ସିଓଲ,୧ା୧: ଦକ୍ଷିଣ କୋରିଆ ଜେଜୁ ଏୟାରର ବୋଇଂ ୭୩୭-୮୦୦ ବିମାନ ଦୁର୍ଘଟଣାରେ ସମସ୍ତ ୧୭୫ ଯାତ୍ରୀ ଏବଂ ୪ ଜଣ କ୍ରିଉ ସଦସ୍ୟଙ୍କ ମୃତ୍ୟୁ ଘଟିଥିଲା। ମୃତକମାନଙ୍କ ଚିହ୍ନଟ କାର୍ଯ୍ୟରେ ପୋଲିସ ବ୍ୟସ୍ତ ଥିବାବେଳେ କେଉଁ କାରଣରୁ ଏଭଳି ଭୟାବହ ଦୁର୍ଘଟଣା ଘଟିଲା, ତାହାର ତଦନ୍ତକୁ ମଙ୍ଗଳବାର ଜୋର୍ଦାର କରାଯାଇଛି। ରବିବାର ମୁଆନ୍ ଅନ୍ତର୍ଜାତୀୟ ବିମାନବନ୍ଦରରେ ବିମାନଟି ବେଲି-ଲ୍ୟାଣ୍ଡିଂ କରିବା ପରେ ରନ୍ଓ୍ବେରୁ ଖସିଯାଇ ଦୁର୍ଘଟଣାଗ୍ରସ୍ତ ହୋଇଥିଲା। ଏୟାରପୋର୍ଟର ଏମ୍ବାଙ୍କମେଣ୍ଟରେ ରଖାଯାଇଥିବା ନାଭିଗେଶନ ଉପକରଣଗୁଡ଼ିକ ସହ ବିମାନଟି ଧକ୍କା ଦେବା ଫଳରେ ଜଳିଯାଇଥିଲା। ବିମାନବନ୍ଦର ଅପରେଟିଂ ମାନୁଆଲ ଅନୁଯାୟୀ, ଏମ୍ବାଙ୍କମେଣ୍ଟ ରନ୍ଓ୍ବେ ଶେଷଭାଗର ଅତି ନିକଟରେ ଥିବାବେଳେ ସେଠାରେ ୨୦୨୪ ପ୍ରଥମ ଭାଗରୁ ଏହି ଉପକରଣଗୁଡ଼ିକ ରଖାଯାଇଥିଲା। ସମ୍ପ୍ରସାରଣ ଯୋଜନା ପାଇଁ ଉପକରଣକୁ ସ୍ଥାନାନ୍ତର କରାଯିବା ନିମନ୍ତେ ସୁପାରିସ କରାଯାଇଥିଲା। ପ୍ରଶ୍ନଗୁଡ଼ିକର ଜବାବ ଦେବା ପୂର୍ବରୁ କର୍ତ୍ତୃପକ୍ଷଙ୍କୁ ଉକ୍ତ ଦସ୍ତାବିଜ୍ ଯାଞ୍ଚ କରିବା ଆବଶ୍ୟକ ବୋଲି ପରିବହନ ମନ୍ତ୍ରଣାଳୟ କହିଛି।
ଦୁର୍ଘଟଣାରେ ମୃତକମାନଙ୍କ ମଧ୍ୟରୁ ଏବେ ବି ୫ଟି ମୃତଦେହ ଚିହ୍ନଟ ହୋଇପାରି ନାହିଁ। ତୁରନ୍ତ ଡିଏନ୍ଏ ପରୀକ୍ଷା କରାଇବା ପାଇଁ ଅଧିକ କର୍ମଚାରୀ ଓ ଉପକରଣ ମଞ୍ଜୁର କରାଯାଇଛି। ଦୁର୍ଘଟଣା ସ୍ଥଳରୁ ବିମାନର ଡେଟା ରେକର୍ଡର ବ୍ଲାକ୍ ବକ୍ସ ମିଳିଥିବାବେଳେ ଏକ ମୁଖ୍ୟ କନେକ୍ଟର ମିଳୁ ନ ଥିବାରୁ ତଥ୍ୟ କିପରି ବାହାର କରାଯିବ, ସେ ନେଇ କର୍ତ୍ତୃପକ୍ଷ ସମୀକ୍ଷା କରୁଛନ୍ତି। ତେବେ କକ୍ପିଟ୍ ଭଏସ୍ ରେକର୍ଡରୁ ତଥ୍ୟ ପୁନଃ ପ୍ରାପ୍ତି ପାଇଁ ଉଦ୍ୟମ ଆରମ୍ଭ ହୋଇଛି। ଦେଶର ଏୟାରଲାଇନ୍ସଗୁଡ଼ିକ ଦ୍ୱାରା ପରିଚାଳିତ ସମସ୍ତ ବୋଇଂ ୭୩୭-୮୦୦ ବିମାନର ସୁରକ୍ଷା ଯାଞ୍ଚ କାର୍ଯ୍ୟ ଜାନୁଆରୀ ୩ ସୁଦ୍ଧା ଶେଷ କରିବାକୁ ସୋମବାର ଦେଶର ନୂଆ କାମଚଳା ରାଷ୍ଟ୍ରପତି ଚୋଇ ସାଙ୍ଗ-ମୋକ୍ ନିର୍ଦ୍ଦେଶ ଦେଇଥିଲେ। ମୁଆନ୍ ଏୟାରପୋର୍ଟକୁ ଜାନୁଆରୀ ୭ ପର୍ଯ୍ୟନ୍ତ ବନ୍ଦ ରଖାଯାଇଛି। ତଦନ୍ତରେ ଆମେରିକାର ଜାତୀୟ ପରିବହନ ନିରାପତ୍ତା ବୋର୍ଡ (ଏନ୍ଟିଏସ୍ବି), ସଂଘୀୟ ବିମାନ ଚଳାଚଳ ପ୍ରଶାସନ ଏବଂ ବିମାନ ନିର୍ମାତା କମ୍ପାନୀ ବୋଇଂ ସାମିଲ ହୋଇଛି। ବିମାନରେ ପକ୍ଷୀ ମାଡ଼ ହେବା, ବିମାନର କଣ୍ଟ୍ରୋଲ ସିଷ୍ଟମ୍ କାମ ନ କରିବା ଆଦି ଦୁର୍ଘଟଣାର ସମ୍ଭାବ୍ୟ କାରଣ ହୋଇପାରେ ଯେଉଁଥିପାଇଁ ପାଇଲଟ୍ ଏମର୍ଜେନ୍ସି ଘୋଷଣା କରିବା ସହ ତରବରରେ ବିମାନ ଅବତରଣ ଉଦ୍ୟମ କରିଥିଲେ ବୋଲି ଅଗ୍ନିଶମ ଏବଂ ପରିବହନ ଅଧିକାରୀମାନେ କହିଛନ୍ତି। ତଦନ୍ତକାରୀ ଅଧିକାରୀମାନେ ଉକ୍ତ ସମ୍ଭାବ୍ୟ କାରଣଗୁଡ଼ିକ ଉପରେ ତଦନ୍ତ ଚଳାଇଛନ୍ତି। ଏହା ବ୍ୟତୀତ ବିମାନବନ୍ଦରର ଡିଜାଇନ୍ ବିଶେଷକରି ରନ୍ଓ୍ବେ ଶେଷଭାଗ ନିକଟରେ ବୃହତ୍ କଳା ରଙ୍ଗର କଂକ୍ରିଟ୍ ଏମ୍ବାଙ୍କମେଣ୍ଟକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି, ଯାହା ନାଭିଗେଶନ ଉପକରଣ ଗଚ୍ଛିତ ରଖିବା ପାଇଁ ବ୍ୟବହୃତ ହେଉଥିଲା।
