ବିଷମକଟକ,୨୭ା୬(ଡି.ଏନ୍.ଏ.): ରାୟଗଡ଼ା ଜିଲା ନିୟମଗିରି ପାଦଦେଶରେ ବସବାସ କରୁଥିବା ଡଙ୍ଗରିଆମାନେ ବିଶେଷକରି କୃଷି ଓ ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭରଶୀଳ। ଉତ୍ପାଦିତ ପନିପରିବା, ଫଳ ଓ ଜଙ୍ଗଲଜାତ ଦ୍ରବ୍ୟ ବିକ୍ରିକରି ଏମାନେ ପରିବାର ଚଳାନ୍ତି। ହେଲେ ଲକ୍ଡାଉନ ଯୋଗୁ ଏସବୁ ଠିକ୍ଭାବେ ବିକ୍ରି ହୋଇପାରୁନାହିଁ। ଏହାର ସୁଯୋଗ ନେଇ ପଡ଼ୋଶୀ ରାଜ୍ୟର ଦଲାଲ ଡଙ୍ଗରିଆଙ୍କ ଦ୍ରବ୍ୟକୁ ଶାଗମାଛ ଦରରେ କିଣି ନେଉଛନ୍ତି।
ଜିଲାର ବିଷମକଟକ ବ୍ଲକ୍ ଅନ୍ତର୍ଗତ ୬୫ ଗ୍ରାମରେ ପ୍ରାୟ ୬ ହଜାରରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ସେମାନଙ୍କ ମଧ୍ୟରୁ ୭୦୦ରୁ ଊର୍ଦ୍ଧ୍ୱ ପରିବାର ଚାଷ ଉପରେ ନିର୍ଭର କରନ୍ତି। ଏଠାରେ ପ୍ରାୟ ୨ହଜାର ଏକରରୁ ଊର୍ଦ୍ଧ୍ୱ ଜଙ୍ଗଲ ଜମିରେ ସପୁରି ଚାଷ ହେଉଥିବାବେଳେ ପ୍ରାୟ ୨୮ ଲକ୍ଷରୁ ଊର୍ଦ୍ଧ୍ୱ ସପୁରି ଉତ୍ପାଦିତ ହୋଇଥାଏ। କରୋନାର ଦ୍ୱିତୀୟ ଲହରରେ ସଂକ୍ରମଣ ବଢ଼ୁଥିବାରୁ ଏହାକୁ ରୋକିବା ପାଇଁ ରାଜ୍ୟରେ ମେ ୫ରୁ ଲକ୍ଡାଉନ ଏବଂ ଶଟ୍ଡାଉନ ଜାରି ରହିଛି। ଏହାର ପ୍ରଭାବ ଡଙ୍ଗରିଆଙ୍କ ଜୀବନ ଓ ଜୀବିକା ଉପରେ ମଧ୍ୟ ପଡ଼ିଛି। ସପୁରି ବ୍ୟତୀତ ଡଙ୍ଗରିଆମାନେ ନିଜ ଅଞ୍ଚଳରେ ହଳଦୀ, ଅଦା, ପାଳୁଅ, କଦଳୀ, ତେନ୍ତୁଳି, ପଣସ ଆଦି ଉତ୍ପାଦନ କରିଥାନ୍ତି। ଏସବୁ ରାଜ୍ୟ ସମେତ ଛତିଶଗଡ଼, ମହାରାଷ୍ଟ୍ର, ଗୁଜରାଟ, ଦିଲ୍ଲୀ ଆଦି ରାଜ୍ୟକୁ ଯାଇଥାଏ। ସେହିପରି ଝାଡ଼ୁ ମଧ୍ୟ ପ୍ରସ୍ତୁତ କରି ବିକ୍ରି କରିଥାନ୍ତି। ତେବେ ଲକ୍ଡାଉନ ଏବଂ ଶଟ୍ଡାଉନରେ ବଜାର, ହାଟ ବନ୍ଦ ରହିଛି। ସେହିପରି ଟ୍ରେନ୍ ଓ ବସ୍ ସେବା ମଧ୍ୟ ବନ୍ଦ ରହିଛି। ଏଭଳି ପରିସ୍ଥିତିରେ ଉତ୍ପାଦିତ ଦ୍ରବ୍ୟ ବାହାର ରାଜ୍ୟକୁ ଯାଇପାରୁନାହିଁ। ଡଙ୍ଗରିଆମାନେ ଉତ୍ପାଦିତ ଦ୍ରବ୍ୟକୁ ନଷ୍ଟ କରିବା ବଦଳରେ ପରିବାର ଚଳାଇବା ପାଇଁ ସେଗୁଡ଼ିକୁ କମ୍ ଦରରେ ବିକ୍ରି କରିବାକୁ ବାଧ୍ୟ ହେଉଛନ୍ତି। ବ୍ଲକ୍ ଅଧୀନ କୁର୍ଲି ପଞ୍ଚାୟତର ୨୩ ଖଣ୍ଡ ଗାଁ ଚଞ୍ଚଡ଼ାଗୁଡ଼ା ପଞ୍ଚାୟତର କିଞ୍ଜମଯୋଡ଼ି ଗ୍ରାମ ସମେତ ଡାଳିଆକୁଜି ପଞ୍ଚାୟତର କେତୋଟି ଗାଁ ଏବଂ ମୁନିଗୁଡ଼ା ବ୍ଲକ୍ ମୁନିଖୋଲ ପଞ୍ଚାୟତର କେତୋଟି ଗାଁରେ ଡଙ୍ଗରିଆ ପରିବାର ଚାଷ ଉପରେ ନିର୍ଭର କରନ୍ତି। ଚାଟିକଣାସ୍ଥିତ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା(ଡିକେଡିଏ)ପକ୍ଷରୁ କରାଯାଥିବା ଆକଳନ ଅନୁଯାୟୀ, ନିୟମଗିରି ଅଞ୍ଚଳରୁ ପ୍ରାୟ ୩୦୦ରୁ ଊର୍ଦ୍ଧ୍ୱ ମେଟ୍ରିକ୍ ଟନ୍ ଆମ୍ବ, ୨୦୦ରୁ ଊର୍ଦ୍ଧ୍ୱ ମେଟ୍ରିକ୍ ଟନ୍ କମଳା, ୨୮ଲକ୍ଷରୁ ଊର୍ଦ୍ଧ୍ୱ ସପୁରି ଉତ୍ପାଦନ କରାଯାଇଥାଏ। କିନ୍ତୁ ଦଲାଲ ଏହାକୁ କିଣିନେଇ ବଜାରରେ ଚଢ଼ାଦରରେ ବିକ୍ରି କରୁଥିବା ଜଣାପଡ଼ିଛି। ଆନ୍ଧ୍ରରୁ ଦଲାଲମାନେ ଆସି ଡଙ୍ଗରିଆଙ୍କ ସରଳତାର ସୁଯୋଗ ନେଇ କମ୍ ମୂଲ୍ୟରେ ଜିନିଷ କିଣି ନେଉଛନ୍ତି। ଏ ନେଇ ଓର୍ମାସ୍ର ଉପମୁଖ୍ୟ ମନୋଜ କୁମାର ପାତ୍ରଙ୍କୁ ପଚାରିବାରୁ ସେ କହିଛନ୍ତି, ଦିଲ୍ଲୀରୁ କେତେଜଣ ବ୍ୟବସାୟୀ ଆସି ଡଙ୍ଗରିଆଙ୍କ ଦ୍ୱାରା ଉତ୍ପାଦିତ ସପୁରିର ମାନ ପରଖି ଯାଇଛନ୍ତି। ଏବେ ଏଠାରେ ସପୁରି ମୂଲ୍ୟ ଗୋଟିଏ ପିଛା ୨୫ ଟଙ୍କା ରହିଥିବାବେଳେ ବ୍ୟବସାୟୀମାନେ ୧୮ ଟଙ୍କା ମଧ୍ୟରେ ସପୁରି ଦିଲ୍ଲୀରେ ପହଞ୍ଚିଲେ କିଣିବେ ବୋଲି କହିଛନ୍ତି। ତେଣୁ ଦର କମିବା ପରେ ଦିଲ୍ଲୀ ପଠାଇବା ଯୋଜନା ରହିଥିବା ସେ କହିଛନ୍ତି। ସେହିପରି ନିକଟରେ ଅନୁସୂଚିତ ଜାତି ଓ ଜନଜାତି ବିକାଶ ମନ୍ତ୍ରୀ ଜଗନ୍ନାଥ ସାରକା ମଧ୍ୟ ବିଷମକଟକ ଗସ୍ତବେଳେ ଡଙ୍ଗରିଆଙ୍କ ସମସ୍ୟା ନେଇ ଆଲୋଚନା କରିଥିଲେ।
