ସୋରଡ଼ା,୫ା୧(ଡି.ଏନ୍.ଏ.): ଗୋରୁ ବ୍ୟବସାୟ କରୁଥିବା ୪ ଜଣଙ୍କୁ ଗୁରୁବାର ମରଣାନ୍ତକ ଆକ୍ରମଣ ହୋଇଛି। ସମସ୍ତଙ୍କୁ ସୋରଡ଼ା ମେଡିକାଲରେ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ପଠାଯାଇଛି। ଆଜି ଭୋର୍ ସମୟରେ ସ୍ଥାନୀୟ ଜରଉ ଛକରେ ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତା ପାର୍ଶ୍ୱରେ ପଡ଼ି ଜଣେ ଯୁବକ ଛଟପଟ ହେଉଥିବା ଖବର ପାଇ ପୋଲିସ ଏସ୍ଆଇ ସୁନିଲ କଣ୍ଡୋଗୋରି ପହଞ୍ଚିଥିଲେ। ସଙ୍ଗେ ସଙ୍ଗେ ଦମକଳକୁ ଖବର ଦେଇ ମେଡିକାଲ ଆଣିଥିଲେ। ଯୁବକ ଜଣକ ଦିଗପହଣ୍ଡି ନିକଟ ମୁକୁନ୍ଦପୁର ଗ୍ରାମର ସୁରଥ ନାୟକ (୨୯) ଓ ସେ ଜଣେ ଡ୍ରାଇଭର ବୋଲି ଜଣାପଡ଼ିଛି। ପରେ ସେହି ସମୟରେ ସୁରେଖାଦେଇପୁରର ରାଜୁ ସ୍ବାଇଁ (୫୫) ଓ ବାୟା ଗଉଡ (୬୦) ମଧ୍ୟ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହୋଇଛନ୍ତି। ସୁରଥଙ୍କ ହାତ ଗୋଡ଼,ମୁଣ୍ଡ,ପେଟ,ମୁହଁରେ ପ୍ରବଳ ଆଘାତ ଥିବା ବେଳେ ରାଜୁ ଓ ବାୟାଙ୍କ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି। ଅନ୍ୟ ଜଣେ କୁଲାଙ୍ଗୀର ରାଜା ନାୟକଙ୍କୁ ଗୁରୁତର ଅବସ୍ଥାରେ ଭଞ୍ଜନଗର ପଠାଯାଇଥିବା ଜଣାପଡ଼ିଛି।
ଘଟଣାରୁ ପ୍ରକାଶ ଯେ, ପ୍ରତି ଗୁରୁବାର ଗଜପତି ଜିଲା ମୋହନାରେ ଗୋରୁହାଟ ବ୍ୟବସାୟ ହେଉଛି। ସେଥିପାଇଁ ସୋରଡ଼ା ଅଞ୍ଚଳର ଲଠିପଡ଼ା,କୁଳାଙ୍ଗି,ସାରବାଡି,ବଡ଼ଗଡ଼,ଜୟଶୀଙ୍ଗୀ ଅଞ୍ଚଳରୁ ଗୋରୁ ବ୍ୟବସାୟୀମାନେ ଗୋରୁ କିଣି ଉକ୍ତ ହାଟକୁ ବିକ୍ରି ପାଇଁ ନେଇଥାନ୍ତି। ଏହି ବ୍ୟବସାୟୀମାନଙ୍କଠାରୁ କିଛି ଖଳ ପ୍ରକୃତିର ଯୁବକ ବଟି ନେଉଥିବାର ଅନୁମାନ କରାଯାଉଛି। ତେବେ କିଛି ସପ୍ତାହ ହେଲା ଗୋରୁ ବ୍ୟବସାୟୀମାନେ ଆଉ ବଟି ଦେଇ ନ ଥିବାରୁ ସେମାନଙ୍କୁ ଆକ୍ରମଣ ହୋଇଥିବା ସନ୍ଦେହ କରାଯାଉଛି। ଏପରିକି ଉକ୍ତ ଆକ୍ରମଣକାରୀ ଯୁବକମାନେ ସଙ୍ଘବଦ୍ଧ ଭାବେ ଭୋର୍ ସମୟରୁ ୨/୩ଟି କାର୍,ବୋଲେରୋରେ ଆସି ସୋରଡ଼ା, ବଡ଼ଗଡ଼ ରାସ୍ତାରେ ଗୋଡ଼ାଇ ଗୋଡ଼ାଇ ଆକ୍ରମଣ କରିଛନ୍ତି। ଏପରିକି ଜରଉ ସେତୁ ଉପରେ ଗୋରୁ ବୋଝେଇ ଭ୍ୟାନକୁ ଅଟକାଇ ଡ୍ରାଇଭର ସୁରଥ ନାୟକଙ୍କୁ ଲହୁଲୁହାଣ କରିଛନ୍ତି। ସୁରଥ ଓ ରାଜା ଗୋଟିଏ ଭ୍ୟାନ୍ରେ ଗୋରୁ ନେଇ ଯାଉଥିବା ବେଳେ ସେମାନଙ୍କୁ ଜରଉ ସେତୁ ଉପରେ ଓ ବାୟା ଗଉଡ଼ଙ୍କୁ ବଡ଼ଗଡ଼ ପେଟ୍ରୋଲ ପମ୍ପ ନିକଟରେ, ରାଜୁ ସ୍ବାଇଁଙ୍କୁ ସୁରେଖାଦେଇପୁର ନିକଟରେ ଆକ୍ରମଣ ହୋଇଛି। ଉକ୍ତ ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି। ଏହି ଘଟଣାରେ ୭/୮ ଜଣ ସମ୍ପୃକ୍ତ ଥିବାର ଅନୁମାନ କରାଯାଉଛି। ସମସ୍ତ ଗୁରୁତରଙ୍କୁ ୩ ଟି ସ୍ଥାନରେ ଏହି ଭୋର ସମୟରେ ଆକ୍ରମଣ ହୋଇଛି।
