ଆଡିଲେଡ୍, ୨୨ା୧୨ (ପି.ଟି.)-ଅଷ୍ଟ୍ରେଲିଆ ବିପକ୍ଷ ବକ୍ସିଂ ଡେ’ ଟେଷ୍ଟ ପାଇଁ ରବୀନ୍ଦ୍ର ଜାଡେଜାଙ୍କ ଅଗ୍ରଗତି ଉପରେ ନଜର ରଖିଛି ଭାରତୀୟ ଟିମ୍ ମ୍ୟାନେଜମେଣ୍ଟ। ମ୍ୟାଚ ପୂର୍ବରୁ ଯଦି ଅବା ସେ ଫିଟ୍ ମନେ ହୁଅନ୍ତି ତେବେ ତାଙ୍କୁ ହନୁମା ବିହାରୀଙ୍କ ସ୍ଥାନରେ ଚୂଡ଼ାନ୍ତ ଏକାଦଶରେ ସାମିଲ କରାଯାଇପାରେ। ପ୍ରଥମ ଅନ୍ତର୍ଜାତୀୟ ଟି୨୦ ବେଳେ ଜାଡେଜାଙ୍କ ମୁଣ୍ଡରେ ବଲ୍ ବାଜିଥିଲା। ପୁନଶ୍ଚ ତାଙ୍କର ହାମ୍ଷ୍ଟ୍ରିଙ୍ଗ୍ ଇଞ୍ଜୁରୀ ଥିଲା। ଯାହା ଫଳରେ ସେ ପ୍ରଥମ ଟେଷ୍ଟରୁ ବାଦ୍ ପଡ଼ିଥିଲେ। ଭାରତ ଟେଷ୍ଟ ମ୍ୟାଚ୍ ଖେଳୁଥିବାବେଳେ ଜାଡେଜାଙ୍କୁ ନେଟ୍ସରେ କିଛି ସମୟ ଅଭ୍ୟାସ କରୁଥିବା ଦେଖିବାକୁ ମିଳିଥିଲା। ଖବର ଅନୁସାରେ ଏହି ସିନିୟର ଅଲରାଉଣ୍ଡର ଦ୍ରୁତ ଆରୋଗ୍ୟ ଲାଭ କରୁଛନ୍ତି। ଡିସେମ୍ବର ୨୬ରୁ ମେଲବୋର୍ନଠାରେ ଦ୍ୱିତୀୟ ଟେଷ୍ଟ ଆରମ୍ଭ ପୂର୍ବରୁ ସେ ଠିକ ହୋଇଯାଇଥିବେ ବୋଲି ଅନୁମାନ କରାଯାଉଛି। ହେଲେ ଏଥିରେ ଶତପ୍ରତିଶତ ଗ୍ୟାରେଣ୍ଟି ନାହିଁ। କିନ୍ତୁ ସେ ଯଦି ଅବା ଫିଟ୍ ହୁଅନ୍ତି, ଆନ୍ଧ୍ର ପ୍ରଦେଶ ବ୍ୟାଟ୍ସମ୍ୟାନ ବିହାରୀ ଦଳରୁ ବାଦ୍ ପଡ଼ିବେ। କାରଣ ଆଡିଲେଡ୍ ଟେଷ୍ଟରେ ସେ ଭଲ ସ୍କୋର କରିପାରି ନାହାନ୍ତି। ତେବେ ଏ ସମ୍ପର୍କରେ ଅଜିଙ୍କ୍ୟ ରାହାନେ ଓ ରବି ଶାସ୍ତ୍ରୀ ଯାହା ନିଷ୍ପତ୍ତି ନେବେ।
