ବିଷମକଟକ,୯।୬(ଡି.ଏନ୍.ଏ.): ରାୟଗଡ଼ା ଜିଲା ବିଷମକଟକ ବ୍ଲକରେ ପ୍ରଥମ ଥର ପାଇଁ ଆରମ୍ଭ ହୋଇଛି ବାୟୋଫ୍ଲକ୍ ମାଛଚାଷ। ଏଥିରେ ପୋଖରୀ ବଦଳରେ ବିରାଟ ପାଣି ଟ୍ୟାଙ୍କ ମାଧ୍ୟମରେ ନୂତନ ପ୍ରଣାଳୀରେ ମାଛଚାଷ କରାଯାଉଛି। ରାଜ୍ୟ ସରକାରଙ୍କ ପକ୍ଷରୁ ମହିଳାମାନଙ୍କୁ ସ୍ବାବଲମ୍ବୀ କରିବା ଉଦ୍ଦେଶ୍ୟରେ ଓଡ଼ିଶା ଜୀବିକା ମିଶନ ଜରିଆରେ ଏହି ଚାଷ ଆରମ୍ଭ ହୋଇଛି।
ସଦର ପଞ୍ଚାୟତ ଅଧୀନସ୍ଥ ଢ଼େପାଗୁଡ଼ା ଗ୍ରାମର ଠାକୁରାଣୀ ମଞ୍ଚ ଗ୍ରୁପ୍ର ମାଁ ଗାୟତ୍ରୀ, ମାଁ ସନ୍ତୋଷୀ, ମାଁ ମଙ୍ଗଳା ଏବଂ ମାଁ ବାଞ୍ଜାରୀ ଏସ୍ଏଚ୍ଜିର ୪୦ ମହିଳାଙ୍କୁ ମାଛଚାଷରେ ନିୟୋଜିତ କରାଯାଇଛି। ପ୍ରଥମ ପର୍ଯ୍ୟାୟରେ ଏହି ବାୟୋଫ୍ଲକ୍ ମାଛଚାଷ ପାଇଁ ୪୦ ମହିଳାଙ୍କୁ ତାଲିମ ଦିଆଯାଇଛି। ଏହାପରେ ସେମାନଙ୍କୁ ଚାଷ ପାଇଁ ୫ ଲକ୍ଷ ଟଙ୍କା ପ୍ରଦାନ କରାଯାଇଛି। ଏହି ଟଙ୍କାରେ ୧୫ ହଜାର ଲିଟର ବିଶିଷ୍ଟ ୮ଟି ବିରାଟକାୟ ଟ୍ୟାଙ୍କ ସ୍ଥାପନ କରାଯାଇଛି। ଏଥିରେ ଅକ୍ସିଜେନ୍ ସୁବିଧା ପାଇଁ ଟ୍ୟାଙ୍କ୍ରେ ଦୁଇଟି ପଙ୍ଖା ଏବଂ ୪ଟି ବାୟୋଫ୍ଲକ୍ ମେଶିନ ଖଞ୍ଜାଯାଇଛି। ଏହି ମେଶିନ ସାହାଯ୍ୟରେ ମାଛମାନେ ଅକ୍ସିଜେନ ପାଇବେ। ପ୍ରତି ଟ୍ୟାଙ୍କ୍ରେ ୩ହାଜର ମାଛ ଯାଆଁଳ ଛଡ଼ାଯାଇଛି। ପ୍ରଥମ ବର୍ଷର ଚାଷ ପାଇଁ ଜୀବିକା ମିଶନ ପକ୍ଷରୁ ଅବଶ୍ୟକ ସମସ୍ତ ସାମଗ୍ରୀ ଯୋଗାଇ ଦିଆଯାଇଛି। ସେହିପରି ରକ୍ଷଣାବେକ୍ଷଣ ଦୟିତ୍ୱ ମଧ୍ୟ ଜୀବିକା ମିଶନ ନେଇଛି। ଆସନ୍ତା ବର୍ଷଠାରୁ ମହିଳା ଗୋଷ୍ଠୀ ନିଜ ଦାୟିତ୍ୱରେ ଏହି ମାଛଚାଷ କରିବେ। ବାୟୋଫ୍ଲକ୍ ମାଛଚାଷରୁ ମହିଳାମାନେ ୬୦ ହାଜରରୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଲାଭବାନ ହେବେ ବୋଲି କୁହାଯାଇଛି। ଏହାଦ୍ୱାରା ସେମାନଙ୍କ ଆର୍ଥିକ ସ୍ଥିତିରେ ଉନ୍ନତି ଘଟିବ। ଆଗାମୀ ଦିନରେ ଅନ୍ୟ ମହିଳା ଗୋଷ୍ଠୀଙ୍କୁ ମଧ୍ୟ ଏହି ମାଛଚାଷରେ ସାମିଲ କରାଯିବ। ଏଥିସହ ଏହି ନୂତନ ପ୍ରଣାଳୀରେ ଚିଙ୍ଗୁଡ଼ି ଚାଷ ପାଇଁ ମଧ୍ୟ ତାଲିମ ଦେବାକୁ ଯୋଜନା ରହିଥିବା ଓଡ଼ିଶା ଜୀବିକା ମିଶନର କ୍ଷେତ୍ର ପରିଦର୍ଶନ ଅଧିକାରୀ ବିଶ୍ୱଜିତ ସ୍ବାଇଁ ସୂଚନା ଦେଇଛନ୍ତି।
