ବେଙ୍ଗାଲୁରୁ,୨୧।୭: ୨୦୨୩ ବିଧାନସଭା ନିର୍ବାଚନ ପୂର୍ବରୁ କର୍ନାଟକରେ କଂଗ୍ରେସ ଫାଟ ସୃଷ୍ଟି ହୋଇଥିବା ଚର୍ଚ୍ଚା ହେଉଛି। କଂଗ୍ରେସ ନେତା ସିଦ୍ଧରମୈୟା ଏବଂ କର୍ନାଟକ ୟୁନିଟ ସଭାପତି ଡି.କେ ଶିବକୁମାର ରାହୁଲ ଗାନ୍ଧୀଙ୍କୁ ଭେଟିଛନ୍ତି। ୨୦୨୩ ନିର୍ବାଚନ ପାଇଁ ଦଳ ମୁଖ୍ୟମନ୍ତ୍ରୀ ଚେହେରା ଘୋଷଣା କରିବ ନାହିଁ ବୋଲି ହାଇକମାଣ୍ଡ ସ୍ପଷ୍ଟ କରିଛନ୍ତି। ଏହା ସହିତ ଉଭୟ ନେତାଙ୍କୁ ନିର୍ବାଚନରେ ଜିତିବା ପାଇଁ ମିଳିତ ଭାବେ କାର୍ଯ୍ୟ କରିବାକୁ କୁହାଯାଇଛି। ଉଭୟ ସିଦ୍ଧରମୈୟା ଏବଂ ଶିବକୁମାର ପାର୍ଟିରେ ବଡ ପଦ ହାସଲ କରିବାକୁ ଚାହୁଁଛନ୍ତି। ଉଭୟ ମୁଖ୍ୟମନ୍ତ୍ରୀଙ୍କ ପଦବୀ ଉପରେ ନଜର ରଖିଛନ୍ତି। ରାହୁଲ ଗାନ୍ଧୀ ସେମାନଙ୍କୁ ମିଳିତ ଭାବେ କାର୍ଯ୍ୟ କରିବାକୁ କହିଛନ୍ତି ଏବଂ ନିର୍ବାଚନ ଦୁଇ ବର୍ଷ ବାକି ଥିବାରୁ ମୁଖ୍ୟମନ୍ତ୍ରୀଙ୍କ ପଦ ବିଷୟରେ ଚିନ୍ତା ନ କରିବାକୁ କହିଛନ୍ତି। ରାହୁଲ ତାଙ୍କୁ କହିଛନ୍ତି ଯେ, ନିର୍ବାଚନରେ ଜିତିବା ଉପରେ ଧ୍ୟାନ ଦେବା ଉଚିତ୍। ସେମାନେ ମତଭେଦକୁ ଦୂରେଇ ରଖିବାକୁ କହିଥିଲେ।
୨୦୨୩ ବିଧାନସଭା ନିର୍ବାଚନରେ କଂଗ୍ରେସର ନେତୃତ୍ୱ ପାଇଁ କିଛି କଂଗ୍ରେସ ବିଧାୟକ ସିଦ୍ଧରମୈୟାଙ୍କୁ ସମର୍ଥନ କରୁଛନ୍ତି। ଏଥି ସହ ଅନ୍ୟ କେତେକ ନେତା ଚାହୁଁଛନ୍ତି ଯେ ବିଧାନସଭା ନିର୍ବାଚନରେ ରାଜ୍ୟ କଂଗ୍ରେସ ମୁଖ୍ୟ ଡି.କେ ଶିବକୁମାର ଦଳର ନେତୃତ୍ୱ ନିଅନ୍ତୁ। ବିରୋଧୀ ଦଳରେ ଥାଇ ମୁଖ୍ୟମନ୍ତ୍ରୀଙ୍କ ଚେହେରାକୁ ନେଇ ଏଭଳି ଆଲୋଚନା ହେତୁ ଦଳ ଅସହଜ ପରିସ୍ଥିତିର ସମ୍ମୁଖୀନ ହେଉଛି। ଅନ୍ୟପକ୍ଷରେ ଏହା ମଧ୍ୟ ଜାଣିବାକୁ ମିଳିଛି ଯେ ଏଆଇସିସି ଜାତୀୟ ସାଧାରଣ ସମ୍ପାଦକ ତଥା ଦଳର କର୍ନାଟକର ଦାୟିତ୍ୱରେ ଥିବା ରଣଦୀପ ସିଂ ସୁରଜେୱାଲା ମଧ୍ୟ ରାଜ୍ୟ ଗସ୍ତ କରିବେ ଏବଂ ଏଠାରେ କାର୍ଯ୍ୟାଳୟର ଅଧିକାରୀଙ୍କ ସହ ଆଲୋଚନା କରିବେ।
