ନୂଆଦିଲ୍ଲୀ, ୭।୭: ଗଲଓ୍ବାନ ଘାଟିର ହିଂସକ ସଂଘର୍ଷ ପରେ ଚାଇନା ଉପରେ ଗୋଟିଏ ପରେ ଗୋଟିଏ ବିପଦ ମାଡ଼ି ଆସୁଛି। ଭାରତ ସରକାର ୫୯ ଚାଇନା ଆପ୍କୁ ବ୍ୟାନ୍ କରିଥିବା ବେଳେ ଏବେ ଆପଲ ପ୍ଲେ ଷ୍ଟୋରରୁ ୪୫୦୦ ଚାଇନା ଗେମ୍ ଆପ୍କୁ ହଟାଇ ଦିଆଯାଇଛି। ଚାଇନା ସରକାରଙ୍କ ଇଣ୍ଟରନେଟ୍ ନୀତି ଚାପ ଯୋଗୁ ଆପଲ୍ ଏଭଳି କରିଥିବା କୁହାଯାଇଛି। ଜୁଲାଇ ୧ରୁ ଚାଇନା ସରକାର ଇଣ୍ଟରନେଟ୍ ନୀତିରେ କେତେକ ପରିବର୍ତ୍ତନ ଆଣିଥିଲେ। ଏହି ନିୟମ ଅନୁସାରେ ଏଣିକି ଚାଇନା ଗେମ୍ ଡେଭଲପରର୍ସଙ୍କୁ ଆପଲ୍ ପ୍ଲେ ଷ୍ଟୋରରେ ନିଜ ଆପ୍ ଅପଲୋଡ୍ କରିବା ପୂର୍ବରୁ ସରକାରଙ୍କ ଅନୁମତି ଆଣିବା ଅପରିହାର୍ଯ୍ୟ। ଏହାକୁ ଦୃଷ୍ଟିରେ ରଖି ଗତ ସପ୍ତାହରେ ଆପଲ୍ ପ୍ଲେ ଷ୍ଟୋରରୁ ୩୦୦୦ ଚାଇନା ଗେମ୍କୁ ହଟାଇବାକୁ ନିଷ୍ପତ୍ତି ଗ୍ରହଣ କରାଯାଇଥିଲା। ଚାଇନା ସରକାର ପ୍ରତିବର୍ଷ ୧୫,୦୦ ଗେମ୍କୁ ଅପଲୋଡ୍ କରିବାକୁ ମଞ୍ଜୁରୀ ଦେଇଥାନ୍ତି। ନୁଆ ନିୟମ ଅନୁସାରେ ଏଥିପାଇଁ ଅନୁମତି ଆଣିବାକୁ ୧୨ ମାସ ସମୟ ଲାଗିଯିବ। ଫଳରେ ପ୍ଲେ୍ ଷ୍ଟୋରରେ ଗେମ୍ ଆପ୍ ଅପଲୋଡ୍ କରିବାକୁ ଅଧିକ ସମୟ ଲାଗିବ ବୋଲି ଚାଇନା ଆପଲ୍ର ମାର୍କେଟିଙ୍ଗ ମ୍ୟାନେଜର ଟୋଣ୍ଡ୍ କୁହନ୍ସ୍ ସୂଚନା ଦେଇଛନ୍ତି। ଆପଲ୍ ଜୁଲାଇ ୧ରେ ୧,୫୭୧ ଚାଇନା ଗେମ୍ ଆପ୍ ହଟାଇଥିବାବେଳେ ଜୁଲାଇ ୨ରେ ୧,୮୦୫ ଆପ୍ ଏବଂ ଜୁଲାଇ ୩ରେ ୧.୨୭୬ ଆପ୍ ହଟାଇଛି। ସମ୍ପ୍ରତି ଆପଲ୍ ପ୍ଲେ ଷ୍ଟୋରରେ ୬୦ ହଜାର ଚାଇନା ଗେମ୍ ଆପ୍ ଥିବାବେଳେ ନୂଆ ଇଣ୍ଟରନେଟ୍ ନୀତି ଯୋଗୁ ୨୦ ହଜାରରୁ ଅଧିକ ଆପ୍ ପ୍ରଭାବିତ ହେବାର ଆଶଙ୍କା ଥିବା ଟୋଣ୍ଡ୍ କୁହନ୍ସ୍ କହିଛନ୍ତି।
