ଗୁଣପୁର,୧୦ା୨(ଡି.ଏନ୍.ଏ.):ରାୟଗଡ଼ା ଜିଲା ରାମନାଗୁଡ଼ା ବିଡିଓଙ୍କୁ ଗୁଣପୁର ବିଡିଓ ଭାବେ ଅତିରିକ୍ତ ଦାୟିତ୍ବ ଦିଆଯାଇଛି। ଗୁଣପୁର ବିଡିଓ ଶାନ୍ତିପ୍ରଭା ପ୍ରଧାନଙ୍କୁ ଆଇଟିଡିଏ ପିଏ ରୂପେ ବଦଳି କରାଯିବା ପରେ ରାମନାଗୁଡ଼ା ବିଡିଓ ପ୍ରଭାତି ଝୋଡ଼ିଆଙ୍କୁ ଗୁଣପୁର ବ୍ଲକର ଅତିରିକ୍ତ ଦାୟିତ୍ବ ଦିଆଯାଇଛି। ବିଡିଓ ଝୋଡ଼ିଆ ପୂର୍ବରୁ ଗୁଣପୁର ପୌର ପରିଷଦର ନିର୍ବାହୀ ଅଧିକାରୀ ଦାୟିତ୍ୱରେ ମଧ୍ୟ ରହିଛନ୍ତି। ଜଣେ ଅଧିକାରୀଙ୍କୁ ତିନି ଗୁରୁତ୍ବପୂର୍ଣ୍ଣ ବିଭାଗର ଦାୟିତ୍ବ ପ୍ରଦାନ କରାଯିବା ପରେ ଠିକ୍ରେ କାର୍ଯ୍ୟ ସମ୍ପାଦନା ନେଇ ପ୍ରଶ୍ନ ଉଠିଛି। ଗୁଣପୁର ଭଳି ସମ୍ବେଦନଶୀଳ ସ୍ଥାନରେ ଜଣେ ଅଧିକାରୀଙ୍କୁ କାହିଁକି ରାମନାଗୁଡ଼ା ସହ ଗୁଣପୁରର ଦାୟିତ୍ବ ପ୍ରଦାନ କରାଗଲା ତାହାକୁ ନେଇ ରାଜନିତି ମହଲରେ ଚର୍ଚ୍ଚାର ବିଷୟ ହୋଇଛି। ଗୁଣପୁର ବ୍ଲକରେ ବିଡିଓ ଏବଂ ଅଧ୍ୟକ୍ଷାଙ୍କ ମଧ୍ୟରେ ବହୁ ବାଦ ବିବାଦ ପରେ ବିଡିଓ ଶାନ୍ତିପ୍ରଭା ପ୍ରଧାନଙ୍କୁ ବଦଳି କରାଯାଇଥିଲା। ତାଙ୍କୁ ଗୁଣପୁର ଆଇଟିଡିଏ ପିଏ ଦାୟିତ୍ୱ ଦିଆଯାଇଛି। ବାରକୋଟ ତହସିଲଦାରଙ୍କୁ ଗୁଣପୁର ବିଡିଓ ଭାବେ ବଦଳି ହୋଇଥିବା ବେଳେ ସେ ଏବେସୁଦ୍ଧା କାର୍ଯ୍ୟରେ ଯୋଗ ଦେଇନାହାଁନ୍ତି। ଏପରି ଘଟଣା କ୍ରମ ମଧ୍ୟରେ ମଙ୍ଗଳବାର ଜିଲା ପରିଷଦ କାର୍ଯ୍ୟାଳୟ ପକ୍ଷରୁ ଜିଲାପାଳଙ୍କ ନିର୍ଦ୍ଦେଶ କ୍ରମେ ବିଡିଓଙ୍କୁ ରିଲିଭ୍ କରାଯିବା ସହ ରାମନାଗୁଡ଼ା ବିଡିଓଙ୍କୁ ଗୁଣପୁର ବ୍ଲକର ଅତିରିକ୍ତ ବିଡିଓ ଦାୟିତ୍ବ ନେବାକୁ ନିର୍ଦ୍ଦେଶ ହୋଇଥିଲା। ଏହିକ୍ରମରେ ଉଭୟେ ନିଜ ନିଜର ଦାୟିତ୍ବ ବୁଧବାର ଗ୍ରହଣ କରିଛନ୍ତି। ବିଡିଓ ଶାନ୍ତିପ୍ରଭା ପ୍ରଧାନ ବଦଳି ହୋଇ ଯିବା ପରେ ବିଡିଓ ଏବଂ ଅଧ୍ୟକ୍ଷାଙ୍କ ମଧ୍ୟରେ ରହିଥିବା ବିବାଦ ଥମୁଛି ନଁା ଆଗକୁ ଆଉ କ’ଣ ରୂପ ନେଉଛି ତାହା ଦେଖିବାକୁ ରହିଲା। ଅନ୍ୟପଟେ ଏବେ ଦାୟିତ୍ବ ନେଇଥିବା ବିଡିଓ ଝୋଡ଼ିଆ ଏବଂ ବ୍ଲକ ଅଧ୍ୟକ୍ଷାଙ୍କ ମଧ୍ୟରେ ସମନ୍ବୟ ରହିବ ନଁା ନାହିଁ ତାହାକୁ ନେଇ ମଧ୍ୟ ଜନସାଧାରଣଙ୍କ ଅପେକ୍ଷା। ୩ଟି ଦାୟିତ୍ବ ନେବା ପରେ ପ୍ରଭାତି ଝୋଡ଼ିଆ ଅଧ୍ୟକ୍ଷା ମାନଙ୍କ ସହ ତାଳମେଳ ରଖି ନିଜ ଗୁରୁ ଦାୟିତ୍ବ କିପରି ତୁଲାଇବେ ତାହା ଉପରେ ଏବେ ସମସ୍ତଙ୍କ ନଜର। ରାମନାଗୁଡ଼ା ବିଡିଓ ପୌର ପରିଷଦର ଅଧ୍ୟକ୍ଷା ଦାୟିତ୍ବ ନେବା ପରେ ପୌର ପରିଷଦର ବିଭିନ୍ନ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ଉଠିଥିବାବେଳେ ପୁଣି ନୂତନ ଦାୟିତ୍ବ ନେବା ପରେ ନିଜର କାର୍ଯ୍ୟ କିପରି କରିବେ ତାହାକୁ ନେଇ ପ୍ରଶ୍ନ ଉଠିଛି।
