ନୂଆଦିଲ୍ଲୀ,୨୯।୮: ଦିଲ୍ଲୀର ଆମ ଆଦମୀ ପାର୍ଟି ସରକାର ସୋମବାର ବିଧାନସଭାରେ ବିଶ୍ୱାସ ପ୍ରସ୍ତାବ ଆଗତ କରିଛନ୍ତି। ବିଧାନସଭାରେ ଏହି ପ୍ରସ୍ତାବ ଉପସ୍ଥାପନ କରି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କେନ୍ଦ୍ର ସରକାର ଏବଂ ଭାଜପାକୁ ଟାର୍ଗେଟ କରିଛନ୍ତି। ସେ କହିଛନ୍ତି, ଆଜି ଆମେ ବିଧାନସଭାରେ ଆସ୍ଥା ଭୋଟ ଆଣିଛୁ, ଲୋକମାନେ ଏହାର ଆବଶ୍ୟକତା କ’ଣ ବୋଲି ପଚାରୁଛନ୍ତି। ଆସ୍ଥା ଭୋଟରେ ଆମକୁ ଏହା ଦର୍ଶାଇବାକୁ ପଡିବ ଯେ ଆମ ଆଦମୀ ପାର୍ଟିର କୌଣସି ବିଧାୟକ ଭାଜପା ଦ୍ୱାରା ବିକ୍ରି ହୋଇନାହାନ୍ତି। ସେମାନେ ସଚ୍ଚୋଟ। ଭାଜପା ଏଏପି ବିଧାୟକଙ୍କୁ କିଣିବାରେ ଫେଲ୍ ମାରିଛି।
ବିଦ୍ୟାଳୟରେ ନିର୍ମିତ ଶ୍ରେଣୀଗୃହରେ ଦୁର୍ନୀତି ଅଭିଯୋଗ ଉଠାଇ ଭାଜପା ବିଧାୟକମାନେ ସୋମବାର ବିଧାନସଭାରେ ହଙ୍ଗାମା କରିଥିଲେ। ଏହି ସମୟରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ୍ ଭାଜପା ବିଧାୟକଙ୍କ ମନୋଭାବକୁ ଦୃଢ ନିନ୍ଦା କରିଛନ୍ତି। ଭାଜପା ବିଧାୟକମାନେ ଆଲୋଚନା କରିବାକୁ ଚାହୁଁନାହାଁନ୍ତି, ସେମାନେ କେବଳ ଏକ ହଙ୍ଗାମା ସୃଷ୍ଟି କରିବା ଉଦ୍ଦେଶ୍ୟରେ ଗୃହକୁ ଆସନ୍ତି। ଆଜି ଦେଶରେ ମୁଦ୍ରାସ୍ଫୀତି ଚରମ ସୀମାରେ ପହଞ୍ଚିଛି, ଲୋକଙ୍କ ଘରେ ଖାଦ୍ୟ ରାନ୍ଧିବା କଷ୍ଟକର ହୋଇପଡିଛି। କେନ୍ଦ୍ର ସରକାର ପ୍ରତ୍ୟେକ କ୍ଷେତ୍ରରେ ଟିକସ ଲଗାଇଛନ୍ତି। କ୍ଷୀର, କଦଳୀ, ଶସ୍ୟ, ଡାଲି, ଚାଉଳ, ଚିନି ସବୁଥିରେ ଟିକସ ଲାଗୁଛି। ବ୍ରିଟିଶମାନେ ମଧ୍ୟ ଏସବୁ ଜିନିଷରେ ଟିକସ ଲଗାଇ ନ ଥିଲେ କିନ୍ତୁ କେନ୍ଦ୍ର ସରକାର ଏବେ ଏସବୁ ଜିନିଷରେ ଟିକସ ଲାଗୁ କରିଛନ୍ତି।
