ନୂଆଦିଲ୍ଲୀ,୨୦ା୯: ଭାରତରେ ସର୍ୱାଧିକ ପ୍ରଚଳିତ ୟୁପିଆଇ ପେମେଣ୍ଟ ବ୍ୟବସ୍ଥା ଫୋନ୍ ପେ’ ଭଳି ଆମେରିକାରେ ଆପଲ ପେ’ ମଧ୍ୟ ଗ୍ରାହକ ମହଲରେ ବେଶ୍ ପରିଚିତ। ତେବେ ଆମେରିକାରେ ଏହି ମୋବାଇଲ ପେମେଣ୍ଟ ସେବା ଆରମ୍ଭ କରିବାର ପ୍ରାୟ ୧୨ ବର୍ଷ ପରେ ଆପଲ ପେ’ ଏବେ ଭାରତରେ ପ୍ରବେଶ କରିବାକୁ ପ୍ରସ୍ତୁତ ହେଉଛି। ବିଶ୍ୱର ସବୁଠାରୁ ଅଧିକ ବ୍ୟବହୃତ ହେଉଥିବା ଡିଜିଟାଲ ୱାଲେଟଗୁଡ଼ିକ ମଧ୍ୟରୁ ଅନ୍ୟତମ ମୋବାଇଲ ପେମେଣ୍ଟ ବ୍ୟବସ୍ଥା ଭାବେ ଆପଲ ପେ’ ଭାରତରେ ନିଜର ଉପସ୍ଥିତିକୁ ସୁଦୃଢ଼ କରିବାକୁ ଯୋଜନା କରିଥିବା ସୂଚନା ମିଳିଛି। ରଏଟର୍ସ ରିପୋର୍ଟ ଅନୁଯାୟୀ, ଆପଲ ପେ’ ଆଗାମୀ ଅକ୍ଟୋବର ସୁଦ୍ଧା ଭାରତରେ ଏହାର ସେବା ଆରମ୍ଭ କରିବାକୁ ପ୍ରସ୍ତୁତି ନେଇଛି। ଏହି ସେବା ଆକ୍ସିସ ବ୍ୟାଙ୍କ ଦ୍ୱାରା ଜାରି କରାଯାଇଥିବା କ୍ରେଡିଟ୍ କାର୍ଡ ସହ ଆରମ୍ଭ ହେବ। ଏହାଛଡ଼ା ଆପଲ ଏଚ୍ଡିଏଫ୍ସି ବ୍ୟାଙ୍କ ଏବଂ ଆଇସିଆଇସିଆଇ ବ୍ୟାଙ୍କ ସହ ମଧ୍ୟ ଆଲୋଚନା ଚଳାଇଥିବା କୁହାଯାଇଛି। ୨୦୧୪ରେ ଆମେରିକାରେ ଆପଲ ପେ’ ଲଞ୍ଚ କରାଯାଇଥିଲା, ଯାହା ପ୍ରାରମ୍ଭିକ ପର୍ଯ୍ୟାୟରେ ଉପଭୋକ୍ତାମାନଙ୍କୁ ସେମାନଙ୍କର ସୁସଙ୍ଗତ ଆଇଫୋନ ଏବଂ ଆପଲ ୱାଚ୍ ମାଧ୍ୟମରେ କଣ୍ଟାକ୍ଟଲେସ୍ ପେମେଣ୍ଟ କରିବାର ସୁବିଧା ଦେଉଥିଲା। ସେବେଠାରୁ ଆପଲ ୟୁରୋପ, ଏସିଆ-ପାସିଫିକ ଏବଂ ମଧ୍ୟପ୍ରାଚ୍ୟର ପ୍ରମୁଖ ବଜାରଗୁଡ଼ିକରେ ଏହି ସେବା ସମ୍ପ୍ରସାରଣ କରିଛି।
