କଟକ ଅଫିସ, ୧୧।୧୧: କଟକ ଜିଲାର ଅରିଲୋଠାରେ ଓମ୍ଫେଡର ଅତ୍ୟାଧୁନିକ ଦୁଗ୍ଧ ପ୍ରକ୍ରିୟାକରଣ ପ୍ଲାଣ୍ଟକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ଉଦ୍ଘାଟନ କରିଛନ୍ତି। ମୁଖ୍ୟମନ୍ତ୍ରୀଙ୍କ ଏହି ଗସ୍ତକୁ ଭାଜପା ବିରୋଧ କରିଥିଲା। କଟକ ନଗର ଭାଜପା ସଭାପତି ଲଲାଟେନ୍ଦୁ ବଡୁଙ୍କ ନେତୃତ୍ୱରେ ବହୁସଂଖ୍ୟକ କର୍ମୀ ଶୋଭାଯାତ୍ରାରେ ଆସି ନାରାବାଜି ଦେବା ସହ ନରାଜ ପୋଲ ମୁଣ୍ଡରେ କଳାପତାକା ପ୍ରଦର୍ଶନ କରିଥିଲେ। ମମିତା ମେହେର ହତ୍ୟା ଘଟଣାରେ ମୁଖ୍ୟମନ୍ତ୍ରୀଙ୍କ ଉଦାସୀନତା ଓ ଦୋଷୀଙ୍କୁ ସାଙ୍ଗରେ ଧରି ବୁଲିବା ଘଟଣାକୁ ନେଇ ଭାଜପା କର୍ମୀମାନେ ନିନ୍ଦା କରିଥିଲେ। ତେବେ ଭାଜପା ରାଜ୍ୟ ସଂଖ୍ୟାଲଘୁ ମୋର୍ଚ୍ଚା ସଭାପତି ସିକନ୍ଦର ଅଲ୍ଲି, ରାଜ୍ୟ ମହିଳା ମୋର୍ଚ୍ଚା ସମ୍ପାଦିକା ରଶ୍ମିରେଖା ଦାସ, ରଞ୍ଜିତା ନାଏକ, ଜୟକୃଷ୍ଣ ସ୍ବାଇଁ, ସବ୍ୟସାଚୀ ମହାପାତ୍ର, ସୁବାସ ମହାନ୍ତି,ସଞ୍ଜୀବ ଚିନାରା, ଅମ୍ବିକା ସାମଲ, ସଞ୍ଜୟ ଜେନା, ମହମ୍ମଦ ସବିରଙ୍କ ସମେତ ଅନ୍ୟ କର୍ମୀଙ୍କୁ ପୋଲିସ ଗିରଫ କରିବା ପରେ ବ୍ୟକ୍ତିଗତ ମୁଚାଲିକାରେ ଛାଡି ଦେଇଥିଲା।
ସେହିପରି ଭାଜପା ଓ କଂଗ୍ରେସର କେତେଜଣ କର୍ମକର୍ତ୍ତା ଶ୍ରୀଶ୍ରୀ ବିଶ୍ୱବିଦ୍ୟାଳୟ ନିକଟରେ ମୁଖ୍ୟମନ୍ତ୍ରୀଙ୍କ ବିରୋଧରେ ସ୍ଲୋଗାନ ଦେଉଥିବା ସମୟରେ ବିଜେଡି କର୍ମୀ ପହଞ୍ଚି ଅଟକାଇବାକୁ ଉଦ୍ୟମ କରିଥିଲେ। ଏହାକୁ ନେଇ ସେଠାରେ ମୁହଁାମୁହିଁ ପରିସ୍ଥିତି ଦେଖାଦେଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣରେ ରଖିଥିଲା। ଏଥିସହ ଭାଜପା ଓ କଂଗ୍ରେସର ପ୍ରାୟ ୭୦ଜଣ କର୍ମୀଙ୍କୁ ଗିରଫ କରି ପରେ ବ୍ୟକ୍ତିଗତ ମୁଚାଲିକାରେ ଛାଡ଼ି ଦେଇଥିବା ଏସିପି ଚନ୍ଦନ ଘଡେଇ କହିଛନ୍ତି।
