ବରଗଡ଼,୯।୭(ପ୍ରେମାନନ୍ଦ ଖମାରୀ): ରାଜ୍ୟରେ କାର୍ଯ୍ୟରତ ଆଶାକର୍ମୀଙ୍କ ପ୍ରତି ସରକାର ଅଣଦେଖା ମନୋଭାବ ପୋଷଣ କରୁଛନ୍ତି । ଏଭଳି ଅଭିଯୋଗ ଆଣି ଗୁରୁବାର ଜିଲାପାଳଙ୍କ କାର୍ଯ୍ୟାଳୟରେ ରଣହୁଙ୍କାର ଦେଇଛନ୍ତି ବରଗଡ଼ ଜିଲା ଆଶାକର୍ମୀ ସଂଘ । ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁସାରେ ସଂଘର ସମସ୍ତ ସଦସ୍ୟ ବରଗଡ଼ ଗାନ୍ଧିଛକରେ ସମବେତ ହୋଇଥିଲେ। ସେଠାରୁ ଏକ ବିଶାଳ ଶୋଭାଯାତ୍ରାରେ ଜିଲାପାଳଙ୍କ କାର୍ଯ୍ୟାଳୟକୁ ପହଞ୍ଚି ବିକ୍ଷୋଭ ପ୍ରଦର୍ଶନ ସହିତ ଧାରଣା ଦେଇଛନ୍ତି ।
ଏହାପରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଏକ ସ୍ମାରକପତ୍ର ପ୍ରଦାନ କରିନଥିଲେ। ସ୍ମାରକପତ୍ରରେ ସଂଘ ବିଭିନ୍ନ ଦାବି କରିଛି । ସମସ୍ତ ଆଶାକର୍ମୀମାନଙ୍କୁ ସରକାରୀ କର୍ମଚାରୀ ମାନ୍ୟତା ସହିତ ସର୍ବନିମ୍ନ ସମ୍ମାନଜନକ ବେତନ ପ୍ରଦାନ, ସ୍ଥାୟୀ ଘୋଷଣା ନ ହେବା ପର୍ଯ୍ୟନ୍ତ ମାସିକ ୧୮ହଜାର ଟଙ୍କା ପ୍ରଦାନ ପ୍ରତିମାସ ୧୦ତାରିଖ ମଧ୍ୟରେ ସମସ୍ତ ପ୍ରକାର ମାନଦେୟ ପ୍ରଦାନ, ପ୍ରତି ଗ୍ରାମରେ ଆଶାକେନ୍ଦ୍ର ଓ ସରକାରୀ ସ୍ବାସ୍ଥ୍ୟ କେନ୍ଦ୍ରରେ ଆଶାଗୃହ ନିର୍ମାଣ ପାଇଁ ଦାବି ହୋଇଛି।
ସେହିପରି ଶିକ୍ଷାଗତ ଆଧାରରେ ଆଶାକର୍ମୀଙ୍କୁ ଏଏନଏମ(ANM) ପଦବୀକୁ ପଦୋନ୍ନତି, ଦୁର୍ଘଟଣାଜନିତ ମୃତ୍ୟୁ କ୍ଷେତ୍ରରେ ୧୦ ଲକ୍ଷ ଓ ଶାରୀରିକ ଅକ୍ଷମ କ୍ଷେତ୍ରରେ ୫ଲକ୍ଷ ଟଙ୍କାର ସହାୟତା, ସେବା ନିବୃତ ସମୟରେ ଏକକାଳୀନ ୧୦ଲକ୍ଷ ଟଙ୍କା ପ୍ରଦାନ, ମାତୃତ୍ବ ଲାଭ ସୁବିଧା, ପ୍ରସୂତିକାଳୀନ ଛୁଟି ଓ ଭତ୍ତା ପ୍ରଦାନ କରିବାକୁ ଦାବି କରାଯାଇଛି । ଦାବି ପୂରଣ ନହେଲେ ଆଗକୁ ଆନ୍ଦୋଳନ ଆହୁରି ତୀବ୍ରତର ହେବ ବୋଲି ଆଶାକର୍ମୀ ସଂଘ ଚେତାବନୀ ଦେଇଛନ୍ତି ।
