ମୁମ୍ବାଇ, ୧୨।୧୦: ବଲିଉଡ୍ର ମହାନାୟକ ଅମିତାଭ ବଚ୍ଚନଙ୍କ ଜନ୍ମଦିନ ତାଙ୍କ ପ୍ରଶଂସକଙ୍କ ପାଇଁ କୌଣସି ଉତ୍ସବଠାରୁ କମ୍ ନୁହେଁ। ପ୍ରତିବର୍ଷ ଅକ୍ଟୋବର ୧୧ ତାରିଖରେ ତାଙ୍କ ଜନ୍ମଦିନ ଅବସରରେ ମୁମ୍ବାଇସ୍ଥିତ ବଙ୍ଗଳା ‘ଜଲସା’ ବାହାରେ ପ୍ରଶଂସକଙ୍କ ଭିଡ଼ ଜମିଥାଏ। ଅମିତାଭ ମଧ୍ୟ ଘର ବାହାରକୁ ଆସି ପ୍ରଶଂସକଙ୍କୁ ଅଭିବାଦନ ଜଣାଇଥାନ୍ତି। ଚଳିତ ବର୍ଷ ତାଙ୍କ ଜନ୍ମଦିନରେ ପରିବାର, ପ୍ରଶଂସକ ଓ ସିନେଜଗତର ବହୁ ନାମୀଦାମୀ କଳାକାର ଶୁଭେଚ୍ଛା ଜଣାଇଛନ୍ତି। ତେବେ ଏହି ଅବସରରେ ତାଙ୍କ ବୋହୂ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ଏକ ସ୍ୱତନ୍ତ୍ର ସୋସିଆଲ ମିଡିଆ ପୋଷ୍ଟ ବେଶ୍ ଚର୍ଚ୍ଚାରେ ରହିଛି।
ଐଶ୍ୱର୍ଯ୍ୟା ରବିବାର ନିଜ ଇନ୍ଷ୍ଟାଗ୍ରାମ୍ରେ ଶ୍ୱଶୁର ଅମିତାଭ ବଚ୍ଚନଙ୍କୁ ଜନ୍ମଦିନର ଶୁଭେଚ୍ଛା ଜଣାଇ ଏକ ସୁନ୍ଦର ଫଟୋ ସେୟାର କରିଛନ୍ତି। ଏହି ଫଟୋରେ ଅମିତାଭ ଓ ନାତୁଣୀ ଆରାଧ୍ୟା ବଚ୍ଚନଙ୍କ ମଧ୍ୟରେ ଥିବା ସ୍ନେହ ଓ ଭଲପାଇବା ସ୍ପଷ୍ଟ ଭାବେ ଦେଖିବାକୁ ମିଳିଛି। ଆରାଧ୍ୟା ତାଙ୍କ ଜେଜେବାପାଙ୍କୁ ଆଲିଙ୍ଗନ କରିଥିବା ବେଳେ ଅମିତାଭ ଓଭରସାଇଜ୍ ଜ୍ୟାକେଟ୍ ଓ ବିନି କ୍ୟାପ୍ରେ ନଜର ଆସିଛନ୍ତି।
ଫଟୋ ସହ ଐଶ୍ୱର୍ଯ୍ୟା ଲେଖିଛନ୍ତି, “ଜନ୍ମଦିନର ଅନେକ ଶୁଭେଚ୍ଛା ପ୍ରିୟ ପା-ଦାଦାଜୀ। ଆପଣଙ୍କ ଉପରେ ସର୍ବଦା ଭଗବାନଙ୍କ ଅଶେଷ ଆଶୀର୍ବାଦ ଓ ଭଲପାଇବା ରହିଥାଉ।” ଏହି ପୋଷ୍ଟ ମାଧ୍ୟମରେ ସେ ଅମିତାଭଙ୍କ ପ୍ରତି ନିଜର ସ୍ନେହ ଓ ସମ୍ମାନ ପ୍ରକାଶ କରିଛନ୍ତି।ଐଶ୍ୱର୍ଯ୍ୟାଙ୍କ ବ୍ୟତୀତ ଚିରଞ୍ଜୀବୀ, ସଞ୍ଜୟ ଦତ୍ତ, ଅଜୟ ଦେବଗନ, ଅନୁପମ ଖେର, ଫରାହ ଖାନ, କାଜୋଲ ଓ ଶତ୍ରୁଘ୍ନ ସିହ୍ନାଙ୍କ ସମେତ ବଲିଉଡ୍ର ବହୁ କଳାକାର ଅମିତାଭଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି। ପ୍ରତିବର୍ଷ ଭଳି ଏଥର ମଧ୍ୟ ଅମିତାଭ ନିଜ ବଙ୍ଗଳା ବାହାରକୁ ଆସି ପ୍ରଶଂସକଙ୍କୁ ଅଭିବାଦନ ଜଣାଇଥିଲେ। ଏହି ସମୟରେ ସେ ଲାଲ୍ କୁର୍ତ୍ତା ସହ ମ୍ୟାଚିଂ ଶାଲ୍ ପିନ୍ଧିଥିଲେ।
ଅମିତାଭଙ୍କ ଜନ୍ମଦିନକୁ ଆହୁରି ସ୍ୱତନ୍ତ୍ର କରିବା ପାଇଁ ‘କୌନ୍ ବନେଗା କରୋଡ଼ପତି ୧୮’ର ମଞ୍ଚରେ ମଧ୍ୟ ଏକ ବିଶେଷ ଆୟୋଜନ କରାଯାଇଥିଲା। ତାଙ୍କ ପାଇଁ ପ୍ରସ୍ତୁତ ଏକ ସ୍ୱତନ୍ତ୍ର ଭିଡିଓ କ୍ଲିପ୍ରେ ମାଆ ତେଜୀ ବଚ୍ଚନଙ୍କ ସହ ତାଙ୍କର ଏକ କଳାଧଳା ଫଟୋ ଏବଂ କବି ପିତା ହରିବଂଶ ରାୟ ବଚ୍ଚନଙ୍କ କବିତା ଶୁଣିବାକୁ ମିଳିଥିଲା। ମାଆଙ୍କ ସ୍ୱର ଶୁଣି ଅମିତାଭ ଭାବବିହ୍ୱଳ ହୋଇପଡ଼ିଥିଲେ । ଏହି ବିଶେଷ ଅବସରରେ ପୁଅ ଅଭିଷେକ ବଚ୍ଚନ ମଧ୍ୟ ଉପସ୍ଥିତ ଥିଲେ। ଏଥିସହ ମାଧୁରୀ ଦୀକ୍ଷିତ, ଆୟୁଷ୍ମାନ ଖୁରାନା ଓ ସାରା ଅଲ୍ଲୀ ଖାନ୍ ସ୍ୱତନ୍ତ୍ର ଅତିଥି ଭାବେ ଯୋଗ ଦେଇଥିଲେ। ଅମିତାଭଙ୍କ ଜନ୍ମଦିନରେ ପରିବାରର ସ୍ନେହ, ପ୍ରଶଂସକଙ୍କ ଭଲପାଇବା ଓ ସିନେଜଗତର ଶୁଭେଚ୍ଛା ଏହି ଉତ୍ସବକୁ ଆହୁରି ସ୍ମରଣୀୟ କରିଛି।
