ପାଟନା, ୧୨।୭- ଅନେକ ଦିନ ଧରି ଫେରାର ଥିବା ଅପରାଧିଙ୍କ ଉପରେ ଚାପ ସୃଷ୍ଟି କରିବା ପାଇଁ ବିହାର ପୋଲିସ ଏକ ଅନନ୍ୟ ଉପାୟ ଅବଲମ୍ବନ କରିଛି। ଅପରାଧିଙ୍କୁ ଧରିବା ପାଇଁ ବିହାର ପୋଲିସ ପକ୍ଷରୁ ବ୍ୟାଣ୍ଡ୍, ବାଜା ଇତ୍ୟାଦି ବାହାଘର ଉପକରଣ ବ୍ୟବହାର କରୁଥିବା ଦେଖିବାକୁ ମିଳିଛି। ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ଭିଡିଓରେ ଦେଖିବାକୁ ମିଳିଛି ଯେ, ବହୁଦିନ ଧରି ପଳାତକ ଥିବା ଜଣେ ଅପରାଧିଙ୍କ ଘରେ ପୋଲିସ ବ୍ୟାଣ୍ଡ୍, ବାଜା ବଜାଇ ପହଞ୍ଚତ୍ଥିଲା। ଏହାପରେ ପୋଲିସ ପକ୍ଷରୁ ଏକ ନୋଟିସ ଅପରାଧିଙ୍କ ଘର କାନ୍ଥରେ ଲଗାଯାଇଥିଲା। ଯେଉଁଥିରେ ଯଥାଶୀଘ୍ର ଆତ୍ମସମର୍ପଣ କରିବା ପାଇଁ କୁହାଯାଇଛି। ପୋଲିସ ଯେଉଁଭଳି ବ୍ୟାଣ୍ଡ୍ ବଜାଇ ଅପରାଧିଙ୍କ ଘରକୁ ଆସିଥିଲା ତାହା ଗ୍ରାମବାସୀଙ୍କ ଦୃଷ୍ଟି ମଧ୍ୟ ଆକର୍ଷିତ କରିଥିଲା। ଏହି ଘଟଣାଟି ଭାଗଲପୁର ଜିଲା ମାଡଓ୍ବା ଗ୍ରାମର ବୋଲି ଜଣାପଡ଼ିଛି। ଏହି ଗ୍ରାମର ଚନ୍ଦନ ଯାଦବ ନାମକ ଜଣେ ଅପରାଧି ବହୁଦିନ ହେବ ଫେରାର ରହିଛି। ପୋଲିସ ପକ୍ଷରୁ କୁହାଯାଇଛି ଯେ, ଚନ୍ଦନ ଯଦି ଏହି ନୋଟିସକୁ ପାଳନ ନ କରି ନିର୍ଦ୍ଧାରିତ ସମୟ ମଧ୍ୟରେ ଆତ୍ମସମର୍ପଣ କରିବେନି ତେବେ ତାଙ୍କ ସମ୍ପତ୍ତି ବ୍ୟାଜାପ୍ତି କରିବା ପାଇଁ କୋର୍ଟର ଦ୍ୱାରସ୍ଥ ହେବ।
