ମେଲବୋର୍ନ, ୭ା୮(ପି.ଟି.)- ଭିକ୍ଟୋରିଆ ପ୍ରଦେଶରେ କୋଭିଡ୍-୧୯ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାରୁ ଭାରତ ବିପକ୍ଷ ପାରମ୍ପରିକ ବକ୍ସିଂ ଡେ’ ଟେଷ୍ଟ ମେଲବୋର୍ନ ପରିବର୍ତ୍ତେ ଆଡିଲେଡ୍ରେ କରିବା ଲାଗି ବିଚାର କରୁଛି କ୍ରିକେଟ ଅଷ୍ଟ୍ରେଲିଆ (ସିଏ)। ସ୍ଥାନୀୟ ଏକ ଖବରକାଗଜରେ ପ୍ରକାଶିତ ରିପୋର୍ଟ ଅନୁସାରେ ଡିସେମ୍ବର ୨୬ରୁ ୩୦ ପର୍ଯ୍ୟନ୍ତ ଏହି ମ୍ୟାଚ ଆୟୋଜନ ଦୌଡ଼ରେ ଆଡିଲେଡ୍ ସବୁଠାରୁ ଆଗରେ ରହିଛି। କ୍ରିକେଟ ଅଷ୍ଟ୍ରେଲିଆ ଚେୟାରମ୍ୟାନ ଇଅର୍ଲ ଇଡିଙ୍ଗ୍ସ ଆସନ୍ତା ସପ୍ତାହରେ ଜରୁରିକାଳୀନ ନ୍ୟାଶନାଲ କ୍ରିକେଟ କ୍ୟାବିନେଟ୍ ଡକାଇଛନ୍ତି। ସିରିଜର ସୁପରିଚାଳନା ନେଇ ଏଥିରେ ଆଲୋଚନା ହେବ। କାରଣ ଭାରତ ବିପକ୍ଷ ସିରିଜ ଯଦି ଅବା ସ୍ଥଗିତ ଅବା ବାତିଲ ହୁଏ ତେବେ କ୍ରିକେଟ ଅଷ୍ଟ୍ରେଲିଆ ୩୦୦ନିୟୁତ ଅଷ୍ଟ୍ରେଲୀୟ ଡଲାର ହରାଇବ। ଭିକ୍ଟୋରିଆରେ ବର୍ତ୍ତମାନ ସ୍ଥିତି ଭଲ ନାହିଁ। ଏହି ପ୍ରଦେଶରେ କରୋନା ପଜିଟିଭ୍ଙ୍କ ସଂଖ୍ୟା ୧୩୦୦୦ ରହିଥିବାବେଳେ ୧୭୦ଜଣଙ୍କର ପ୍ରାଣହାନୀ ଘଟି ସାରିଲାଣି। ଅଷ୍ଟ୍ରଲିଆର ଅନ୍ୟ ପ୍ରଦେଶଗୁଡ଼ିକ ମଧ୍ୟରେ ଦ୍ୱିତୀୟ ସ୍ଥାନରେ ରହିଛି ନ୍ୟୁ ସାଉଥ୍ ଓ୍ବେଲ୍ସ। ଏହି ପ୍ରଦେଶରେ ପଜିଟିଭ୍ଙ୍କ ସଂଖ୍ୟା ୪୦୦୦ ରହିଛି। ସାଉଥ ଅଷ୍ଟ୍ରେଲିଆରେ ପଜିଟିଭଙ୍କ ସଂଖ୍ୟା ୪୫୭ ରହିଥିବା ବେଳେ ତନ୍ମଧ୍ୟରୁ ୪୪୫ଜଣ ସୁସ୍ଥ ହୋଇଛନ୍ତି। ଆଡିଲେଡ୍ ହେଉଛି ଏହି ପ୍ରଦେଶର ରାଜଧାନୀ। ବିରାଟ କୋହଲିଙ୍କ ନେତୃତ୍ୱାଧୀନ ଦଳ ବ୍ରିସ୍ବେନରେ ଡିସେମ୍ବର ୩ରୁ ବ୍ରିସବେନ୍ଠାରେ ଅଷ୍ଟ୍ରେଲିଆ ବିପକ୍ଷ ୪ମ୍ୟାଚ ବିଶିଷ୍ଟ ହାଇପ୍ରୋଫାଇଲ୍ ଟେଷ୍ଟ ସିରିଜ ଖେଳିବ। ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ପ୍ରତିଶ୍ରୁତି ଅନୁସାରେ ପରେ ଡିସେମ୍ବର ୧୧ରୁ ୧୫ ତାରିଖ ପର୍ଯ୍ୟନ୍ତ ଆଡିଲେଡ୍ଠାରେ ଏକ ଦିବାରାତ୍ର ଟେଷ୍ଟ ଖେଳାଯିବା କାର୍ଯ୍ୟକ୍ରମ ରହିଛି। ତୃତୀୟ ଓ ଚତୁର୍ଥ ଟେଷ୍ଟ ଯଥାକ୍ରମେ ମେଲବୋର୍ନ (ଡିସେମ୍ବର ୨୬ରୁ ୩୦) ଏବଂ ସିଡ୍ନୀ (ଜାନୁୟାରୀ ୩ରୁ ୭)ଠାରେ ହେବ। ନିଜର ଆର୍ଥିକ ସ୍ଥିତି ସୁଧାରିବା ଲାଗି କ୍ରିକେଟ ଅଷେ୍ଟ୍ରଲିଆ ପାଇଁ ଏହି ସରିଜ ଗୁରୁତ୍ୱପୂର୍ଣ୍ଣ।
