ଦାରିଙ୍ଗବାଡ଼ି,୨୨ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବିଦ୍ୟୁତ୍ କାର୍ଯ୍ୟାଳୟ ନିକଟରେ ଘଟିଯାଇଛି ଅଭାବନୀୟ ଘଟଣା। ଜଣେ କାର୍ ଚାଳକ ନିଶାସକ୍ତ ଅବସ୍ଥାରେ ୨ ଜଣଙ୍କୁ ଧକ୍କା ଦେବା ସହ ଘଟଣାସ୍ଥଳରୁ ଫେରାର ମାରିଥିଲେ। ପରେ ଲୋକେ ଚାଳକଙ୍କୁ କାବୁ କରି ଥାନାରେ ଜିମା ଦେଇଥିଲେ। ଉକ୍ତ ଘଟଣାରେ ଗୋଟିଏ ବାଇକ୍ ଏବଂ ସ୍କୁଟି ଭାଙ୍ଗି ଚୂର୍ମାର ହୋଇଯାଇଛି। ଦୁର୍ଘଟଣାରେ ଜଣେ ମହିଳାଙ୍କ ସମେତ ୨ ଜଣ ଆହତ ହୋଇଛନ୍ତି। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଛନ୍ତି। ଆହତ ମହିଳା ହେଲେ ଉକ୍ତ ଥାନା ଡବେରୀ ଅଞ୍ଚଳ ବି.ଡକେବାଡି ଗ୍ରାମର ଶାମୁକା ମଲିକ। ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇଥିବାରୁ ତାଙ୍କୁ ଅନ୍ୟତ୍ର ଅଧିକ ଚିକିତ୍ସା ପାଇଁ ନେବାକୁ ଚିକିତ୍ସା କରୁଥିବା ଡାକ୍ତର ପରାମର୍ଶ ଦେଇଥିବା ଜଣାପଡ଼ିଛି। ସେହିପରି ଅନ୍ୟ ଜଣେ ହେଲେ କେର୍କେବାଡ଼ି ଗ୍ରାମର ସୋପ୍ରିୟ ପ୍ରଧାନ।
ପ୍ରକାଶ ଯେ, ଶନିବାର ଅପରାହ୍ନରେ ପଶ୍ଚିମବଙ୍ଗର ରେଜିଷ୍ଟ୍ରେଶନ ଥିବା କାର୍ ନଂ (ଡବ୍ଲ୍ୟୁବି ୧୬ ଏଭି ୮୯୭୦) ବାଲିଗୁଡା ପଟୁ ଦାରିଙ୍ଗବାଡ଼ି ଆସୁଥିଲା। ଏହି ସମୟରେ ରାସ୍ତାରେ ଯାତାୟାତ କରୁଥିବା ୨ ଜଣ ଲୋକଙ୍କୁ ଧକ୍କା ଦେଇଥିଲା। ପ୍ରଥମେ ସ୍କୁଟିରେ ଥିବା ମହିଳା ଶାମୁକାଙ୍କୁ ଧକ୍କା ଦେଇଥିଲା ଓ ସେଠାରେ ହିଁ ସେ ଅଚେତ ହୋଇ ପଡ଼ିଯାଇଥିଲେ। ସେହିପରି ଅନ୍ୟ ଜଣେ ବାଇକ ଚାଳକଙ୍କୁ ମଧ୍ୟ ଧକ୍କା ଦେଇଥିଲା। ଦୁର୍ଘଟଣାଟି ଏତେ ଜୋର୍ରେ ଥିଲା ଯେ, କାର୍ଟି ଯେଉଁ ପଟୁ ଆସୁଥିଲା ସେ ଧକ୍କାରେ ସେହି ପଟକୁ ପୁଣି କାର୍ଟି ବୁଲିପଡ଼ିଥିଲା ବୋଲି ପ୍ରତ୍ୟକ୍ଷ ଦର୍ଶୀ କହିଛନ୍ତି ଓ ସେଠାରୁ କାର୍ଟି ଦ୍ରୁତଗତିରେ ଘଟଣାସ୍ଥଳରୁ ଚାଲିଯାଇଥିଲା। ଆହତମାନଙ୍କୁ ସ୍ବାସ୍ଥ୍ୟକେନ୍ଦ୍ରକୁ ଆଣିବା ପରିବର୍ତ୍ତେ ଘଟଣାସ୍ଥଳରୁ ଚାଳକ ଫେରାର ଯୋଗୁ ଲୋକମାନେ ଉତ୍ତ୍ୟକ୍ତ ହୋଇଥିଲେ। କାର୍ଚାଳକ ଜଣକ ଉକ୍ତ ଦୁର୍ଘଟଣାଗ୍ରସ୍ତ କାର୍ଟିକୁ ଉକ୍ତ ଥାନା ଶ୍ରାନିକେତା ପଞ୍ଚାୟତ ଟକରମାଲା ଗାଁ ଭିତରେ ଲୁଚାଇ ଦେଇଥିଲା। ଲୋକ ଖୋଜି ଉକ୍ତ ସ୍ଥାନରେ ପହଞ୍ଚି କାର୍ ସହ ଚାଳକଙ୍କୁ ଭିଡିଆଣି ମାଡ଼ ମାରିବା ସହ ଥାନାରେ ଜିମା ଦେଇଥିବା ଜଣାପଡ଼ିଛି। ପୋଲିସ କାର୍ ଚାଳକଙ୍କୁ ଅଟକ ରଖି ଘଟଣାର ତଦନ୍ତ ଚଳାଇଥିବା ସହ ଦୁର୍ଘଟଣା ଘଟାଇଥିବା କାର୍ ସମେତ ଦୁର୍ଘଟଣାରେ ଭାଙ୍ଗି ଚୂର୍ମାର ହୋଇଥିବା ସ୍କୁଟି ଓ ବାଇକକୁ ଥାନାକୁ ନେଇଥିବା ପୋଲିସ କହିଛି।
