ଢାକା, ୩୦।୪: ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ବାଂଲାଦେଶ ଯୁଦ୍ଧ ପାଇଁ ପ୍ରସ୍ତୁତି ଆରମ୍ଭ କରିଥିବା ରିପୋର୍ଟ ପ୍ରକାଶ ପାଇଛି। ଏକ ସାମ୍ପ୍ରତିକ ଖବର ଅନୁଯାୟୀ, ବାଂଲାଦେଶ ସେନା ମୁଖ୍ୟ ଜେନେରାଲ ଓାକାର ଉଜ ଜମାନ ନିକଟରେ ଅନେକ ସେନା ଅଧିକାରୀଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି। ଏହି ବୈଠକରେ ବାଂଲାଦେଶ ସେନା ମିଆଁମାର ସୈନ୍ୟବାହିନୀ ବିରୋଧରେ ଆରାକାନ ଆର୍ମୀର ସାମରିକ ଅଭିଯାନକୁ ସମର୍ଥନ କରିବା ପାଇଁ ଲଜିଷ୍ଟିକ ଓ ସାମଗ୍ରୀ ସହାୟତା ଯୋଗାଇବାର ଯୋଜନା ଉପରେ ଆଲୋଚନା ହୋଇଥିବା ଜଣାପଡିଛି।
ରିପୋର୍ଟ ଅନୁଯାୟୀ, ବାଂଲାଦେଶର ବରିଷ୍ଠ ସେନା ଅଧିକାରୀମାନେ ଆରାକାନ ଆର୍ମୀକୁ ସମର୍ଥନ କରିବା ପାଇଁ ଦୀର୍ଘମିଆଦୀ ଯୋଜନା ପ୍ରସ୍ତୁତ କରୁଛନ୍ତି। ଏହା ଭାରତ ପାଇଁ ଚିନ୍ତାର କାରଣ ହୋଇପାରେ ବୋଲି ବିଶ୍ଲେଷକମାନେ ମତ ଦେଇଛନ୍ତି, କାରଣ ଏହା ଦକ୍ଷିଣ ଏସିଆରେ ଭୂ-ରାଜନୈତିକ ସ୍ଥିତିକୁ ଆହୁରି ଜଟିଳ କରିପାରେ। ଏକ ସୂଚନା ଅନୁଯାୟୀ, ବାଂଲାଦେଶର ଏହି ପଦକ୍ଷେପ ଆଞ୍ଚଳିକ ରାଜନୀତି ଏବଂ ମିଆଁମାରରେ ଚାଲିଥିବା ଅଶାନ୍ତି ସହ ଜଡିତ। ତେବେ, ଏହି ରିପୋର୍ଟ ସମ୍ପର୍କରେ ବାଂଲାଦେଶ ସରକାର ବା ସେନା ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ବିବୃତି ଜାରି ହୋଇନାହିଁ।
ବର୍ତ୍ତମାନ ଭାରତ ଓ ପାକିସ୍ତାନ ମଧ୍ୟରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ନେଇ ଉତ୍ତେଜନା ଲାଗି ରହିଛି। ଏହି ପରିପ୍ରେକ୍ଷୀରେ ବାଂଲାଦେଶର ଏହି ପ୍ରସ୍ତୁତି ଆଞ୍ଚଳିକ ସ୍ଥିରତା ଉପରେ ପ୍ରଭାବ ପକାଇପାରେ ବୋଲି ଆଶଙ୍କା କରାଯାଉଛି। ଆଗକୁ ଏହି ଘଟଣାକ୍ରମ କିପରି ଆଗେଇବ, ତାହା ଉପରେ ସମସ୍ତଙ୍କ ନଜର ରହିଛି।
