ଲାଉସାନେ (ସୁଇଜରଲାଣ୍ଡ), ୨୨।୧୨(ପି.ଟି.)-
କୋଭିଡ୍-୧୯ ମହାମାରୀ ପାଇଁ ବର୍ଷର ଅଧିକାଂଶଭାଗ ଖେଳ ଗୁରୁତର ପ୍ରଭାବିତ ହୋଇଥିବାବେଳେ ଏଫଆଇଏଚ୍ (ଅନ୍ତର୍ଜାତୀୟ ହକି ଫେଡେରେଶନ) ର଼୍ୟାଙ୍କିଙ୍ଗ୍ରେ ଭାରତୀୟ ପୁରୁଷ ୪ର୍ଥ ଓ ମହିଳା ଦଳ ୯ମ ସ୍ଥାନରେ ରହି ବର୍ଷ ଶେଷ କରିଛନ୍ତି। ବିଶ୍ୱ ର଼୍ୟାଙ୍କିଙ୍ଗ୍ରେ ବେଲଜିୟମ ପୁରୁଷ ଓ ନେଦରଲାଣ୍ଡ୍ସ ମହିଳା ଦଳ ଶୀର୍ଷସ୍ଥାନରେ ରହିଥିବା ସୋମବାର ଏଫଆଇଏଚ୍ ପକ୍ଷରୁ ସ୍ପଷ୍ଟ କରାଯାଇଛି।
ଗତ ଜାନୁୟାରୀରେ ହକିର ସର୍ବୋଚ୍ଚ ସଂସ୍ଥା ପକ୍ଷରୁ ନୂଆ ମ୍ୟାଚଭିତ୍ତିକ ର଼୍ୟାଙ୍କିଙ୍ଗ୍ ବ୍ୟବସ୍ଥା ଆରମ୍ଭ କରାଯାଇଥିଲା। ବର୍ଷ ପ୍ରାରମ୍ଭରେ ଏଫଆଇଏଚ୍ ହକି ପ୍ରୋ ଲିଗ୍ ମ୍ୟାଚ ଅନୁସାରେ ବିଭିନ୍ନ ଦଳକୁ ପଏଣ୍ଟ ମିଳିଥିଲା। ମାତ୍ର ମହାମାରୀ ଯୋଗୁ ବିଶ୍ୱବ୍ୟାପୀ ସ୍ବାସ୍ଥ୍ୟ ସଙ୍କଟ ଦେଖାଦେବା ସହ ମାର୍ଚ୍ଚରୁ ଖେଳ ବନ୍ଦ ରହିଥିଲା। ସଦ୍ୟ ପ୍ରକାଶିତ ର଼୍ୟାଙ୍କିଙ୍ଗ୍ ଅନୁସାରେ ପୁରୁଷ ବିଭାଗରେ ବିଶ୍ୱ ଏବଂ ୟୁରୋପିଆନ ଚାମ୍ପିୟନ ବେଲ୍ଜିୟମ ୨୪୯୬.୮୮ ପଏଣ୍ଟ ସହିତ ଶୀର୍ଷସ୍ଥାନ ଅଧିକାର କରିଛି। ୨୦୧୯ ହକି ପ୍ରୋ ଲିଗ୍ ବିଜେତା ଅଷ୍ଟ୍ରେଲିଆ ୨୩୮୫.୭୦ ପଏଣ୍ଟ ସହିତ ଦ୍ୱିତୀୟ, ୨୨୫୭.୯୬ ପଏଣ୍ଟ ପାଇ ନେଦରଲାଣ୍ଡ୍ସ ତୃତୀୟ ଏବଂ ୨୦୬୩.୭୮ ପଏଣ୍ଟ ସହ ଭାରତ ୪ର୍ଥ ସ୍ଥାନରେ ରହିଛି। ଅନ୍ୟ ଦଳଗୁଡ଼ିକ ମଧ୍ୟରେ ଅଲିମ୍ପିକ୍ ଚାମ୍ପିୟନ ଆର୍ଜେଣ୍ଟିନା (୧୯୬୭.୩୯), ଜର୍ମାନୀ (୧୯୪୪.୩୪), ଇଂଲଣ୍ଡ (୧୭୪୩.୭୭), ନ୍ୟୁଜିଲାଣ୍ଡ (୧୫୭୫.୦୦), ସ୍ପେନ (୧୫୫୯.୩୨) ଓ କାନାଡ଼ା (୧୪୧୭.୩୭) ଯଥାକ୍ରମେ ୫ମରୁ ୧୦ମ ସ୍ଥାନ ଅଧିକାର କରିଛି।
ସେହିପରି ମହିଳା ହକି ର଼୍ୟାଙ୍କିଙ୍ଗ୍ରେ ନେଦରଲାଣ୍ଡ୍ସ ୨୬୩୧.୯୯, ଆର୍ଜେଣ୍ଟିନା ୨୧୭୪.୬୧ ଓ ଜର୍ମାନୀ ୨୦୫୪.୨୮ ପଏଣ୍ଟ ପାଇ ପ୍ରଥମ ତିନିସ୍ଥାନ ଅଧିକାର କରିଛି। ଅଷ୍ଟ୍ରେଲିଆ (୨୦୧୨.୮୯) ଚତୁର୍ଥ, ଇଂଲଣ୍ଡ (୧୯୫୨.୭୪) ପଞ୍ଚମ, ନ୍ୟୁଜିଲାଣ୍ଡ (୧୮୧୮.୯୮) ଷଷ୍ଠ, ସ୍ପେନ (୧୮୦୨.୧୩) ସପ୍ତମ, ଆୟର୍ଲାଣ୍ଡ (୧୫୮୩.୦୯) ଅଷ୍ଟମ, ଭାରତ (୧୫୪୩.୦୦) ନବମ ଏବଂ ଚାଇନା (୧୫୨୧.୦୦) ଦଶମ ସ୍ଥାନରେ ରହିଛି।
