ନୂଆଦିଲ୍ଲୀ, ୬।୭(ପି.ଟି.): ଭାରତରେ ପ୍ରତିଭାସମ୍ପନ୍ନ ଖେଳାଳିଙ୍କ ଅଭାବ ନାହିଁ। ଏକ ପେସାଦାର ବାସ୍କେଟବଲ ଲିଗ୍ ହୋଇପାରିଲେ ଖେଳାଳିଙ୍କ ପ୍ରଦର୍ଶନ ଅଧିକ ମାର୍ଜିତ ହୋଇପାରିବ ବୋଲି ଅନୁଭବ କରୁଛନ୍ତି ଭାରତୀୟ ବାସ୍କେଟବଲ ଅଧିନାୟକ ବିଶେଷ ଭୃଗୁବଂଶୀ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ସଫଳତା ପରେ ଏବେ ବ୍ୟାଡ୍ମିଣ୍ଟନ, ରେସ୍ଲିଂ ଓ କବାଡ଼ି ଆଦି କ୍ରୀଡ଼ାରେ ଲିଗ୍ ଆରମ୍ଭ ହୋଇଛି। ଅଧିକାଂଶ ଲିଗ୍୍ ଲୋକପ୍ରିୟ ହେବା ସହ ଭାରତରେ କ୍ରୀଡ଼ାର ମାନରେ ଉନ୍ନତି ଘଟିଛି। ଜାତୀୟ ଖେଳାଳିମାନେ ଅନ୍ତର୍ଜାତୀୟ ସର୍କିଟରେ ଚମତ୍କାର ପ୍ରଦର୍ଶନ କରି ପାରୁଛନ୍ତି। ତେଣୁ ବାସ୍କେଟବଲରେ ଏକ ଲିଗ୍ ନିହାତି ଆବଶ୍ୟକ ବୋଲି ଭୃଗୁବଂଶୀ କହିଛନ୍ତି। ଲିଗ୍ରେ ବିଦେଶୀ ଖେଳାଳିଙ୍କୁ ମଧ୍ୟ ଅନ୍ତର୍ଭୁକ୍ତ କରାଯିବା ଉଚିତ। ଏହାଦ୍ୱାରା ଆମ ପିଲାମାନେ ଅନେକ କିଛି ଶିଖିପାରିବେ ବୋଲି ଦଶନ୍ଧିଧରି ଭାରତୀୟ ଦଳର ନେତୃତ୍ୱ ନେଇ ଆସୁଥିବା ଏହି ତାରକା ଖେଳାଳି ପ୍ରକାଶ କରିଛନ୍ତି। ବିଦେଶୀ ଖେଳାଳିଙ୍କ ସହ ଆମର ଧାରଣା ଓ କୌଶଳ ବିନିମୟ ଦ୍ୱାରା ଭାରତୀୟ ଖେଳାଳିଙ୍କ ମାନସିକତାରେ ପରିବର୍ତ୍ତନ ଆସିପାରିବ ବୋଲି ୨୯ ବର୍ଷୀୟ ବାରାଣସୀର ଭୃଗୁବଂଶୀ କହିଛନ୍ତି। ପ୍ରଥମ ଭାରତୀୟ ଖେଳାଳିଭାବେ ଭୃଗୁବଂଶୀ ୨୦୧୭ରେ ଅଷ୍ଟ୍ରେଲିଆର ଜାତୀୟ ବାସ୍କେଟବଲ ଲିଗ୍(ଏବିଏଲ)ରେ ଖେଳିବାକୁ ଚୁକ୍ତିବଦ୍ଧ ହୋଇଥିଲେ। ସେ ଆଡିଲେଡରେ ଟ୍ରେନିଂ ନେବାକୁ ପ୍ରସ୍ତୁତ ହେଉଥିବାବେଳେ ଭାଗ୍ୟ ସାଥ୍ ଦେଇ ନ ଥିଲା। ଆଣ୍ଠୁରେ ଆଘାତ ଯୋଗୁ ସେ ଲିଗ୍ରେ ଖେଳିପାରି ନ ଥିଲେ। ସୁସ୍ଥ ହେବାପରେ ସେ ଭାରତ ପାଇଁ ଏସିଆନ ଓ ଅଲିମ୍ପିକ କ୍ୱାଲିଫାୟରକୁ ପ୍ରାଥମିକତା ଦେଇ ପରେ ଅଷ୍ଟ୍ରେଲିଆ ଯିବାକୁ ମନସ୍ଥ କରିଥିଲେ। ମାତ୍ର କରୋନା ଭାଇରସ ସଂକ୍ରମଣ ଯୋଗୁ ତାହା ସମ୍ଭବ ହୋଇ ନ ଥିଲା।
