୍ତି। ପ୍ରଥମେ ପଞ୍ଚାୟତର ସହରାଞ୍ଚଳରେ ନିଦ୍ଦିଷ୍ଟ ସ୍ଥାନରେ ଚିତ୍ତରଞ୍ଜନ ଡଷ୍ଟବିନ ସ୍ଥାପନା କରିଥିଲେ। ନିଜସ୍ବ ଅର୍ଥରେ ଏକ ଟ୍ରାକ୍ଟର କିଣି ଜଣେ ଚାଳକ, ଜଣେ ସଫେଇ କର୍ମଚାରୀଙ୍କୁ ନିଯୁକ୍ତ ଦେଇଥିଲେ। ପ୍ରତିଦିନ ସକାଳେ ଏହି ଟ୍ରାକ୍ଟରରେ ଡଷ୍ଟବିନରୁ ଅଳିଆ ସଂଗ୍ରହ କରାଯାଇ ନିର୍ଦ୍ଦିଷ୍ଟ ଏକ ସ୍ଥାନରେ ପକାଇବାର ବ୍ୟବସ୍ଥା କରିଛନ୍ତି। ଏ ନେଇ ପ୍ରତି ମାସରେ ୪୦ ହଜାର ଟଙ୍କା ନିଜ ପକେଟ ଖର୍ଚ୍ଚରୁ ବ୍ୟୟ କରୁଛନ୍ତି ବୋଲି ଚିତ୍ତରଞ୍ଜନ କୁହନ୍ତି। ତେବେ ନିଜେ ମଧ୍ୟ ପ୍ରତି ରବିବାର ଯୁବ ଗୋଷ୍ଠୀଙ୍କୁ ସାଙ୍ଗରେ ଧରି ସଫେଇ କରିବାକୁ ବାହାରି ପଡନ୍ତି। ଏପରି କି ଚିତ୍ତ ଟ୍ରଲି ଚଳାଇ ପଞ୍ଚାୟତକୁ ସଫା କରିବାକୁ ପ୍ରୟାସ କରି ବିଗତ ଦିନରେ ଗଣମାଧ୍ୟମରେ ଚର୍ଚ୍ଚିତ ହୋଇଥିଲେ।
