ନୂଆଦିଲ୍ଲୀ,୨୬ ।୨: କନଫେଡେରେଶନ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ(ସିଏଆଇଟି) ପକ୍ଷରୁ ଶୁକ୍ରବାର ଭାରତ ବନ୍ଦ ଡାକରା ଦିଆଯାଇଛି । ଜିଏସ୍ଟି ଜଟିଳତା ଓ ଇ-କମର୍ସକୁ ନେଇ ବ୍ୟବସାୟୀମାନେ ଅତିଷ୍ଠ ହୋଇପଡିବା ପରେ ଏହି ବନ୍ଦ ଡାକରା ଦିଆଯାଇଛି । ଏବେ ପର୍ଯ୍ୟନ୍ତ ସାରା ଦେଶରେ ଏହି ବନ୍ଦର ମିଶ୍ରିତ ପ୍ରଭାବ ଦେଖିବାକୁ ମିଳିଛି । କିଛି ବ୍ୟବସାୟୀ ସଙ୍ଗଠନ ଏଥିରେ ସାମିଲ ହୋଇ ନ ଥିବା ଜଣାପଡିଛି । ହେଲେ ସିଏଆଇଟି ପକ୍ଷରୁ ଦାବି କରାଯାଇଛି କି ଦିଲ୍ଲୀ ସହିତ ସାରା ଦେଶରେ ୪୦ ହଜାରରୁ ଅଧିକ ବ୍ୟବସାୟ ସଙ୍ଗଠନର ୮କୋଟିରୁ ଅଧିକ ବ୍ୟବସାୟୀ ଏହି ବନ୍ଦକୁ ସମର୍ଥନ ଜଣାଇଛନ୍ତି । ଅନ୍ୟପଟେ କେନ୍ଦ୍ର ସରକାରକଙ୍କ ନୂଆ କୃଷି ଆଇନକୁ ବିରୋଧ କରି ଦିଲ୍ଲୀ ସୀମାରେ ଆନ୍ଦୋଳନରେ ବସିଥିବା କୃଷକମାନେ ବି ଏହାକୁ ସମର୍ଥନ ଜଣାଇଛନ୍ତି । ଅଲ୍ ଇଣ୍ଡିଆ ଟ୍ରାନ୍ସପୋର୍ଟ ୱେଲଫେୟାର ଆସୋସିଏଶନ(ଏଆଇଟିଡବ୍ଲୁଏ) ମଧ୍ୟ ଏହି ଭାରତ ବନ୍ଦକୁ ସମର୍ଥନ କରିଛି । କିଛି ସ୍ଥାନରେ ଗାଡି ମଟର ଚାଲୁଥିବା ବେଳେ ବ୍ୟବସାୟ ପ୍ରତିଷ୍ଠାନମାନ ବନ୍ଦ ଥିବା ଲକ୍ଷ୍ୟ କରାଯାଇଛି ।
