ଭୁବନେଶ୍ୱର, ୧୨।୧୨ (ବ୍ୟୁରୋ): ରାଜଧାନୀ ଭୁବନେଶ୍ୱରରେ ପରିମଳ ବ୍ୟବସ୍ଥାକୁ ଦୃଢ କରିବା ପାଇଁ ବିଏମ୍ସି ବହୁ କୋଟି ଟଙ୍କା ଖର୍ଚ୍ଚ କରୁଥିବାବେଳେ ଏଥିରେ ସଫଳ ହୋଇପାରୁନାହିଁ। ବ୍ୟବସାୟିକ ଅଞ୍ଚଳରୁ ଅଳିଆ ଉଠାଇବା ପାଇଁ ୫୭ଟି ନୂତନ ସଫେଇ ଗାଡ଼ି ନିୟୋଜିତ କରିଥିବାବେଳେ ଆମିଷ ବଜାରକୁ ସମ୍ପୂର୍ଣ୍ଣ ଭୁଲି ଯାଇଛି। ଏଠାରୁ ବାହାରୁଥିବା ମାଛ, ମାଂସର ବର୍ଜ୍ୟକୁ କିପରି ସ୍ଥାନାନ୍ତର କରି ବ୍ୟବସ୍ଥିତ କରାଯିବ ସେ ସମ୍ପର୍କରେ କୌଣସି ବ୍ୟବସ୍ଥା କରାଯାଉ ନାହିଁ। ସହରର ପ୍ରମୁଖ ଆମିଷ ମାର୍କେଟ ଭାବେ ପରିଚିତ ୟୁନିଟ-୪ ହାଟରେ ପରିମଳ ବ୍ୟବସ୍ଥା ଭୁଶୁଡ଼ିପଡ଼ିଛି। ଆମିଷ ରକ୍ତ ପାଣି ସହ ମାଛକାତି, ପୁଟା ଠାରୁ ଆରମ୍ଭ କରି ଚିକେନ୍, ମଟନ୍ରୁ ବାହାରୁଥିବା ବର୍ଜ୍ୟରେ ମାର୍କେଟ ସମ୍ମୁଖ ଭାଗ ପୂତି ଗନ୍ଧମୟ ପରିବେଶ ସୃଷ୍ଟି କରୁଛି। ମାର୍କେଟରେ ମାଛର ୪୦ଟି ହୋଲ୍ସେଲ୍ ଦୋକାନ ଥିବାବେଳେ ୧ଶହରୁ ଊର୍ଦ୍ଧ୍ୱ ଖୁଚୁରା ବ୍ୟବସାୟୀ ରହିଛନ୍ତି। ସେହିପରି ୬୦ଟି ଚିକେନ୍ ଦୋକାନ ଥିବାବେଳେ ୨୩ଟି ମଟନ୍ ଦୋକାନ ରହିଛି। ଏଥିରୁ ବାହାରୁଥିବା ବର୍ଜ୍ୟକୁ ପକାଇବା ପାଇଁ ବିଏମ୍ସି ପକ୍ଷରୁ ଉପଯୁକ୍ତ ବ୍ୟବସ୍ଥା ନ ଥିବାରୁ ବ୍ୟବସାୟୀମାନେ ମନଇଚ୍ଛା ରାସ୍ତା କଡ଼ରେ ଗଦାଇ ଦେଉଛନ୍ତି। ପୁଣି ବୁଲା କୁକୁରମାନେ ଏହାକୁ ଖାଇବା ବେଳେ ଖିନ୍ଭିନ୍ କରି ରାସ୍ତାସାରା ଅପରିଷ୍କାର କରିଦେଉଛନ୍ତି। ପୂର୍ବରୁ ମାର୍କେଟରୁ ବାହାରୁଥିବା ବର୍ଜ୍ୟକୁ ନିକଟସ୍ଥ ଡଷ୍ଟବିନ୍ରେ ପକାଯାଉଥିଲା। ଡଷ୍ଟବିନ୍ ଫୁଲ୍ ହେବା ପରେ ସେଠାରୁ ବିଏମ୍ସିର ଅଳିଆ ଗାଡ଼ି ବର୍ଜ୍ୟକୁ ନେଇଯାଉଥିଲା। ମାତ୍ର ଗତ ୧୫ଦିନ ହେବ ଏହି ଡଷ୍ଟବିନକୁ ଉଠାଇ ଦିଆଯାଇଛି। ଅଳିଆ ପକାଇବାକୁ ସ୍ଥାନ ନ ପାଇ ବ୍ୟବସାୟୀମାନେ ରାସ୍ତା କଡ଼ରେ ଗଦାଇ ଦେଉଛନ୍ତି। ଏ ସମ୍ପର୍କରେ ଭୁବନେଶ୍ୱର ନନ୍ଭେଜ୍ ଟ୍ରେଡର୍ସ ଫେଡେରେଶନ ସଭାପତି ଶେଖ୍ ମୁନ୍ତାକିମ୍ ବକ୍ସ କହିଛନ୍ତି, ପ୍ରତି ଦିନ ବହୁ ପରିମାଣର ବର୍ଜ୍ୟ ବାହାରୁଥିବାବେଳେ ଏହାକୁ ଫୋପାଡ଼ିବା ପାଇଁ ବିଏମ୍ସି ସ୍ଥାୟୀ ବ୍ୟବସ୍ଥା କରୁନାହିଁ। ବିଶେଷକରି ଡଷ୍ଟବିନ୍ ହଟାଇ ଦିଆଯିବା ପରେ ବ୍ୟବସାୟୀମାନେ ହଇରାଣ ହେଉଛନ୍ତି। ବିଏମ୍ସିର ଅଳିଆ ଗାଡ଼ି ଦିନରେ ଗୋଟେଥର ଆସି ଏଗୁଡ଼ିକ ଉଠାଉଛି। ମାତ୍ର ହାଟରେ ଥିବା ହୋଲସେଲ୍ ବ୍ୟବସାୟୀମାନେ ସନ୍ଧ୍ୟାରେ ବେପାର ବନ୍ଦ କରିବା ବେଳେ ବର୍ଜ୍ୟ ଆଣି ଏଠାରେ ପକାଉଛନ୍ତି। ରାତିସାରା ସେଗୁଡିକ ସେମିତି ରାସ୍ତାରେ ପଡିରହୁଛି। ତା’ପରଦିନ ଅଳିଆ ଗାଡ଼ି ଆସିବା ବେଳକୁ ରାସ୍ତାପୂରା ଅପରିଷ୍କାର ହୋଇଯାଉଛି। ତେଣୁ ବିଏମ୍ସି ଦିନରେ ୨ଥର ଅଳିଆ ଗାଡ଼ି ଆଣି ଏହାକୁ ଉଠାଇବା ଆବଶ୍ୟକ।
ଅପରପକ୍ଷେ ବିଏମ୍ସି ଡେପୁଟି କମିଶନର (ପରିମଳ) ଶୁଭେନ୍ଦୁ ସାହୁ କହିଛନ୍ତି, ଚିକେନ ବ୍ୟବସାୟୀମାନେ ବାହାରୁଥିବା ବର୍ଜ୍ୟକୁ ଚିଲିକା ପଟେ ଥିବା ଫାର୍ମଗୁଡିକୁ ଦେଇ ଦେଉଛନ୍ତି। ସେହିପରି ମଟନ୍ ବା ଖାସିରୁ ସେଭଳି କିଛି ବର୍ଜ୍ୟ ବାହାରୁ ନାହିଁ। ପୁଟାଠାରୁ ଆରମ୍ଭ କରି ଖାସି ଚମଡ଼ା ପର୍ଯ୍ୟନ୍ତ ସେ ସବୁକୁ ଲୋକମାନେ ନେଇ ଯାଉଛନ୍ତି। କେବଳ ମାଛରୁ ବାହାରୁଥିବା କିଛି ବର୍ଜ୍ୟ ଆମ ପାଖକୁ ଆସୁଛି। ସେଗୁଡିକ ସହରରୁ ବାହାରୁଥିବା ଅନ୍ୟ ବର୍ଜ୍ୟ ସହିତ ମିଶି ଟିଟିଏସ୍କୁ ଯାଉଛି। ତେବେ ଏହାର ପ୍ରୋସେସିଂ କରିବା ପାଇଁ ଚେଷ୍ଟା କରାଯାଉଛି। ଖୁବ୍ଶୀଘ୍ର ମାଛ ଏବଂ ମାଂସର ବର୍ଜ୍ୟକୁ ନେବା ପାଇଁ କେଉଁମାନେ ଆଗ୍ରହୀ ହେବେ ସେ ନେଇ ଏକ୍ସପ୍ରେସନ୍ ଅଫ୍ ଇଣ୍ଟରେଷ୍ଟ ବାହାର କରାଯିବ ବୋଲି ସେ କହିଛନ୍ତି।
