ନୂଆଦିଲ୍ଲୀ,୩୦।୧ : ସଂସଦରେ ବଜେଟ ଅଧିବେଶନ ପୂର୍ବରୁ ସମସ୍ତ ଦଳର ନେତାଙ୍କ ସହ ମଙ୍ଗଳବାର ଏକ ସର୍ବଦଳୀୟ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକ ପାଇଁ କେନ୍ଦ୍ର ପକ୍ଷରୁ ସମସ୍ତ ଦଳ ଆମନ୍ତ୍ରିତ ହୋଇଥିଲେ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଯୋଶୀ ଉଭୟ ଗୃହର ସମସ୍ତ ଦଳର ନେତାଙ୍କ ସହ ଏକ ବୈଠକ କରିଥିଲେ। ସଂସଦ ଲାଇବ୍ରେରୀରେ ଏହି ବୈଠକ ଅନୁଷ୍ଠିତ ହୋଇଥିଲା।
ବୈ ଠକ ଆରମ୍ଭ ହେବା ପୂର୍ବରୁ ଟିଏମସି ଏମପି ସୁଦୀପ ବନ୍ଦୋପାଧ୍ୟାୟ ଏବଂ ସୁଖେନ୍ଦୁ ଶେଖର ରାୟ କେନ୍ଦ୍ର ମନ୍ତ୍ରୀ ପ୍ରହଲ୍ଲାଦ ଯୋଶୀ ଏବଂ ଅର୍ଜୁନ ରାମ ମେଘୱାଲଙ୍କୁ ଭେଟିଥିଲେ।
ପ୍ରହଲ୍ଲାଦ ଯୋଶୀ କହିଛନ୍ତି ଏହି ବୈଠକରେ ୩୦ ଟି ଦଳର ୪୫ ନେତା ଅଂଶଗ୍ରହଣ କରିଛନ୍ତି। ସେ କହିଛନ୍ତି, ’ଏହି ବୈଠକ ଏକ ଭଲ ପରିବେଶରେ ଅନୁଷ୍ଠିତ ହୋଇଥିଲା। ଏହା ୧୭ ତମ ଲୋକସଭାର ଏକ ସଂକ୍ଷିପ୍ତ ଏବଂ ଶେଷ ଅଧିବେଶନ ଥିଲା ।
ସର୍ବଦଳୀୟ ବୈଠକ ପରେ ସୁଦୀପ ବନ୍ଦୋପାଧ୍ୟାୟ ଗଣମାଧ୍ୟମକୁ କହିଛନ୍ତି, ଆମେ ଆମର ଦାବି ଉପସ୍ଥାପନ କରିବାକୁ ପ୍ରସ୍ତୁତ। ଆମେ ୧୫୦ ସାଂସଦଙ୍କ ନିଲମ୍ବନ ପ୍ରସଙ୍ଗ ମଧ୍ୟ ଉଠାଇଛୁ, କିନ୍ତୁ ସରକାରଙ୍କ ମନୋଭାବ କୌଣସି ପ୍ରଶ୍ନର ଉତ୍ତର ଦେବା ପାଇଁ ନୁହେଁ। ସରକାର ଏହି ପ୍ରଶ୍ନକୁୁ ଏଡାଇବାକୁ ଚିନ୍ତା କରୁଛନ୍ତି।
ଏମପିଙ୍କ ନିଲମ୍ବନ ସମ୍ପର୍କରେ ପଚରାଯିବାରୁ ପ୍ରହଲ୍ଲାଦ ଯୋଶୀ କହିଛନ୍ତି ସମସ୍ତ ନିଲମ୍ବନ ବାତିଲ କରାଯିବ। ମୁଁ ଲୋକସଭା ବାଚସ୍ପତି ଏବଂ ରାଜ୍ୟସଭା ଅଧ୍ୟକ୍ଷଙ୍କ ସହ କଥା ହୋଇଛି। ମୁଁ ମଧ୍ୟ ସରକାରଙ୍କ ତରଫରୁ ତାଙ୍କୁ ଅନୁରୋଧ କରିଛି। ଏହା ହେଉଛି ବାଚସ୍ପତି ଏବଂ ଅଧ୍ୟକ୍ଷଙ୍କ ଅଧିକାର। ତେଣୁ ସମସ୍ତ ନିଲମ୍ବିତ ସାଂସଦଙ୍କ ନିଲମ୍ବନକୁ ବାତିଲ କରି ସେମାନଙ୍କୁ ଗୃହକୁ ଆସିବାକୁ ଅନୁମତି ଦେବାକୁ ଆମେ ଉଭୟଙ୍କୁ ଅନୁରୋଧ କରିଛୁ। ଉଭୟ ଏଥିରେ ସହମତ ଅଟନ୍ତି।
