ଲାହୋର,୧୨।୨: ପାକିସ୍ତାନ ସାଧାରଣ ନିର୍ବାଚନରେ କୌଣସି ଦଳକୁ ସ୍ପଷ୍ଟ ବହୁମତ ନ ମିଳି ଝୁଲା ପାର୍ଲାମେଣ୍ଟ ହୋଇଛି। ଫଳରେ ମେଣ୍ଟ ସରକାର ଗଢ଼ିବା ପାଇଁ ୩ ପ୍ରମୁଖ ଦଳ ରବିବାର ଜୋର୍ଦାର ଉଦ୍ୟମ ଚଳାଇଛନ୍ତି। ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ଦଳ ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିଆଇ) ସମର୍ଥତ୍ତ ପ୍ରାର୍ଥୀମାନେ ସର୍ବାଧିକ ୧୦୧ ଆସନରେ ଜିତିଥିଲେ ମଧ୍ୟ ଇମ୍ରାନ୍ଙ୍କୁ କ୍ଷମତାଠାରୁ ଦୂରେଇ ରଖିବା ପାଇଁ ଷଡ଼ଯନ୍ତ୍ର ଚାଲିଛି। ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ମୁସଲିମ୍ ଲିଗ୍-ନଓ୍ବାଜ (ପିଏମ୍ଏଲ୍-ଏନ୍) ଦଳର ଅଧ୍ୟକ୍ଷ ନଓ୍ବାଜ ଶରିଫ୍ଙ୍କ ପଛରେ ସୈନ୍ୟବାହିନୀର ସମର୍ଥନ ରହିଥିବାବେଳେ ମିଳିତ ସରକାର ଗଢ଼ିବା ପାଇଁ ସେନା ମୁଖ୍ୟ ଜେନେରାଲ ଅସିମ୍ ମୁନିର୍ ଶନିବାର ଆହ୍ବାନ ଦେଇଥିଲେ।
ମେଣ୍ଟ ସରକାର ଗଢ଼ିବା ପାଇଁ ପିଏମ୍ଏଲ୍-ଏନ୍ ଉଦ୍ୟମ ଚଳାଇଥିବାବେଳେ ରବିବାର ଲାହୋରଠାରେ ଏହାର ନେତାମାନେ ଏମ୍କ୍ୟୁଏମ୍-ପି ନେତାଙ୍କ ସହ ଆଲୋଚନା କରିଛନ୍ତି। ସେମାନେ ନୀତିଗତ ଭାବେ ଏକାଠି କାମ କରିବାକୁ ସହମତ ହୋଇଥିବା ଜଣାପଡ଼ିଛି। ପିଏମ୍ଏଲ୍-ଏନ୍ ନେତା ଶୋହବାଜ ଶରିଫ୍ ଶୁକ୍ରବାର ପାକିସ୍ତାନ ପିପୁଲ୍ସ ପାର୍ଟି (ପିପିପି) ନେତା ବିଲାଓ୍ବଲ ଭୁଟ୍ଟୋ ଜର୍ଦ୍ଦାରୀ ଏବଂ ଶନିବାର ଅସିଫ୍ ଅଲି ଜର୍ଦ୍ଦାରୀଙ୍କ ସହ ଆଲୋଚନା କରିଥିଲେ। ସମର୍ଥନ ବଦଳରେ ପିପିପି ନେତା ପ୍ରଧାନମନ୍ତ୍ରୀ ପଦ ଏବଂ ଗୁରୁତ୍ୱପୂର୍ଣ୍ଣ ମନ୍ତ୍ରୀ ପଦ ମାଗିଥିବା ଶେହବାଜ ତାଙ୍କ ଦଳୀୟ ନେତାମାନଙ୍କୁ କହିଛନ୍ତି। ତେବେ ପିଏମ୍ଏଲ୍-ଏନ୍ ପ୍ରଧାନମନ୍ତ୍ରୀ ପଦ ପିପିପିକୁ ଦେବା ପାଇଁ ରାଜି ନୁହେଁ। ପିପିପି ସହ ବୁଝାମଣା ବିଫଳ ହେଲେ ପିଏମ୍ଏଲ୍-ଏନ୍ ଅନ୍ୟ ଦଳ ମାନଙ୍କୁ ନେଇ ସରକାର ଗଢ଼ିପାରେ। ବର୍ତ୍ତମାନ ସ୍ଥିତିକୁ ଦୃଷ୍ଟିରେ ରଖି ଶେହବାଜଙ୍କୁ ପ୍ରଧାନମନ୍ତ୍ରୀ ଏବଂ ନଓ୍ବାଜଙ୍କ ଝିଅ ମାର୍ୟମ ଶରିଫଙ୍କୁ ପଞ୍ଜାବ ମୁଖ୍ୟମନ୍ତ୍ରୀ କରିବା ନେଇ ଆଲୋଚନା ହେଉଛି।
ଅନ୍ୟପକ୍ଷରେ ପିପିପିର ସମର୍ଥନ ବିନା କେହି କେନ୍ଦ୍ର, ପଞ୍ଜାବ କିମ୍ବା ବେଲୁଚିସ୍ତାନରେ ସରକାର ଗଢ଼ିପାରିବେ ନାହିଁ ବୋଲି ବିଲାଓ୍ବଲ କହିଛନ୍ତି। ଗତ ଗୁରୁବାର ପାକ୍ ନ୍ୟାଶନାଲ ଆସେମ୍ବ୍ଲି ପାଇଁ ମତଦାନ ହୋଇଥିବାବେଳେ ଫଳାଫଳ ଘୋଷଣାରେ ବିଳମ୍ବ ହେଉଥିବାରୁ ଏଥିରେ ଜାଲିଆତି ହେବା ନେଇ ବିଭିନ୍ନ ଦଳ ଅଭିଯୋଗ କରିବା ସହ ରାସ୍ତାକୁ ଓହ୍ଲାଇଥିଲେ। ରାଗିଂ ଅଭିଯୋଗ ମଧ୍ୟରେ ନିର୍ବାଚନ କମିଶନ ଭୋଟ ହୋଇଥିବା ୨୬୫ ଆସନ ମଧ୍ୟରୁ ୨୬୪ ଆସନରେ ଫଳାଫଳ ରବିବାର ପ୍ରକାଶ କରିଛନ୍ତି। ଜାଲିଆତି ଅଭିଯୋଗକୁ ନେଇ ଗୋଟିଏ ଆସନର ଫଳାଫଳ ଘୋଷଣା ହୋଇନାହିଁ। ୨୬୪ ଆସନରୁ ପିଟିଆଇ ସମର୍ଥତ୍ତ ସ୍ବାଧୀନ ପ୍ରାର୍ଥୀ ୧୦୧ ଆସନ ଜିତିଥିବାବେଳେ ପିଏମ୍ଏଲ୍-ଏନ୍କୁ ୭୫ ଏବଂ ବିଲାଓ୍ବଲ ଭୁଟୋ ଜର୍ଦ୍ଦାରୀଙ୍କ ପାକିସ୍ତାନ ପିପୁଲ୍ସ ପାର୍ଟି (ପିପିପି)କୁ ୫୪ ଆସନ ମିଳିଛି।
ମତଦାନରେ ଜାଲିଆତି ହୋଇଥିବା ଅଭିଯୋଗ କରି ଦେଶବ୍ୟାପୀ ରିଟର୍ନିଂ ଅଫିସରମାନଙ୍କ ବିରୋଧରେ ଶାନ୍ତିପୂର୍ଣ୍ଣ ଆନ୍ଦୋଳନ କରିବା ପାଇଁ ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିଆଇ) ଅଧ୍ୟକ୍ଷ ବାରିଷ୍ଟର ଗୋହର ଅଲି ଖାନ୍ ରବିବାର ଆହ୍ବାନ ଦେଇଛନ୍ତି। ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ଉପରେ ପାକିସ୍ତାନ ଜନସାଧାରଣ ପୂର୍ଣ୍ଣ ଆସ୍ଥା ପ୍ରକଟ କରିଥିବା ସେ କହିଛନ୍ତି। ଏକାଧିକ ଚ୍ୟାଲେଞ୍ଜର ସମ୍ମୁଖୀନ ହେବା ସତ୍ତ୍ୱେ ପିଟିଆଇ ସପକ୍ଷରେ ସ୍ପଷ୍ଟ ଓ ସ୍ବଚ୍ଛ ଜନାଦେଶ ଯାଇଛି। ରିଟର୍ନିଂ ଅଫିସରମାନେ ଜନାଦେଶକୁ ପ୍ରଭାବିତ କରିବା ପାଇଁ ଫଳାଫଳରେ ଜାଲିଆତି କରିବାକୁ ଉଦ୍ୟମ କରିଥିବାରୁ ଏହାକୁ ଗୋହର ନିନ୍ଦା କରିଛନ୍ତି।
