ପାଲଲହଡ଼ା,୮ା୪ (ଦିବ୍ୟଜ୍ୟୋତି ଦାଶ): ୨୦୨୪ ନିର୍ବାଚନ ପାଇଁ ବିଭିନ୍ନ ରାଜନୈତିକ ଦଳ ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା ଜାରି ରହିଛି। ଅନୁଗୋଳ ଜିଲାର ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀ ପାଇଁ ଉଭୟ ବିଜେଡି ଓ ଭାଜପା ପକ୍ଷରୁ ପ୍ରାର୍ଥୀ ଘୋଷଣା ଶେଷ ହୋଇଛି। ବିଧାୟକ ମୁକେଶ ପାଲଙ୍କୁ ବିଜେଡି ଏଠାରେ ପୁନର୍ବାର ପ୍ରାର୍ଥୀ କରିଥିବା ବେଳେ ଭାଜପା ମଧ୍ୟ ସମାନ ପନ୍ଥା ଆପଣାଇଛି। ଭାଜପା ପକ୍ଷରୁ ଗତଥରର ପ୍ରାର୍ଥୀ ଅଶୋକ ମହାନ୍ତିଙ୍କୁ ଚଳିତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା ପାଇଁ ଟିକେଟ୍ ଦିଆଯାଇଛି। ତେବେ ବିଜେଡି ଓ ଭାଜପା ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା ପରେ କେତେଜଣ ଟିକେଟ୍ ଆଶାୟୀ ନିରାଶ ହୋଇଛନ୍ତି। ଏପରି କି ବିଜେଡି ଅସନ୍ତୁଷ୍ଟ ଗୋଷ୍ଠୀ ପ୍ରାର୍ଥୀ ମୁକେଶଙ୍କୁ ସହଯୋଗ କରୁ ନ ଥିବା ଆଲୋଚନାର ବିଷୟ ହୋଇଛି। ସେହିପରି ଭାଜପା ପ୍ରାର୍ଥୀ ଅଶୋକଙ୍କୁ ମଧ୍ୟ ଦଳର ଅସନ୍ତୁଷ୍ଟ ନେତା ଓ କର୍ମୀଙ୍କ ସହଯୋଗ ମିଳୁ ନ ଥିବା କୁହାଯାଉଛି। ଅସନ୍ତୁଷ୍ଟଙ୍କ ସମର୍ଥନ ବିନା ବିଜୟ ପଥ ସୁଗମ ହେବ ନାହିଁ ବୋଲି ଉଭୟ ବିଜେଡି ଓ ଭାଜପା ପ୍ରାର୍ଥୀ ଅବଗତ ଥିବାରୁ ଅସନ୍ତୁଷ୍ଟଙ୍କୁ ମନାଇବାକୁ ସେମାନେ ଉଦ୍ୟମ ଜାରି ରଖିଛନ୍ତି। ଅନ୍ୟପକ୍ଷରେ କଂଗ୍ରେସ ପ୍ରାର୍ଥୀ ଘୋଷଣାରେ ଏଠାରେ ପଛରେ ପଡ଼ିଛି। ଦଳ ଏଯାଏ ପ୍ରାର୍ଥୀଙ୍କ ନାମ ପ୍ରକାଶ କରି ନ ଥିବାରୁ ନେତାଙ୍କ ଠାରୁ ଆରମ୍ଭ କରି କର୍ମୀଙ୍କ ଯାଏ ଦ୍ୱନ୍ଦ୍ୱରେ ଥିବା ଦେଖିବାକୁ ମିଳୁଛି ।
ରାଜନୀତି ସମୀକ୍ଷକମାନଙ୍କ କହିବା ଅନୁଯାୟୀ, ରାଜ୍ୟ ବିଜେଡି ପକ୍ଷରୁ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ପ୍ରକାଶ କରାଯାଇଥିବା ବେଳେ ପାଲଲହଡ଼ା ପାଇଁ ବିଧାୟକ ମୁକେଶ ପାଲଙ୍କ ନାମ ଘୋଷଣା କରାଯାଇଥିଲା। ଫଳରେ ପାଲଲହଡ଼ା ବିଜେଡିର ଅନ୍ୟତମ ଟିକେଟ୍ ଆଶାୟୀ ନେତା ଅବନୀକାନ୍ତ ସାହୁଙ୍କୁ ନିରାଶ ହେବାକୁ ପଡ଼ିଥିଲା। ନିଜ ନେତାଙ୍କୁ ଟିକେଟ୍ରୁ ବଞ୍ଚିତ କରାଯାଇଥିବାରୁ ଅବନୀଙ୍କ ସମର୍ଥକମାନେ ଏହାକୁ ହଜମ କରିପାରି ନ ଥିଲେ। ଫଳରେ ସେମାନେ ବିଧାୟକ ତଥା ଦଳୀୟ ପ୍ରାର୍ଥୀ ମୁକେଶଙ୍କୁ ଆବଶ୍ୟକ ସହଯୋଗ କରୁ ନ ଥିବା ଚର୍ଚ୍ଚା ହେଉଛି। ସେହିପରି ଭାଜପା ପକ୍ଷରୁ ପାଲଲହଡ଼ାରୁ ଅଶୋକଙ୍କୁ ପ୍ରାର୍ଥୀ କରାଯିବା ପରେ ଆଶାୟୀ ନେତା ଶଶିଭୂଷଣ ଆଚାର୍ଯ୍ୟଙ୍କ ଗୋଷ୍ଠୀ ନିରାଶ ହୋଇଯାଇଛନ୍ତି। ତେଣୁ ଏହି ଅସନ୍ତୁଷ୍ଟ ଗୋଷ୍ଠୀ ଅଶୋକଙ୍କୁ ସମର୍ଥନ କରୁ ନ ଥିବା ଦେଖିବାକୁ ମିଳୁଛି। ଫଳରେ ଅସନ୍ତୁଷ୍ଟମାନଙ୍କୁ ନେଇ ଉଭୟ ବିଜେଡି ଓ ଭାଜପା ପ୍ରାର୍ଥୀ ଅଡ଼ୁଆ ପରିସ୍ଥିତିର ସମ୍ମୁଖୀନ ହେଉଛନ୍ତି। ଏପରି କି ନିଜ ନିଜ ଢଙ୍ଗରେ ଏହି ଦୁଇ ପ୍ରାର୍ଥୀ ନିର୍ବାଚନ ପ୍ରଚାର ଆରମ୍ଭ କରିଥିବାବେଳେ ଦଳ ମଧ୍ୟରେ ଲାଗି ରହିଥିବା ଗୋଷ୍ଠୀ କନ୍ଦଳ ସେମାନଙ୍କୁ ଚିନ୍ତାରେ ପକାଇଛି। ଏହି ଗୋଷ୍ଠୀ କନ୍ଦଳ ବା ବିବାଦର ଯଥାଶୀଘ୍ର ସମାଧାନ କରି ସମସ୍ତ ପୁରୁଣା କର୍ମୀଙ୍କୁ ନେଇ ନିର୍ବାଚନ ଲଢ଼ିବାକୁ ବିଜେଡି ଓ ଭାଜପା ପ୍ରାର୍ଥୀମାନଙ୍କୁ ରାଜ୍ୟସ୍ତରରୁ ନିର୍ଦ୍ଦେଶ ଆସିଥିବା ସୂଚନା ମିଳିଛି। ତେଣୁ ବିଜେଡି ପ୍ରାର୍ଥୀ ମୁକେଶ ଦଳର ଅସନ୍ତୁଷ୍ଟ ତଥା କୌଣସି କାରଣରୁ ଦଳ ଛାଡ଼ିଥିବା ବରିଷ୍ଠ ନେତାଙ୍କୁ ଦଳୀୟ କାର୍ଯ୍ୟକ୍ରମରେ ସାମିଲ କରୁଥିବା ବେଳେ ଆଉ କେତେଜଣ ଅସନ୍ତୁଷ୍ଟଙ୍କ ସହିତ ନିଜେ ଆଲୋଚନା କରି ସେମାନଙ୍କୁ ଦଳକୁ ଫେରାଇ ଆଣିବା ସହ ନିର୍ବାଚନରେ ସହଯୋଗ କରିବା ପାଇଁ ରଣନୀତି ପ୍ରସ୍ତୁତ କରୁଛନ୍ତି। ଭାଜପା ପ୍ରାର୍ଥୀ ଅଶୋକ ମଧ୍ୟ ଅସନ୍ତୁଷ୍ଟ ଥିବା କର୍ମୀ ଏବଂ ନେତାମାନଙ୍କୁ ଭେଟ କରି ସେମାନଙ୍କୁ ସନ୍ତୁଷ୍ଟ କରିବା ପାଇଁ ଚେଷ୍ଟା ଚଳାଇଛନ୍ତି।
ଅନ୍ୟପକ୍ଷରେ କଂଗ୍ରେସ ଗଡ଼ କୁହାଯାଉଥିବା ପାଲଲହଡା ନିର୍ବାଚନମଣ୍ଡଳୀରେ କଂଗ୍ରେସ ପୂରା ପଛରେ ପଡିଯାଇଛି। ଦଳ ବର୍ତ୍ତମାନ ସୁଦ୍ଧା ନିଜର ପ୍ରାର୍ଥୀ ଘୋଷଣା କରିପାରି ନାହିଁ, ଯାହା ଦଳୀୟ ନେତା ଏବଂ କର୍ମୀମାନଙ୍କୁ ଦ୍ୱନ୍ଦ୍ୱରେ ପକାଉଥିବା ଦେଖିବାକୁ ମିଳୁଛି। ଦଳର କେତେଜଣ ନେତା ଭୁବନେଶ୍ୱରରେ ଟିକେଟ ପାଇଁ ଡେରା ପକାଇଥିବାବେଳେ କର୍ମୀମାନେ ଆଶା ଆଶଙ୍କା ମଧ୍ୟରେ ଥିବା ଆଲୋଚନା ହେଉଛି।
