ଲେହ,୨୯।୬: ଗତ କିଛି ଦିନରୁ ଲଦାଖ ଏଲ୍ଏସିରେ ଭାରତ ଓ ଚାଇନା ମଧ୍ୟରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି। ନିକଟରେ ଲଦାଖ ଗଲଓ୍ବାନ ଘାଟିରେ ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ସଂଘର୍ଷ ହେବା ପରେ ଦୁଇ ଦେଶ ଭିତରେ ଉତ୍ତେଜନା ଜାରି ରହିଛି। ଏହି ଉତ୍ତେଜନାକୁ କମ୍ କରିବା ପାଇଁ ପୂର୍ବରୁ ଦୁଇ ଦେଶର କୋର କମାଣ୍ଡର ସ୍ତରରେ ବାର୍ତ୍ତାଳାପ ଚାଲିଥିବା ବେଳେ ଏହାର କୌଣସି ନିଷ୍କର୍ସ ବାହାରି ପାରିନାହିଁ। ଫଳରେ ମଙ୍ଗଳବାର କିମ୍ବା ବୁଧବାର ପୁଣି କୋର କମାଣ୍ଡର ସ୍ତରରେ ତୃତୀୟ ପର୍ଯ୍ୟାୟ ବୈଠକ ଅନୁଷ୍ଠିତ ହୋଇପାରେ ବୋଲି ବିଶ୍ୱସ୍ତ ସୂତ୍ରରୁ ସୂଚନା ମିଳିଛି। ଏହି ବୈଠକ ଭାରତୀୟ ପକ୍ଷ ଚୁସୁଲରେ ଆୟୋଜିତ ହେବ ବୋଲି ଜଣାପଡ଼ିଛି। ଏହା ପୂର୍ବରୁ ଆୟୋଜିତ ହୋଇଥିବା ୨ଟି ବୈଠକ ଚାଇନା ପକ୍ଷ ମୋଲଡୋରେ ଅନୁଷ୍ଠିତ ହୋଇଥିଲା।
