ଖୋର୍ଦ୍ଧା ଅଫିସ,୨୮ା୧୧: ଖୋର୍ଦ୍ଧା ରାଜସ୍ବ ନିରୀକ୍ଷକ (ଆର୍ଆଇ) କାର୍ଯ୍ୟାଳୟ ନିକଟସ୍ଥ ଏକ ସେବାକେନ୍ଦ୍ରକୁ ଭାଙ୍ଗି ଦେବା ନେଇ ଗୁରୁଜଙ୍ଗର ରଣଜିତ ମହାପାତ୍ର ଗତ ଅକ୍ଟୋବର ୩ରେ ଖୋର୍ଦ୍ଧା ତହସିଲଦାର ଏବଂ ଆର୍ଆଇଙ୍କ ବିରୋଧରେ ଆଦର୍ଶ ଥାନାରେ ଏତଲା ଦେଇଥିଲେ। ମାତ୍ର ଥାନାରେ କୌଣସି ମାମଲା ରୁଜୁ ହୋଇ ନ ଥିଲା। ଫଳରେ ଏନେଇ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟଙ୍କ ନିର୍ଦ୍ଦେଶ କ୍ରମେ ଶନିବାର ଆଦର୍ଶ ଥାନାରେ ଦଫା ୪୨୭, ୨୯୪, ୩୪୧, ୫୦୬ ଏବଂ ୩୪ ଆଇପିସିରେ ଏକ ମାମଲା (ନଂ. ୬୨୧/୨୨) ରୁଜୁ ହୋଇଛି।
ଅଭିଯୋଗରେ ଦର୍ଶାଯାଇଛି ଯେ, ଆର୍ଆଇ କାର୍ଯ୍ୟାଳୟ ନିକଟରେ ରଣଜିତଙ୍କର ଏକ କ୍ୟାବିନ ରହିଥିଲା। ସେଠାରେ ସେ ସେବାକେନ୍ଦ୍ର ଖୋଲିଥିଲେ। ସରକାରଙ୍କ ବିଭିନ୍ନ ଯୋଜନାରେ ହିତାଧିକାରୀଙ୍କୁ ଅନ୍ଲାଇନ ସେବା ଯୋଗାଇଆସୁଥିଲେ। ତେବେ ତହସିଲଦାର ଏବଂ ଆର୍ଆଇ ବିନା ନୋଟିସରେ ରାଜନୈତିକ ତଥା ବ୍ୟକ୍ତିଗତ ଆକ୍ରୋଶ ରଖି ଜେସିବି ଲଗାଇ ସେହି ସେବାକେନ୍ଦ୍ରକୁ ଭାଙ୍ଗିଦେଇଥିଲେ। ସେ ଏହାର ବିରୋଧ କରିବାରୁ ତହସିଲଦାର କୁଆଡ଼େ ତାଙ୍କ ଘରଦ୍ୱାର ଭାଙ୍ଗିଦେବା ସହ ମିଥ୍ୟା ମାମଲା ରୁଜୁ କରି ଜେଲରେ ପୂରାଇ ଦେବେ ବୋଲି ଧମକ ଦେଇଥିଲେ ବୋଲି ରଣଜିତ ଅଭିଯୋଗରେ ଉଲ୍ଲେଖ କରିଛନ୍ତି। କ୍ୟାବିନରେ ଥିବା ତାଙ୍କ କମ୍ପ୍ୟୁଟର, ଲାପ୍ଟପ୍, ପ୍ରିଣ୍ଟର, ଜେରକ୍ସ ମେଶିନ ଏବଂ ଅନ୍ୟ ଆସବାବପତ୍ର, ଯାହାର ମୂଲ୍ୟ ଲକ୍ଷାଧିକ ଟଙ୍କାରୁ ଊର୍ଦ୍ଧ୍ୱ ହେବ ସବୁ ନଷ୍ଟ ହୋଇଯାଇଛି। ସମ୍ପୃୃକ୍ତ ତହସିଲଦାର ଏବଂ ଆର୍ଆଇଙ୍କ ବିରୋଧରେ ସେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
