ମାଲକାନଗିରି/ଏମ୍ଭି-୭୯, ୨୬ା୮(ସ୍ବ.ପ୍ର./ଡି.ଏନ.ଏ.): କାଲିମେଳା ବନ ବିଭାଗ ପକ୍ଷରୁ ଗତ ଦୁଇ ଦିନ ତଳେ ୩୫୦ କଇଁଛ ଚୋରାଚାଲାଣ ବେଳେ ଜବତ କରାଯାଇଥିବା ବେଳେ ଗୁରୁବାର ଏମଭି-୭୯ ବନ ବିଭାଗ ପକ୍ଷରୁ ଚୋରାଚାଲାଣ ବେଳେ ୧୫୦ଟି ଜିଅନ୍ତା କଇଁଛ ଜବତ କରାଯାଇଛି। କଇଁଛ ଚୋରାଚାଲାଣ ହେଉଥିବା ଖବର ପାଇ ଏମଭି-୭୯ ବନଅଧିକାରୀ ରଶ୍ମିରଞ୍ଜନ ସ୍ବାଇଁଙ୍କ ସହ ଏକ ସାତଜଣିଆ ଟିମ ଏମଭି-୧୧୪ ଗ୍ରାମରେ ବୁଧବାର ରାତିରେ ଚଢ଼ାଉ କରିଥିଲେ । ନିଛାଟିଆ ସ୍ଥାନରେ ଗ୍ରାମ ନିକଟରେ ଏକ ପିକଅପ ଭ୍ୟାନ ଥିବା ଦେଖି କର୍ମଚାରୀମାନେ ଏହାକୁ ତାଲାସି କରିଥିଲେ। ପରେ ଭ୍ୟାନରେ କଇଁଛ ଥିବା ଜଣାପଡିଥିଲା। ସେହି ଜାଗାରେ କୌଣସି ଲୋକ କିମ୍ବା ବ୍ୟବସାୟୀ ନ ମିଳିବାରୁ ଭ୍ୟାନକୁ ଟ୍ରାକ୍ଟର ସାହାଯ୍ୟରେ ଟାଣି ଏମଭି-୭୯ ରେଞ୍ଜ ଅଫିସକୁ ଆଣିଥିଲେ। ଗାଡ଼ିରେ ଥିବା ୧୫୦ଟି କଇଁଛର ମୂଲ୍ୟ ୧ ଲକ୍ଷ ଟଙ୍କା ହେବ ବୋଲି ବନ ଅଧିକାରୀ ସ୍ବାଇଁ କହିଛନ୍ତି। ଚଢ଼ାଉରେ କାଲିମେଳା ବନାଧିକାରୀ ସୁଶାନ୍ତ ଦଳେଇ, ପୋଟେରୁ ସେକ୍ସନର ଶିବାନନ୍ଦ ଲେଙ୍କା, ମୁଦୁଲିଧର ଅନୁଗୁଳିଆଙ୍କ କର୍ମଚାରୀମାନେ ସାମିଲ ଥିଲେ।
