ଭୋଗରାଇ,୧୦।୯(ପ୍ରଦୀପ ଦାସ): ଘନଘନ ଲଘୁଚାପ ଓ ପାଗ ଅନୁକୁଳ ଥିବାରୁ ସମୁଦ୍ରରେ ଇଲିସି ଉପକୂଳ ମୁହାଁ ହେଉଛନ୍ତି। ଚଳିତ ବର୍ଷାଋତୁରେ ଟ୍ରଲର ମାଲିକ ଓ ମତ୍ସ୍ୟଜୀବୀଙ୍କ ଜାଲରେ ଇଲିସି ଧରାପଡୁଛନ୍ତି। ମାଛ ଖାଉଥିବା ଲୋକଙ୍କ ଇଲିସି ପ୍ରତି ଦୁର୍ବଳତା ରହିଥିବାବେଳେ ସମୁଦ୍ରରେ ଆଶାତୀତ ଇଲିସି ପଡୁଥିବାରୁ ଟ୍ରଲର ମାଲିକ ଓ ମତ୍ସ୍ୟଜୀବୀ ଖୁସିବ୍ୟକ୍ତ କରିଛନ୍ତି।
ତେବେ ଦୁର୍ଗାପୂଜା ନିକଟତର ହେଉଥିବାବେଳେ ବାଂଲାଦେଶ ସରକାର ଭାରତକୁ ପଦ୍ମା ହିଲ୍ଶା ବା ଇଲିଶି ରପ୍ତାନି ଉପରେ କଟକଣା ଲଗାଇଛନ୍ତି। ସ୍ଥାନୀୟ ଗ୍ରାହକଙ୍କ ପାଇଁ ପର୍ଯ୍ୟାପ୍ତ ଇଲିଶି ମାଛର ଯୋଗାଣକୁ ନିଶ୍ଚିତ କରିବାକୁ ସରକାର ଏହି ନିଷ୍ପତ୍ତି ନେଇଛନ୍ତି। ଅନ୍ୟ ଦେଶକୁ ରପ୍ତାନି କରିବା ପୂର୍ବରୁ ଦେଶବାସୀଙ୍କ ପାଇଁ ଯଥେଷ୍ଟ ପରିମାଣରେ ଇଲିଶି ମାଛ ମହଜୁଦ୍ ରହୁ ବୋଲି ସରକାରଙ୍କ ପ୍ରାଥମିକତା ରହିଛି। ତେଣୁ ଭାରତକୁ ଇଲିଶି ରପ୍ତାନି ବନ୍ଦ କରିବାକୁ ବାଣିଜ୍ୟ ମନ୍ତ୍ରଣାଳୟକୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି।
ଏଭଳି ସ୍ଥିତିରେ ଗଭୀର ସମୁଦ୍ରରେ ମତ୍ସ୍ୟଜୀବୀମାନେ ଜୀବନକୁ ବାଜି ଲଗାଇ ଇଲିସି ତାଲାସୀ ଜାରି ରଖିଛନ୍ତି।ଲଘୁଚାପର ଝିପିଝିପି ବର୍ଷା ଓ ପୂର୍ବାଳୀ ବତାସ ଓ ସୂର୍ଯ୍ୟ ଓ ମେଘର ଲୁଚକାଳି ଖେଳରେ ପାଗ ଅନୁକୁଳ ରହିଛି। ବଙ୍ଗୋପସାଗର ଉପକୂଳ ମିଆଁମାର ଓ ବାଂଲାଦେଶ ଗଭୀର ସମୁଦ୍ରରୁ ଚାଣଚାଣ ଇଲିସି ଭାରତ ଉପକୂଳ ନଦୀ ମୁହାଣକୁ ମଧୁର ଜଳ ପାନ କରିବାକୁ ଆସୁଥିବାବେଳେ ମତ୍ସ୍ୟଜୀବୀଙ୍କ ଜାଲରେ ଧରାଦେଉଛନ୍ତି।
ବାଲେଶ୍ୱର ଉପକୂଳ ଉଦୟପୁର,ତାଳସାରୀ,ରଣସିଂପୁର, କୀର୍ତ୍ତନିଆ,ଚୌମୁଖ,ଡଗରା,ବାହାବଳପୁର,କଷାଫଳ ସହିତ ପଶ୍ଚିମବଙ୍ଗ ଦୀଘା, ଶଙ୍କରପୁର, ଚାନ୍ଦପୁର, ମନ୍ଦାରମଣୀ, ଜୁନପୁଟ, ପେଟୁଆ,କାକଦ୍ୱୀପ,ସାଗର ଦୀପ, ନାମଖାନା ପ୍ରଭୃତି ସମୁଦ୍ରକୂଳରେ ପ୍ରଚୁର ଇଲସି ଧରାଯାଇ ମତ୍ସ୍ୟ ଅବତରଣ କେନ୍ଦ୍ରରେ ନିଲାମ କରାଯାଉଛି। ସେଠାରୁ ଓଡ଼ିଶାର ବିଭିନ୍ନ ସହର ସହିତ କୋଲକାତା ଓ ଅନ୍ୟ ରାଜ୍ୟକୁ ବିକ୍ରି ନିମନ୍ତେ ପଠାଯାଉଛି। ବାଲେଶ୍ୱର ଉପକୂଳରେ ଛୋଟ ଇଲିସି ପ୍ରଚୁର ପଡୁଥିବାବେଳେ ବଡ଼ ଇଲିସି ବଡ଼ ବଡ଼ ସହରକୁ ଅଧିକ ଦାମରେ ବ୍ୟବସାୟୀମାନେ ପଠାଉଛନ୍ତି।
ସମୁଦ୍ରରେ ୩୦୦ ଗ୍ରାମ ଓଜନର ଇଲିସି ଧରିବାକୁ ମତ୍ସ୍ୟ ବିଭାଗ ପକ୍ଷରୁ ନିଷେଧାଜ୍ଞା ଜାରି କରାଯାଇଥିବାବେଳେ ଟ୍ରଲର ମାଲିକମାନେ ଏହି କଟକଣାକୁ ବେଖାତିର କରି ଛୋଟ ଇଲିସି ଧରି ପାଖ ବଜାରକୁ ବିକ୍ରି ନିମନ୍ତେ ପଠାଉଛନ୍ତି। ବାଲେଶ୍ୱର ଭୋଗରାଇ, ବାଲିଆପାଳହାଟ ବଜାରରେ ୩୦୦ଗ୍ରାମର ଇଲିସି କେଜି ପ୍ରତି ୩୦୦ରୁ ୪୦୦ ଟଙ୍କା ଓ ୫୦୦ ଗ୍ରାମରୁ ଊର୍ଦ୍ଧ୍ୱ ଇଲିସି ୮୦୦ରୁ ୧ ହଜାର ଟଙ୍କାରେ ହାଟବଜାରରେ ବିକ୍ରି ହେଉଛି।
ଦୀଘା ମତ୍ସ୍ୟ ଅବତରଣ କେନ୍ଦ୍ରର ଫିସର ଆଣ୍ଡ ଫିସେଷ ଆସୋସିଏସନ ପାଗ ଅନୁକୁଳ ଥିବାରୁ ଆଶାତୀତ ଭାବେ ଇଲିସି ପଡୁଥିବା ସୂଚନା ଦେଇଛି। ଗଭୀର ସମୁଦ୍ରକୁ ମାଛମାରିବାକୁ ଯାଉଥିବା ମତ୍ସ୍ୟଜୀବୀମାନେ ଟ୍ରଲର, ଭୁଟଭୁଟି ଓ ଛୋଟଡ଼ଙ୍ଗାରେ ବିପଦ ସଂକେତ ଡାଟ ମେଶିନ( ଜରୁରୀ ସୂଚନା) ଓ ଭାସମାନ ଜ୍ୟାକେଟ ପରିଧାନ କରିବା ବାଧ୍ୟତାମୂଳକ ହୋଇଥିବାବେଳେ ଅଧିକାଂଶ ମତ୍ସ୍ୟଜୀବୀ ତାହା ବ୍ୟବହାର କରୁ ନ ଥିବା ଭୋଗରାଇ ଭାରପ୍ରାପ୍ତ ମତ୍ସ୍ୟଧିକାରୀ ଅନନ୍ତ କୁମାର ଜେନା କହିଛନ୍ତି।
