ଭୁବନେଶ୍ୱର,୨୬।୧୧(ବ୍ୟୁରୋ): ବହୁଚର୍ଚ୍ଚିତ ମହିଳା ବ୍ଲାକ୍ମେଲର୍ ଅର୍ଚ୍ଚନା ନାଗଙ୍କ ବେଆଇନ ଆର୍ଥିକ କାରବାର ଓ କଳା ସାମ୍ରାଜ୍ୟର ଗୋପନ ପେଡ଼ି ଖୋଲୁଛି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)। ୧୫ଜଣଙ୍କ ତାଲିକା ପ୍ରସ୍ତୁତ କରି କାର୍ଯ୍ୟାଳୟକୁ ଡାକି ଜେରା ଆରମ୍ଭ କରିଛି। କେତେବେଳେ ଜଣ ଜଣ କରି ତ ଆଉ କେତେବେଳେ ମୁହଁାମୁହିଁ ଜେରା କରି କଳାଧନ୍ଦାର ଲିଙ୍କ୍ ଖୋଜୁଛି। ଇତିମଧ୍ୟରେ ରାଜ୍ୟର ଏହି ବଡ଼ ହନିଟ୍ରାପ ମାମଲାରେ ମୋହରା ସାଜିଥିବା ଶ୍ରଦ୍ଧାଞ୍ଜଳି ବେହେରା, ଅର୍ଚ୍ଚନାଙ୍କ ବିଜ୍ନେସ୍ ପାର୍ଟନର ଖଗେଶ୍ୱର, ବ୍ୟବସାୟୀ ଅମିୟକାନ୍ତ ଦାଶ, ଚଳଚ୍ଚିତ୍ର ପ୍ରଯୋଜକ ଅକ୍ଷୟ ପରିଜା, ଢେଙ୍କାନାଳର ବିଜେଡି ବିଧାୟକଙ୍କ ଭାଇ ତଥା ବ୍ୟବସାୟୀ ଗଙ୍ଗାଧର ସାମଲଙ୍କୁ ଜେରା କରାଯାଇଥିବାବେଳେ ଶୁକ୍ରବାର ପୁଣି ଶ୍ରଦ୍ଧାଞ୍ଜଳିଙ୍କୁ ଦ୍ୱିତୀୟଥର କାର୍ଯ୍ୟାଳୟକୁ ଡାକି ଆଉ କିଛି ତଥ୍ୟ ସଂଗ୍ରହ କରିଛି ଇଡି। ଅନ୍ୟପକ୍ଷରେ ଅର୍ଚ୍ଚନାଙ୍କ ସାମ୍ରାଜ୍ୟର ପ୍ରତ୍ୟକ୍ଷଦର୍ଶୀ କୁହାଯାଉଥିବା ତାଙ୍କ ଡ୍ରାଇଭର ଚନ୍ଦନଙ୍କୁ ମଧ୍ୟ ଇଡି ଜେରା କରିଛି। ତାଙ୍କ ମୁହଁରୁ ଅର୍ଚ୍ଚନାଙ୍କ ଚରିତ ଶୁଣିଛନ୍ତି ଇଡି ଅଧିକାରୀ। ଅର୍ଚ୍ଚନାଙ୍କ ବିଷୟରେ ଚନ୍ଦନ ସବୁକିଛି ଜାଣିଛନ୍ତି। ସେ କୁଆଡ଼େ ଯାଉଥିଲେ, କାହା ସହ ମିଶୁଥିଲେ, ସତ୍ୟବିହାରସ୍ଥିତ ଆଲିସାନ୍ ଘରକୁ କେଉଁମାନେ ଆସୁଥିଲେ, ତାହାର ସବୁ ତଥ୍ୟ ଚନ୍ଦନ ପାଖରେ ରହିଥିବାରୁ ଇଡି ତାଙ୍କୁ ନୋଟିସ୍ କରିଥିଲା। ସେ ହାଜର ହେବା ପରେ ଇଡି ଏସବୁ ସଂକ୍ରାନ୍ତରେ ଚନ୍ଦନଙ୍କଠାରୁ କିଛି ନୂଆ ତଥ୍ୟ ପାଇଥିବା ସୂଚନା ମିଳିଛି।
ଚନ୍ଦନଙ୍କ ପୂର୍ବରୁ ଅର୍ଥାତ୍ ସକାଳ ପ୍ରାୟ ୭ଟା ୩୦ରେ ପ୍ରଥମେ ଶ୍ରଦ୍ଧାଞ୍ଜଳି ଇଡି କାର୍ଯ୍ୟାଳୟରେ ହାଜର ହୋଇଥିଲେ। ଇଡି ଅଧିକାରୀମାନେ ତାଙ୍କୁ ପୁଣି ଗୁଡ଼ାଇ ତୁଡ଼ାଇ ନାଗ ସାମ୍ରାଜ୍ୟ ବିଷୟରେ ପ୍ରଶ୍ନ ପଚାରିଥିଲେ। ବ୍ଲାକ୍ମେଲ ଓ ଆର୍ଥିକ କାରବାର କେମିତି ହେଉଥିଲା, କାହା ମାଧ୍ୟମରେ ଟଙ୍କା ଆସୁଥିଲା, ଆଦାୟ ହେଉଥିବା ବ୍ଲାକମେଲ ଅର୍ଥରେ ଶ୍ରଦ୍ଧାଞ୍ଜଳିଙ୍କ ଭାଗ କେତେ ରହୁଥିଲା, ବିଳମ୍ବରେ ଏତଲା ଦେବାର ରହସ୍ୟ କ’ଣ, ଏସବୁ ସଂକ୍ରାନ୍ତରେ ସତ୍ୟତା ଜାଣିବାକୁ ଇଡି ଅଧିକାରୀମାନେ ଚେଷ୍ଟା କରିଥିଲେ।
ଆସନ୍ତା ୩୦ ତାରିଖରେ ଅର୍ଚ୍ଚନା ଓ ଜଗବନ୍ଧୁ ରିମାଣ୍ଡରେ କୋର୍ଟରେ ହାଜର ହେବେ। ଏହି ସମୟରେ ଉଭୟଙ୍କୁ ରିମାଣ୍ଡରେ ଆଣି ଜେରା କରିବାକୁ ଇଡି ଯୋଜନା କରୁଛି। ସେମାନଙ୍କ ପ୍ରଶ୍ନ ପ୍ରସ୍ତୁତ ହୋଇସାରିଥିବାବେଳେ ଅନ୍ୟମାନଙ୍କୁ ଜେରାବେଳେ ମିଳିଥିବା ତଥ୍ୟ ଆଧାରରେ ଆଉ କିଛି ଯୋଡ଼ାଯାଇପାରେ ବୋଲି ସୂଚନା ମିଳିଛି। ଜେରା ତାଲିକାରେ ସୁନା ବ୍ୟବସାୟୀ, ଖଣି ବ୍ୟବସାୟୀ, ହୋଟେଲ ବ୍ୟବସାୟୀ, ପ୍ରଭାବଶାଳୀ ଓ କ୍ଷମତାଶାଳୀ ନେତା, ପ୍ରଶାସନିକ ଅଧିକାରୀ ରହିଥିବା ଚର୍ଚ୍ଚା ହେଉଥିବାରୁ ଆଗକୁ ଅନ୍ୟମାନଙ୍କ ପାଳି ପଡିବାକୁ ଯାଉଛି। ସତ୍ୟବିହାରସ୍ଥିତ ଗୋଟିଏ ପ୍ଲଟ୍ରେ ଅର୍ଚ୍ଚନା ଓ ଖଗେଶ୍ୱରଙ୍କ ଘର ରହିଛି। ଉକ୍ତ ଜମିକୁ ନେଇ ଥିବା ଗୁମର କଥା ଜାଣିବାକୁ ଜମି ମାଲିକଙ୍କୁ ମଧ୍ୟ ଇଡି ନୋଟିସ କରିଛି। ତେବେ ଅର୍ଚ୍ଚନା ଓ ଜଗବନ୍ଧୁ ରିମାଣ୍ଡରେ ଆସିବା ପରେ ନାଗ-ଚାନ୍ଦ ଦମ୍ପତିଙ୍କ ବହୁ ଗୁମର କଥା ପଦାକୁ ଆସିବ ବୋଲି କୁହାଯାଉଛି।
