ମୁମ୍ବାଇ,୧୬ା୧୧(ପି.ଟି.) ଇଂଲଣ୍ଡ ଫୁଟ୍ବଲ ତାରକା ଡେଭିଡ୍ ବେକ୍ହାମ ପ୍ରଥମ ଥର ଭାରତ ଗସ୍ତରେ ରହିଥିବା ବେଳେ ଦିନିକିଆ କ୍ରିକେଟ ବିଶ୍ୱକପ୍ ୨୦୨୩ର ପ୍ରଥମ ସେମିଫାଇନାଲ ଦେଖିଥିଲେ। ଏହାର ଗୋଟିଏ ଦିନ ପରେ ବିସିସିଆଇ ପକ୍ଷରୁ ବେକ୍ହାମଙ୍କ ଏକ ଭିଡିଓ ରିଲିଜ୍ କରାଯାଇଛି। ଏହି ଭିଡିଓରେ ସେ ଓ୍ବାଙ୍ଖଡେ ଷ୍ଟାଡିୟମର ଦର୍ଶକଙ୍କୁ ବେଶ୍ ପ୍ରଶଂସା କରିଛନ୍ତି। ଓ୍ବାଙ୍ଖଡେର ଦର୍ଶକୀୟ ଅନୁଭୂତିକୁ ସେ ଅନନ୍ୟ ବୋଲି ବର୍ଣ୍ଣନା କରିଛନ୍ତି। ଏହି ମ୍ୟାଚ ଦେଖିବା ପୂର୍ବରୁ କେବଳ ଫୁଟ୍ବଲରେ ଦର୍ଶକଙ୍କ ଏଭଳି ରୂପ ଦେଖିଥିଲି। ତେବେ ଏହି ମ୍ୟାଚ ଦେଖିବା ପରେ ମୁଁ ବର୍ତ୍ତମାନ ଦ୍ୱନ୍ଦ୍ୱରେ ରହିଛି ବୋଲି ବେକ୍ହାମ ଭିଡିଓରେ କହିଛନ୍ତି।
ଭାରତୀୟ କ୍ରିକେଟର କିମ୍ବଦନ୍ତୀ ସଚିନ ତେନ୍ଦୁଲକରଙ୍କ ସହିତ ଗ୍ରାଉଣ୍ଡରେ ପ୍ରବେଶ କରିବା ସମୟରେ ଦର୍ଶକ ଯେଉଁଭଳି ଚିୟର କରୁଥିଲେ ତାହା ଫୁଟବଲ ମ୍ୟାଚକୁ ମଧ୍ୟ ପଛରେ ଛାଡିଦେବା ଭଳି ଥିଲା। ଓ୍ବାଙ୍ଖଡେର ଏହି ମାହୋଲ ତାଙ୍କ ପାଇଁ ଲୋମଟାଙ୍କୁରା ମୁହୂର୍ତ୍ତ ଥିଲା ବୋଲି ମାଞ୍ଚେଷ୍ଟର ୟୁନାଇଟେଡ ଓ ରିୟଲ ମାଡ୍ରିଡ୍ର ପୂର୍ବତନ ତାରକା ପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ ଯେ, ୟୁନିସେଫ୍ର ଗୁଡ୍ଓ୍ବିଲ ଆମ୍ବାସାଡର ଭାବରେ ଭାରତ ଗସ୍ତରେ ରହିଛନ୍ତି ଡେଭିଡ୍ ବେକ୍ହାମ୍। ବୁଧବାର ଖେଳାଯାଇଥିବା ମ୍ୟାଚ୍ରେ ବିରାଟ କୋହଲି ଐତିହାସିକ ୫୦ ତମ ଶତକ ହାସଲ କରିଥିବା ବେଳେ ପୂର୍ବତନ ଭାରତୀୟ ଅଧିନାୟକଙ୍କ ଲୋକପ୍ରିୟତା ଦେଖି ବିମୋହିତ ହୋଇଥିଲେ ବେକ୍ହାମ୍।
ପ୍ରଥମ ଇନିଂସରେ କୋହଲିଙ୍କ ବ୍ୟାଟିଂ ଦେଖିବା ପରେ ସେ ଏକ ଐତିହାସିକ ମୁହୂର୍ତ୍ତ ଉପଭୋଗ କରିବାର ସୁଯୋଗ ପାଇଲେ ବୋଲି କହିଥିଲେ। ଯଦିଓ ମୁଁ ସଚିନଙ୍କ ସହିତ ଅଧିକ ସମୟ ବିତେଇଥିଲି ତେବେ କୋହଲିଙ୍କ ବ୍ୟାଟିଂ ଷ୍ଟାଡିୟମରେ ଏକ ଭିନ୍ନ ମାହୋଲ ତିଆର କରିଥିଲା ବୋଲି ବେକ୍ହାମ ମ୍ୟାଚ୍ ପରେ କହିଥିଲେ।
