ହାଟଡିହୀ, ୧୧।୭ (ଶୁଭକାନ୍ତ ନାୟକ): କେନ୍ଦୁଝର ଜିଲା ଆନନ୍ଦପୁରରୁ ଆରମ୍ଭ ହୋଇଥିବା “ବୈତରଣୀ ବଞ୍ଚାଅ ଆନ୍ଦୋଳନ” ରାଜଧାନୀ ଭୁବନେଶ୍ୱରରେ ପହଞ୍ଚିବା ବେଳକୁ ଏହାର ରୂପ ରଙ୍ଗ ସମ୍ପୂର୍ଣ୍ଣ ବଦଳିଯାଇଛି। ଆରମ୍ଭରେ ପୁରୁଷ ଓ ମହିଳାଙ୍କ ବିପୁଳ ଭିଡ଼ ଦେଖାଯାଉଥିବା ଏହି ଆନ୍ଦୋଳନ ରାଜଧାନୀରେ ପହଞ୍ଚିବା ବେଳକୁ ମାତ୍ର ୧୫ ରୁ ୨୦ ଜଣଙ୍କ ମଧ୍ୟରେ ସୀମିତ ହୋଇଯାଇଛି। ତେବେ ଏହି ଆନ୍ଦୋଳନ ଜରିଆରେ ନିଜ ଦଳର ସରକାରକୁ ଘସିପୁରାର ଭାଜପା କର୍ମୀ ଯଜ୍ଞ ପ୍ରସାଦ ସାହୁ ଗଣମାଧ୍ୟମ ଆଗରେ ତୀବ୍ର ଟାର୍ଗେଟ କରିବା ଏବେ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ପାଲଟିଛି।
ଆନ୍ଦୋଳନର ନେତୃତ୍ୱ ନେଉଥିବା ଭାଜପା କର୍ମୀ ଯଜ୍ଞ ପ୍ରସାଦ ସାହୁ ସିଧାସଳଖ ଅଭିଯୋଗ ଆଣି କହିଛନ୍ତି ଯେ, ପ୍ରଶାସନିକ ଅଧିକାରୀମାନେ ବୈତରଣୀ ନଦୀକୁ ହତ୍ୟା କରିବା ପାଇଁ ଷଡ଼ଯନ୍ତ୍ର କରିଛନ୍ତି। ଆନ୍ଦୋଳନକାରୀମାନେ ଲୋକସେବା ଭବନ ଅଭିମୁଖେ ଯାଉଥିବା ବେଳେ ପୋଲିସ ସେମାନଙ୍କୁ ଅଟକାଇଥିବାରୁ ସେ କ୍ଷୋଭ ପ୍ରକାଶ କରି ପ୍ରଶ୍ନ ଉଠାଇଛନ୍ତି ଯେ, “ଏଇଟା କି ପ୍ରକାର ଶାସନ ବ୍ୟବସ୍ଥା ଏବଂ କି ପ୍ରକାର ପ୍ରଶାସନିକ ବ୍ୟବସ୍ଥା?” ଯଜ୍ଞଙ୍କ ଏହି ମନ୍ତବ୍ୟ ଖୋଦ୍ ତାଙ୍କ ଜିଲାର ମୁଖ୍ୟମନ୍ତ୍ରୀ, ରାଜ୍ୟର ଭାଜପା ସରକାର, ପୋଲିସ ଓ ପ୍ରଶାସନକୁ ସିଧାସଳଖ କାଠଗଡ଼ାକୁ ଟାଣିଛି।
ଏହି ଆନ୍ଦୋଳନ ପଛରେ ପୁରୁଣା ରାଜନୈତିକ ହିସାବ ନିକାଶ ଥିବା ନେଇ ମଧ୍ୟ ଆଲୋଚନା ହେଉଛି। ଯଜ୍ଞଙ୍କ ରାଜନୈତିକ ଅତୀତକୁ ନେଇ ଏବେ ସମୀକ୍ଷା ଆରମ୍ଭ ହୋଇଛି, କାରଣ ଗତ ନିର୍ବାଚନ ସମୟରେ ସେ ଭାଜପାରେ ଥାଇ ମଧ୍ୟ ଦଳ ବିରୋଧରେ ଯାଇ ଜଣେ ସ୍ୱାଧୀନ ପ୍ରାର୍ଥୀଙ୍କ ପାଇଁ “ଅଟୋ ଚିହ୍ନ ଜିନ୍ଦାବାଦ” ନାରା ଦେଇ ଜୋରଦାର ପ୍ରଚାର କରିଥିଲେ। ରାଜନୈତିକ ମହଲରେ ଚର୍ଚ୍ଚା ହେଉଛି ଯେ, ଯଜ୍ଞଙ୍କର ଏହି “ବୈତରଣୀ ବଞ୍ଚାଅ” ଆନ୍ଦୋଳନ ପଛରେ ବାସ୍ତବରେ ଅଟୋ ଚିହ୍ନର ସ୍ୱାର୍ଥ ରହିଛି କି?
ବର୍ତ୍ତମାନ ବର୍ଷା ଋତୁ ଯୋଗୁ ସମସ୍ତ ବାଲିଘାଟ ବନ୍ଦ ଥିବା ବେଳେ, ଭାଜପା କର୍ମୀ ଯଜ୍ଞଙ୍କ ନେତୃତ୍ୱରେ ହେଉଥିବା ଏହି ଆନ୍ଦୋଳନ ଏବଂ ଆନ୍ଦୋଳନକାରୀଙ୍କ ସଂଖ୍ୟା ହ୍ରାସ ପାଇବା ଏହାର ପ୍ରକୃତ ଉଦ୍ଦେଶ୍ୟ ଉପରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ନିଜ ଦଳର ସରକାରଙ୍କୁ ଟାର୍ଗେଟ କରି କରାଯାଉଥିବା ଏହି ଆନ୍ଦୋଳନ କାହା ସ୍ୱାର୍ଥରେ, ତାହାକୁ ନେଇ ଏବେ ସାଧାରଣରେ ସନ୍ଦେହ ପ୍ରକାଶ ପାଇଛି।
