ରାଓ୍ବଲପିଣ୍ଡି:ପାକିସ୍ତାନ ବିପକ୍ଷ ଚଳିତ ଟି୨୦ ସିରିଜ ପରେ ଅନ୍ତର୍ଜାତୀୟ କ୍ରିକେଟରୁ ଅବସର ନେବେ ଜିମ୍ବାଓ୍ବେର ପୂର୍ବତନ ଅଧିନାୟକ ଏଲଟନ୍ ଚିଗୁମ୍ବୁରା। ତାଙ୍କ ଦେଶର କ୍ରିକେଟ ବୋର୍ଡ ଶନିବାର ଏହି ସୂଚନା ଦେଇଛି। ଜିମ୍ବାଓ୍ବେର ଏହି ଭେଟେରାନ କ୍ରିକେଟରଙ୍କ କ୍ୟାରିୟର ୨୦୦୪ରେ ଆରମ୍ଭ ହୋଇଥିଲା। ତାଙ୍କର ଦୀର୍ଘ ୧୬ ବର୍ଷ କ୍ୟାରିୟରର ଅବସାନ ଘଟିବାକୁ ଯାଉଛି। ୩୪ ବର୍ଷୀୟ ଚିଗୁମ୍ବୁରା ତାଙ୍କ ବିଦାୟକାଳୀନ ସିରିଜ ପୂର୍ବରୁ ୧୪ ଟେଷ୍ଟ, ୨୧୩ ଅନ୍ତର୍ଜାତୀୟ ଦିନିକିଆ ଏବଂ ୫୪ ଅନ୍ତର୍ଜାତୀୟ ଟି୨୦ ଖେଳିସାରିଛନ୍ତି। ବାରମ୍ବାର ଆଘାତଜନିତ ସମସ୍ୟାରେ ରହିବା ଏବଂ ଯୁବ ଖେଳାଳିଙ୍କୁ ସୁଯୋଗ ଦେବା ଲାଗି ଏହି ଅଲରାଉଣ୍ଡର ଅବସର ନିଷ୍ପତ୍ତି ନେଇଥିବା ଜିମ୍ବାଓ୍ବେ କ୍ରିକେଟ ପକ୍ଷରୁ କୁହାଯାଇଛି। ପାକିସ୍ତାନ ବିପକ୍ଷ ପ୍ରଥମ ଟି୨୦ ପୂର୍ବରୁ ଚିଗୁମ୍ବୁରା ୫୭୬୧ ଅନ୍ତର୍ଜାତୀୟ ରନ ସଂଗ୍ରହ କରିଥିବାବେଳେ ୧୩୮ ଉଇକେଟ ନେଇ ସାରିଥିଲେ। ତନ୍ମଧ୍ୟରେ ତାଙ୍କର ୨ଟି ଶତକ ଏବଂ ୨୬ ଅର୍ଦ୍ଧଶତକ ସାମିଲ ରହିଛି। ଅନ୍ତର୍ଜାତୀୟ ସ୍ତରରେ ସେ ତାଙ୍କ ଦଳର ୮୦ ଥର (୬୨ ଦିନିକିଆ ଓ ୧୮ ଟି୨୦) ଅଧିନାୟକତ୍ୱ କରିଛନ୍ତି। ଗ୍ରାଣ୍ଟ ଫ୍ଲାଓ୍ବାରଙ୍କ ପରେ ସେ ଜିମ୍ବାଓ୍ବେର ଦ୍ୱିତୀୟ ଖେଳାଳି ଭାବେ ଅନ୍ତର୍ଜାତୀୟ ଦିନିକିଆରେ ୪୦୦୦ ରନ ସହ ୧୦୦ ଉଇକେଟ ହାସଲ କରିବାର ଗୌରବ ଅର୍ଜନ କରିଛନ୍ତି। ଅଷ୍ଟ୍ରେଲିଆ ବିପକ୍ଷ ୨୦୦୭ ଆଇସିସି ପୁରୁଷ ଟି୨୦ ବିଶ୍ୱକପ୍ରେ ତାଙ୍କ ଦଳର ସ୍ମରଣୀୟ ବିଜୟରେ ଚିଗୁମ୍ବୁରା ପ୍ରମୁଖ ଭୂମିକା ଗ୍ରହଣ କରିଥିଲେ। ସେ ତାଙ୍କ ୩ ଓଭର ବୋଲିଂରେ ମାତ୍ର ୨୦ ରନ ବିନିମୟରେ ୩ଟି ଉଇକେଟ ଅକ୍ତିଆର କରିଥିଲେ। ଚିଗୁମ୍ବୁରା ୨୦୦୨ ଓ ୨୦୦୪ରେ ଅନୁଷ୍ଠିତ ୧୯ବର୍ଷରୁ କମ୍ କ୍ରିକେଟ ବିଶ୍ୱକପ୍ରେ ଜିମ୍ବାଓ୍ବେ ଦଳର ପ୍ରତିନିଧିତ୍ୱ କରିଥିଲେ। ସେ ୨୦୧୧ ଆଇସିସି ପୁରୁଷ କ୍ରିକେଟ ବିଶ୍ୱକପ୍ରେ ମଧ୍ୟ ଖେଳିଥିଲେ। ଏହି ଟୁର୍ନାମେଣ୍ଟର ୨୦୧୫ ସଂସ୍କରଣରେ ସେ ତାଙ୍କ ଦଳର ନେତୃତ୍ୱ ନେଇଥିଲେ।
