ଆନନ୍ଦପୁର,୨୯।୬(ସ୍ବ.ପ୍ର.)-କେନ୍ଦୁଝର ଜିଲା ଆନନ୍ଦପୁର ଅଞ୍ଚଳର ଲାଇଫ୍ଲାଇନ୍ କୁହାଯାଉଥିବା ବୈତରଣୀ ନଦୀ ସେତୁ ପୁଣି ବିପଦରେ। ୩ଟି ସ୍ପାନ ଦବିବା ଯୋଗୁ ଏହାର ସ୍ଥାୟିତ୍ୱ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ପୂର୍ବରୁ ୨୦୧୮ ଜୁଲାଇ ୬ ତାରିଖରେ ସେତୁର ଗୋଟିଏ ପିଲାରରୁ ଏକ ବେରିଂ ଖସିପଡିଥିଲା। ୨୦୧୯ ଜୁଲାଇ ୧୨ରେ ୩୯ ଲକ୍ଷ ବ୍ୟୟ ଅଟକଳରେ ଏହାର ମରାମତି କରାଯାଇଥିଲା। ପୁନର୍ବାର ସେତୁର ସ୍ପାନ ଦବିବା ଘଟଣା ଜଣାପଡିବା ପରେ ଆନନ୍ଦପୁର ପୂର୍ତ୍ତ ବିଭାଗ ଉଦ୍ୟମରେ ଏକ ଟେକ୍ନିକାଲ ଟିମ୍ ଅନୁଧ୍ୟାନ କରି ସେତୁ ବିପଦସଙ୍କୁଳ ଥିବା ସତର୍କ କରାଇଛନ୍ତି। ତେବେ ଅଧିକ ଦବି ଥିବା ଏକ ସ୍ପାନକୁ ସୁରକ୍ଷା ଦେବା ଲାଗି ବିଭାଗ ପକ୍ଷରୁ କାଠଗୋଲା ଦିଆଯାଇ ଗତ ବୁଧବାର ମରାମତି କରାଯାଇଛି। ଏହାସହିତ ଅନ୍ୟ ବିପଦସଙ୍କୁଳ ସ୍ଥାନକୁ ମରାମତି କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି।
ସେତୁରେ ଲାଗିଥିବା ଅଧିକାଂଶ ସ୍ପାନର ଲମ୍ବ ୫୭ମିଟର। ଭାରିଯାନ ଚଳାଚଳ ଯୋଗୁ କ୍ଷତିଗ୍ରସ୍ତ ହେଉଥିବା ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ସମୀର କୁମାର ଅଧିକାରୀ କହିଛନ୍ତି। ତେବେ ସ୍ଥାନୀୟ ପ୍ରଶାସନ ଏବଂ ଜିଲାପାଳଙ୍କ ସହିତ ଆଲୋଚନା ପରେ ସେତୁର ଉଭୟପାର୍ଶ୍ୱରେ ଭାରିଯାନ ଚଳାଚଳ ଦିଗରେ ରୋକ୍ ଲଗାଇବା ପାଇଁ ସୂଚନାଫଳକ ଲଗାଯାଇଛି। ସହକାରୀ ନିର୍ବାହୀ ଯନ୍ତ୍ରୀଙ୍କ କହିବା ଅନୁଯାୟୀ, ଭାରିଯାନ ଚଳାଚଳ ଦିଗରେ ରୋକ୍ ନ ଲଗାଇଲେ ସେତୁ ଅଧିକ କ୍ଷତିଗ୍ରସ୍ତ ହେବାର ଆଶଙ୍କା ରହିଛି। ପୁନର୍ବାର ଆକଳନ କରାଯାଇ ସେତୁର ସମ୍ପୂର୍ଣ୍ଣ ମରାମତି କରାଯିବାକୁ ଉଦ୍ୟମ କରାଯିବ ବୋଲି ସେ ସୂଚନା ଦେଇଛନ୍ତି। ମାତ୍ରାଧିକ ଭାରିଯାନ ଚଳାଚଳ ଯୋଗୁ ସେତୁ ବିପଦସଙ୍କୁଳ ହୋଇପଡୁଛି। ଏଣୁ ଏକ ବିକଳ୍ପ ସେତୁ ନିର୍ମାଣ ନିମନ୍ତେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିବା ସେ ସୂଚନା ଦେଇଛନ୍ତି। ୫୩ ନଂ.ରାଜ୍ୟ ରାଜପଥ ଏବଂ ୨୦ନଂ. ଜାତୀୟ ରାଜପଥକୁ ଯୋଗାଯୋଗ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଥିବା ଏହି ସେତୁରେ ବାରମ୍ବାର ବିପଦପୂର୍ଣ୍ଣ ପରିସ୍ଥିତି ସୃଷ୍ଟି ହେବା ଦୁର୍ଭାଗ୍ୟଜନକ। ଜନସାଧାରଣଙ୍କ ସୁରକ୍ଷା ଦୃଷ୍ଟିରୁ ବିକଳ୍ପ ଭାବେ ନୂତନ ସେତୁର ବ୍ୟବସ୍ଥା ଗ୍ରହଣ କରିବା ଏକମାତ୍ର ବିକଳ୍ପ ବୋଲି ସାମାଜିକ କର୍ମୀ ବୁଲୁ ପଟ୍ଟନାୟକ ମତବ୍ୟକ୍ତ କରିଛନ୍ତି।
