ଭଞ୍ଜନଗର,୧୯। ୫(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ମଙ୍ଗଳବାର ୨୪ ଦିନରେ ପହଞ୍ଚିଛି। ଆଜି ସଂଧ୍ୟା ୭ ଟା ୩୦ ମିନିଟରେ ବ୍ୟାଘ୍ରଦେବୀ ଏବଂ ଠାକୁରାଣୀଙ୍କ ସଂଧ୍ୟା ଆଳତି ହୋଇଥିଲା। ଏହି ସମୟରେ ଯାତ୍ରା କମିଟି ମୁଖ୍ୟ ଉପଦେଷ୍ଟା ତଥା ବିଧାୟକ ପ୍ରଦ୍ୟୁମ୍ନ କୁମାର ନାୟକ, ଉପ ଜିଲ୍ଲାପାଳ ତଥା ଯାତ୍ରା କମିଟି ମୁଖ୍ୟ ଉମା ଶଙ୍କର ବେହେରା, ଯାତ୍ରା କମିଟି ସଭାପତି ରାଜେନ୍ଦ୍ର ବିଷୋୟୀ, ସଂପାଦକ ସୁଶାନ୍ତ ମାହାପାତ୍ର, ସୁଧୀର ରଞ୍ଜନ ବେହେରା, କୋଷାଧକ୍ଷ ମହେଶ୍ୱର ପାତ୍ର, ମ୍ୟୁନିସିପାଲଟି ଅଧକ୍ଷ ଗୋପବନ୍ଧୁ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ଏହାପରେ ବ୍ୟାଘ୍ର ଦେବୀ ସିଂହ ବାହିନୀ ବେଶରେ ରାତି ୧୦ ଟାରେ ନଗର ଭ୍ରମଣରେ ବାହାରିଥିଲେ।
ଦେବୀ ତହସିଲ ଅଫିସ ଛକ ପର୍ଯ୍ୟନ୍ତ ଯିବେ। ସେଠାରୁ ପୁଣି ପଶ୍ଚିମ ମୁଖା ହୋଇ ଫେରି ପୁଜା ମଣ୍ଡପ ନିକଟରେ ପହଞ୍ଚିବେ। ସେଠାରେ ଦେବୀ ସିଂହ ଉପରେ ହିଁ ବସି ରହିବେ। ଏହାପରେ ସେଠାରେ ବଡକୋଦଣ୍ଡାର ମହାଭାରତ, ମୁଜାଗଡର କଂସବଧ ଏବଂ କୃଷ୍ଠ ଦଧିମନ୍ଥନ ନାଟକ ପରିବେଷଣ ହେବ। ବୁଧବାର ନାଟକ ସରିବା ପରେ ସଂନ୍ଧ୍ୟାରେ ଦେବୀଙ୍କ ବାହୁଡ଼ା ଯାତ୍ରା ହେବ। ତେଣୁ ଉଭୟ ଦେବୀଙ୍କୁ ବନ ବିଭାଗ ଡାକ ବଙ୍ଗଳା ପର୍ଯ୍ୟନ୍ତ ନିଆଯିବ। ସେଠାରେ ଭେଟ ଯାତ୍ରା ଅନୁଷ୍ଟିତ ହେବାପରେ ବ୍ୟାଘ୍ର ଦେବୀଙ୍କୁ କୁଲାଡ ଶୋଭାଯାତ୍ରାରେ ନିଆଯିବ। ସେଠାରେ ଦେବୀ ସ୍ଥାୟୀ ମନ୍ଦିରରେ ବିଶ୍ରାମ ନେବେ। ସେହିଭଳି ଦେବୀ ଠାକୁରାଣୀ ବନବିଭାଗ ଡାକବଙ୍ଗଳାରୁ ପଛକୁ ଫେରି ସ୍ଥାୟୀ ମନ୍ଦିରକୁ ଫେରିବେ। ଏହାପରେ ଆସନ୍ତାକାଲି ଆନୁଷ୍ଠାନିକ ଭାବେ ଯାତ୍ରା ଉଦଯାପିତ ହେବ।
ଏହାପରେ ପୁଣି ୩ ବର୍ଷ ପରେ ୨୦୨୯ ରେ ଯାତ୍ରା ହେବ। ସେହିଭଳି ମଙ୍ଗଳବାର ସନ୍ଧ୍ୟାରେ କବି ସମ୍ରାଟ ରଙ୍ଗମଞ୍ଚରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା। ଉକ୍ତ କାର୍ଯ୍ୟକ୍ରମକୁ ଯାତ୍ରା କମିଟି କାର୍ଯ୍ୟକାରି ସଭାପତି ବିଷ୍ଠୁ ପ୍ରସାଦ ପ୍ରଧାନ ସଂଯୋଜନା କରିଥିଲେ। ଅପରପକ୍ଷେ ଆଜି ଯାତ୍ରାରେ ସହଯୋଗ ପାଇଁ କୁଲାଡ ବ୍ୟାଘ୍ରଦେବୀଙ୍କ ସମେତ କିଛି କର୍ମକର୍ତ୍ତାକୁ ବିଧାୟକ ଉତ୍ସାହିତ କରିଥିଲେ। ଆଉ ଦିନକ ପରେ ଯାତ୍ରା ଉଦଯାପିତ ହେବାକୁ ଯାଉଥିବା ବେଳେ ଆଜି ସୁଦ୍ଧା ଦେବୀଙ୍କ କୃପାରୁ ଯାତ୍ରା ଶାନ୍ତି ଶୃଙ୍ଖଳାର ସହ ଚାଲିଛି।
