ବରଗଡ଼,୮।୭(ପ୍ରେମାନନ୍ଦ ଖମାରୀ)- ଓଡ଼ିଶା କୃଷି ଓ କୃଷକ ସଶକ୍ତିକରଣ ବିଭାଗର କମିଶନର ତଥା ସଚିବ ସଚିନ ରାମଚନ୍ଦ୍ର ଯାଦବ ବୁଧବାର ବରଗଡ଼ ଜିଲା ଗସ୍ତରେ ଆସିଥିଲେ । ସେ ତାଙ୍କ ଏହି ଗସ୍ତରେ ବରଗଡ଼ ବ୍ଲକ ଅନ୍ତର୍ଗତ କୁରୁଆଁସ୍ଥିତ ବିହନ ପ୍ରକ୍ରିୟାକରଣ ପ୍ଲାଣ୍ଟ ପରିଦର୍ଶନ କରିଥିଲେ । ଏହା ସହିତ କମିଶନର ଯାଦବ ସ୍ଥାନୀୟ ଚାଷୀମାନଙ୍କ ସହ ଆଲୋଚନା କରି ଧାନ ସହିତ ମୁଗ, ବିରି ଓ ଆଖୁ ଭଳି ଅନ୍ୟ ଫସଲ ଚାଷ କରିବା ପାଇଁ ପରାମର୍ଶ ଦେଇଥିଲେ। ଏହାଦ୍ୱାରା ଚାଷୀଙ୍କ ଆୟ ବୃଦ୍ଧି ପାଇବ ବୋଲି ସେ କହିଥିଲେ । ସେହିପରି ଦାନାଦାର ସାର ସହିତ ନାନୋ ସାର ବ୍ୟବହାର କରିବାକୁ ମଧ୍ୟ ପରାମର୍ଶ ଦେଇଥିଲେ ଏବଂ ତାହା ଫସଲର ଉତ୍ପାଦନ ବୃଦ୍ଧି କରିବା ସହ ଖର୍ଚ୍ଚ କମାଇବାରେ ସହାୟକ ହେବ ବୋଲି ସେ କହିଥିଲେ । ଏହି ଗସ୍ତ ସମୟରେ ବରଗଡ଼ କୃଷି ଉପନିର୍ଦ୍ଦେଶକ ମମତାରାଣୀ ତ୍ରିପାଠୀ, ପଦ୍ମପୁର କୃଷି ଅଧିକାରୀ ପ୍ରଭାସ ପଣ୍ଡା, କୃଷିଯନ୍ତ୍ରୀ ନରେନ୍ଦ୍ର ପାଣି, ବରଗଡ଼ ବ୍ଲକ କୃଷି ଅଧିକାରୀ ଇତିସ୍ମିତା ଡେବତା, ସହକାରୀ କୃଷି ନିର୍ଦ୍ଦେଶକ, ଅଞ୍ଜନ ନାୟକ, ସ୍ନେହଲ ମଣ୍ଡିପ ପ୍ରମୁଖ ଉପସ୍ଥିତ ଥିଲେ।
