ଦାରିଙ୍ଗବାଡ଼ି,୧୨ା୧୦: କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିର୍କାବର୍ଗ ପଞ୍ଚାୟତର ମାଣିକଯୋଡ଼ି ଗ୍ରାମରେ ଜମି ବିବାଦ ମୁଣ୍ଡ ଟେକିଛି। ଏକ ଅନାବାଦି ଜମିରେ ଦୀର୍ଘବର୍ଷ ଧରି ସେହି ଅଞ୍ଚଳର ଶୁକଦେବ ପ୍ରଧାନ ଘର କରି ରହିଆସୁଥିବା ବେଳେ ସେହିଗ୍ରାମର ଲୋକ ଏହାକୁ ବିରୋଧ କରିବା ସହ ସେହି ଜମିରୁ ଶୁକଦେବଙ୍କୁ ଉଠାଇବାକୁ ଚେଷ୍ଟା କରିଥିଲେ। ସେ ସେଠାରୁ ନ ଉଠିବାରୁ ତାଙ୍କ ଘର ଭାଙ୍ଗି ଘରର ଆସବାବପତ୍ର ସହ ନଗଦ ଟଙ୍କା ଖାଦ୍ୟ ଶସ୍ୟ ଲୁଟି ନେଇଥିବା ଦାରିଙ୍ଗବାଡ଼ି ଥାନାରେ ଅଭିଯୋଗ କରିଛନ୍ତି।ଏନେଇ କେସ ନଂ ୧୨୩/୨୦ରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଥିବା ଆଇଆଇସି କୌଶିକ ମାଝି କହିଛନ୍ତି।
ସୂଚନାଯୋଗ୍ୟ, ଶୁକଦେବଙ୍କ ଲିଖିତ ଅଭିଯୋଗରୁ ଜଣାପଡ଼ିଛି, ସେ ଉକ୍ତ ଜମିରେ ଦୀର୍ଘବର୍ଷ ହେଲା ନିଜ ଜେଜେବାପା, ବାପା ଅମଳରୁ ଖଣ୍ଡିଏ ଘର କରି ରହିଥିବା ବେଳେ ତା’ ନିକଟରେ କୁଏରୀ, ଧାନ, ମାଣ୍ଡିଆ ଆଦି ଫସଲ ଚାଷ କରି ପରିବାର ଚଳାଉଛନ୍ତି। ତାଙ୍କ ଘରେ ୨୦ ବସ୍ତା ଧାନ ଥିଲା। ୫୦ରୁ୬୦ ଜଣ ଲୋକ ବିଭିନ୍ନ ମାରଣାସ୍ତ୍ର ଧରି ତାଙ୍କ ଘରେ ପହଞ୍ଚି ଉକ୍ତ ଜମି ଆମର କହି ସେଠାରୁ ଛାଡ଼ି ଚାଲିଯିବାକୁ କହିଥିଲେ। ପରେ ସେମାନେ ତାଙ୍କ ଘରର ଆଜବେଷ୍ଟସ୍ ସହ ଘରକୁ ସମ୍ପୂର୍ଣ୍ଣ ଭାଙ୍ଗି ବିଭିନ୍ନ ସାମଗ୍ରୀ ଲୁଟି ନେଇଛନ୍ତି। ପୋଲିସ ଏହାର ତଦନ୍ତ କରୁଛି।
