କାସୁଗା (ଜାପାନ),୨୯।୯: ବ୍ରାଜିଲ ଓ ମଧ୍ୟ ଆଫ୍ରିକାରେ ମିଳୁଥିବା ଏକ କଳା ରଙ୍ଗର ପଥରକୁ ଦେଖିଲେ ପ୍ରଥମ ନଜରରେ ଏହା ଏକ ସାଧାରଣ କାଚ ପରି ଚକଚକ ଦିଶେ। ମାତ୍ର ଏହାକୁ ଭାଙ୍ଗିଲେ ଭିତରେ ଗୋଟିଏ ସ୍ଫଟିକ ବଦଳରେ ଶହ ଶହ ସୂକ୍ଷ୍ମ ହୀରାର ଏକ ସଂଘଠିତ ଗୁଚ୍ଛ ଦେଖିବାକୁ ମିଳେ। ବିଜ୍ଞାନ ଭାଷାରେ ଏହାକୁ ‘କାର୍ବୋନାଡୋ’ ବା କଳା ହୀରା କୁହାଯାଏ। ଏହି ରହସ୍ୟମୟ କଳା ହୀରା କେଉଁଠୁ ଆସିଲା, ସେ ନେଇ ଦୀର୍ଘ ଦିନରୁ ଚାଲିଥିବା ଗବେଷଣାରେ ଏବେ ଏକ ନୂତନ ଏବଂ ରୋମାଞ୍ଚକର ତଥ୍ୟ ସାମ୍ନାକୁ ଆସିଛି ।
ଭୂବିଜ୍ଞାନ ଏବଂ ପୃଥିବୀ ବିଜ୍ଞାନ କ୍ଷେତ୍ରରେ କାର୍ଯ୍ୟ କରୁଥିବା ପ୍ରସିଦ୍ଧ ଅନ୍ତର୍ଜାତୀୟ ଗବେଷଣା ପତ୍ରିକା ‘ଗୋଣ୍ଡୱାନା ରିସର୍ଚ୍ଚ’ରେ ପ୍ରକାଶିତ ଏକ ନୂତନ ଅଧ୍ୟୟନ ଅନୁଯାୟୀ, ଆଜିକୁ ବହୁ କୋଟି ବର୍ଷ ପୂର୍ବେ ପୃଥିବୀ ପୃଷ୍ଠରେ ଘଟିଥିବା ଏକ ପ୍ରଚଣ୍ଡ ମହାଜାଗତିକ ଧକ୍କା ଯୋଗୁ ହିଁ ଏହି କଳା ହୀରାର ନିର୍ମାଣ ପ୍ରକ୍ରିୟା ଆରମ୍ଭ ହୋଇଥିଲା। ଗବେଷକ ଆଟିଲା ଡେମେନି ଏବଂ ପିଟର ନେମେଥ୍ଙ୍କ ନେତୃତ୍ୱରେ ହୋଇଥିବା ଏହି ଗବେଷଣା ଅନୁସାରେ, ମହାକାଶରୁ ବଡ଼ଧରଣର ଗ୍ରହପିଣ୍ଡ (ଆଷ୍ଟରଏଡ୍) ଆସି ପ୍ରାଚୀନ ପୃଥିବୀ ପୃଷ୍ଠରେ ପିଟି ହୋଇଥିଲା। ଏହି ଭୟଙ୍କର ଧକ୍କା ଯୋଗୁ ଭୂପୃଷ୍ଠରେ ଥିବା ପ୍ରାଚୀନ ଜୀବସତ୍ତା ବା ଜୈବିକ କାର୍ବନ ଅତି ଦ୍ରୁତ ଗତିରେ ପୃଥିବୀ ଗର୍ଭର ଗଭୀର ‘ମ୍ୟାଣ୍ଟଲ’ ସ୍ତରକୁ ଚାଲିଯାଇଥିଲା। ବିଜ୍ଞାନ ଭାଷାରେ ଏହାକୁ ‘ସବ୍ଡକ୍ସନ’ କୁହାଯାଏ। ପୃଥିବୀ ଗର୍ଭର ଅତ୍ୟଧିକ ଚାପ ଓ ଉତ୍ତାପ ଯୋଗୁ ସେହି କାର୍ବନ ସବୁ କଳା ହୀରାରେ ପରିଣତ ହୋଇଥିଲା। ଏହି ପ୍ରକ୍ରିୟା ଅତି ଦ୍ରୁତ ହୋଇଥିବାରୁ ହୀରା ଭିତରେ ଥିବା ସୂକ୍ଷ୍ମ ଛିଦ୍ରଗୁଡ଼ିକ ନଷ୍ଟ ନ ହୋଇ ରହିଯାଇଛି।
ବ୍ରାଜିଲର ‘ଟୋମ୍ବାଡୋର ଫର୍ମେଶନ’ରୁ ସଂଗୃହୀତ କାର୍ବୋନାଡୋକୁ ଏକ୍ସ-ରେ ଏବଂ ଇଲେକ୍ଟ୍ରୋନ ମାଇକ୍ରୋସ୍କୋପ ଦ୍ୱାରା ପରୀକ୍ଷା କରାଯାଇଥିଲା। ଏହାର କାଚ ପରି ଚକଚକିଆ ଉପରିଭାଗକୁ ପୂର୍ବରୁ ଉଲ୍କାପିଣ୍ଡର ପୋଡ଼ା ଅଂଶ ବୋଲି ଭାବି ନିଆଯାଉଥିଲା। ମାତ୍ର ଅଧ୍ୟୟନରୁ ଜଣାପଡ଼ିଛି ଯେ ହୀରା ନିର୍ମାଣ ହେବାର ବହୁ ପରବର୍ତ୍ତୀ ସମୟରେ ଭୂଗର୍ଭସ୍ଥ ତରଳ ପଦାର୍ଥ ପ୍ରବାହିତ ହୋଇ ଏହାର ବାହ୍ୟ ପୃଷ୍ଠକୁ ମସୃଣ ଓ ଚମକଦାର କରିଛି। ଯଦିଓ ଏହି ମହାଜାଗତିକ ଆଘାତର ସ୍ପଷ୍ଟ ପ୍ରମାଣୀକରଣ ପାଇଁ ଅଧିକ ଗବେଷଣା ଆବଶ୍ୟକ, ତଥାପି ଏହି ନୂତନ ସିଦ୍ଧାନ୍ତ କାର୍ବୋନାଡୋର ରହସ୍ୟମୟ ଗଠନ, ଜୈବିକ କାର୍ବନ୍ର ଉପସ୍ଥିତି ଏବଂ ଏହାର ଅନନ୍ୟ ବୈଶିଷ୍ଟ୍ୟକୁ ବୁଝିବାରେ ଏକ ବଡ଼ ସଫଳତା ଆଣିଦେଇଛି।
ସୂଚନାଥାଉ କି ଜାପାନର କାସୁଗାରେ ରହିଛି ‘ଗୋଣ୍ଡୱାନା ରିସର୍ଚ୍ଚ’ ପତ୍ରିକାର ମୁଖ୍ୟାଳୟ। ତେବେ ଏହାର ପ୍ରକାଶନ ଓ ବିତରଣ କାର୍ଯ୍ୟ ନେଦରଲାଣ୍ଡସ୍ର ଆମଷ୍ଟରଡାମ୍ସ୍ଥିତ ବିଶ୍ୱପ୍ରସିଦ୍ଧ ପ୍ରକାଶନ ସଂସ୍ଥା ଏଲସେଭିୟର ଦ୍ୱାରା ପରିଚାଳିତ ହୋଇଥାଏ।
