ନୂଆଦିଲ୍ଲୀ, ୧୯।୮: ଭାରତୀୟ କ୍ରିକେଟ୍ ଦଳର ସବୁଠାରୁ ସଫଳ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ଅଗଷ୍ଟ ୧୫ ତାରିଖ ସନ୍ଧ୍ୟାରେ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ଗ୍ରହଣ ନେଇ ଘୋଷଣା କରିଥିଲେ। ଦେଶ ପାଇଁ ୩ଟି ଆଇସିସି ଟ୍ରଫି ଜିତିଥିବା ଧୋନୀଙ୍କ ଏହି ନିଷ୍ପତ୍ତିକୁ ତାଙ୍କର କୋଟି କୋଟି ପ୍ରଶଂସକ ସହଜେ ବିଶ୍ୱାସ କରିପାରୁ ନାହାନ୍ତି। କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ପରି ଧୋନୀ ମଧ୍ୟ ପଡ଼ିଆରୁ ଅବସର ନିଅନ୍ତୁ ବୋଲି ଅନେକ ମତ ରଖିଥିଲେ। ଧୋନୀଙ୍କୁ ମଧ୍ୟ ବିଦାୟୀ ମ୍ୟାଚ୍ ଖେଳିବାରୁ ସୁଯୋଗ ଦିଆଯାଉ ବୋଲି ଚାରିଆଡ଼ୁ ସ୍ବର ଉଠିଛି। ଏପରିକି ବହୁ ପୂର୍ବତନ କ୍ରିକେଟର୍ ଧୋନୀଙ୍କ ପାର୍ଇ ବିଦାୟୀ ମ୍ୟାଚ୍ ସପକ୍ଷରେ ରହିଛନ୍ତି।
ଗଣମାଧ୍ୟମରେ ପ୍ରକାଶିତ ରିପୋର୍ଟ ମୁତାବକ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ମଧ୍ୟ ଧୋନୀଙ୍କ ପାଇଁ ବିଦାୟୀ ମ୍ୟାଚ୍ ଆୟୋଜନ କରିବା ନେଇ ଚିନ୍ତା କରୁଛି। ବିସିସିଆଇର ଜୈନିକ ଅଧିକାରୀ କହିଛନ୍ତି, ‘ଆଗାମୀ ଆଇପିଏଲ୍ ସମୟରେ ଏନେଇ ଧୋନୀଙ୍କ ସହ ଆଲୋଚନା କରାଯିବ। ଏହାପରେ ପରବର୍ତ୍ତୀ କାର୍ଯ୍ୟକ୍ରମ ସ୍ଥିର କରାଯିବ। ବର୍ତ୍ତମାନ କୌଣସି ଅନ୍ତର୍ଜାତୀୟ ସିରିଜ ନାହିଁ। ଆଇପିଏଲ୍ ପରେ ଧୋନୀଙ୍କ ପାଇଁ ବିଦାୟୀ ମ୍ୟାଚ୍ ଆୟୋଜନ କରାଯାଇପାରେ। ଧୋନୀଙ୍କ ପାଇଁ ବିଦାୟୀ ମ୍ୟାଚ୍ ଆୟୋଜନ କରିବା ସପକ୍ଷରେ ବୋର୍ଡ ମଧ୍ୟ ରହିଥିଲା। କିନ୍ତୁ ଧୋନୀ ହଠାତ୍ ଅବସର ନେଇ ସମସ୍ତଙ୍କୁ ଚକିତ କରିଦେଲେ। ଆଇପିଏଲ୍ ସମୟରେ ଏନେଇ ଧୋନୀଙ୍କ ସହ ଆଲୋଚନା କରାଯିବ। ଧୋନୀଙ୍କୁ ସମ୍ମାନିତ କରିବା ବିସିସିଆଇ ପାଇଁ ସମ୍ମାନର କଥା ହେବ’ ବୋଲି ଏହି ଅଧିକାରୀଜଣଙ୍କ କହିଛନ୍ତି।
